Tơdrong Pơđơ̆k 28:3
“Bơngai dơnuh pơgŏ pơđep bơngai pơmat-tat. Nhen thoi đak ‘mi tih pơhoch đĭ ‘ba hơ’bo.” (Tơdrong Pơđơ̆k 28:3)
Nơ̆r jet tơchĕng pơwao:
– Rup pơtih ‘mi tih pơhoch đĭ ‘ba hơ’bo tơ’bôh tơdrong kiơ lăm tơdrong pơđơ̆k âu?
– Chăl arih pơtao Ahap nhen thoi đak ‘mi tih pơrăm tơplih tơiung pơjing, thoi yơ?
– Lu bơ̆n yua iŏk nơ̆r Kră Yang lăm chăl arih bơ̆n thoi yơ?
Tơdrong pơđơ̆k lăm năr ‘nâu đei chih roi minh pôm rup pơtih kơ tơdrong đak ‘mi tih. Đei juăt yua rup đak ‘mi tih wă pơma kơ đei pŭn yua kơ đei đak ‘mi pơm kơ teh rơngơp, pơm kơ ‘ba hơ’bo ‘nhĕt arih bluh ‘lơ̆ng, mălei dah đak ‘mi tih dêh dah ‘mi kial hơbŭt “pơhoch đĭ tơmam” pơhoch đĭ ‘ba hơ’bo, gô ba ăn tơdrong răm. Kư̆m thoi noh, bơngai pơgơ̆r pơgŏ pơđep lu bơngai pơmat tat, lu sư trŏ kơ bơngai tơrăn, lei na lu sư ưh kơ đei tơdrong ‘lơ̆ng dah pŭn hiôk ôh, mălei lăp pơrăm păng hiong tơmam.
Chăl arih pơtao Ahap tơ’bôh rơđah dêh, pơgŏ pơđep lu bơngai pơmat tat; pơtao Ahap tơgar iŏk pơgar hơmu đơ̆ng ‘bok Nabôt hăm tơdrong pơlôch lê̆ sư hloi. Thoi noh, ‘Bok Kei-Dei sek tơlang pơtao Ahap đơ̆ng Êli ‘bok khan lê̆ adrol. Tuch luch, pơtao Ahap lôch kơplah tơblah, pham sư kŏ gô laih, đơ̆ng ‘bơ̆t anih mă đêl sư pơlôch ‘bok Nabôt (lăng lăm I Pơtao 21:19; 22:38). Đơ̆ng rŏng kơ noh, adrĕch adrung sư đei pơrăm, Jêsêbel akăn sư lôch kơnê̆ dêh trŏ thoi nơ̆r Kră Yang đei khan bơih. ‘Bok Kei-Dei ling lang tơ’bôh Sư hiơ̆k dêh kơ lu bơngai dơnuh, bơngai tơrăn, păng lu bơngai hoh kơ’bah. Tơdrong jang bơngai pơgơ̆r, mă lăm teh đak âu, dah lăm Khul Bơngai Lui, hnam dơnŏ, đơ̆ng Kră Yang pơjao ăn wă wei lăng păng tơiung bơngai nai, ưh kơ trŏ wă pơgŏ lu sư na lơi yua kơdih. Kơplah đei bơngai gơh pơm tơdrong kơnê̆ wă chă lơi yua kơdih, lu sư kư̆m thoi đak ‘mi tih kial hơbŭt, pơrăm đĭ tơmam tơplih kơ tơiung atŏk dih băl “Thoi noh Jôsuê iung hơdai hăm lu linh năm tŏk blah pơlei Ahi, Jôsuê rơih iŏk pêng-jĭt rơbâu ‘nu bơngai nuih kơtang, athei lu sư yak năm kơmăng” (trong 3). Nơ̆r Kră Yang âu yua iŏk kơ đĭ đăng lu bơ̆n. Mă khan ‘bơ̆t anih ayơ, đĭ đăng kơ lu bơ̆n tă kơ “Bơngai pơmat tat” ‘bơ̆t anăp Kră Yang “Kơplah lăm mĕ bơ̆n tơpŭ kơ bơ̆n oei nge sơ̆, bơ̆n ưh kơ đei chĕp tơmam kiơ tơlĕch tơ teh âu. ‘Noh thoi lĕ bơ̆n lôch ning-mônh, bơ̆n ưh kơ gơh chĕp ba tơmam kiơ ôh.” (I Timôthê 6:7). Dôm tơmam bơ̆n đei noh đơ̆ng Kră Yang ăn, dôm tơdrong ‘mêm mă bơ̆n đei noh đơ̆ng Kră Yang ăn đĕch. Kră Yang dan ăn kơ lu bơ̆n ‘bơ̆t anih phara băl, mă khan lei ră ‘bơ̆t anăp Kră Yang, đĭ đăng kơ lu bơ̆n tă kơ dơnuh hoh” păng “pơmat tat” lei lăi băl đĕch. Kơlih kơ thoi noh, na lu bơ̆n athei pơma dơnuh kiơ̆ tơdrong tơpăt Kră Yang, athei băt ‘mêm mơnat dih băl, tơpăt păng pơm ‘lơ̆ng. Đơ̆ng Kră Yang Yêsu Krist, na lu bơ̆n ‘bôh kơmĭl ‘lơ̆ng ‘bok Krist, ưh kơ pơgŏ pơđep lu bơngai dơnuh kơ’bah, mălei tơjur akâu kơdih “Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ’ngla Inh kơdih awih awăn kơ đe păng Inh wă kơ tơ’ngla Inh kơdih lôch tang huai iŏk lơ bơngai.” (Markôs 10:45). Apinh Kră Yang ăn kơ lu bơ̆n arih păng pơma dơnuh dih băl kiơ̆ kơmĭl Kră Yang ‘mêm mơnat, awih awăn tơplih kơ pơgŏ pơđep dih băl.
Ơ Yang ‘Bă tơ kơpal plĕnh, jơ̆ Kră Yang tơpăt păng ‘mêm mơnat. Apinh Ih ‘nĕ jô̆ yo kơ yoch inh, mưh inh pơm kơnê̆ dah ưh kơ bơngơ̆t kơ bơngai mă oei kăl kơ inh tơgŭm. Apinh Ih ăn kơ jơhngơ̆m inh nhen thoi Kră Yang, ‘bĕnh kơ tơdrong ‘mêm mơnat, tơdrong tơpăt păng iŏk đon ala. Apinh Ih tơgŭm inh arih ba ăn tơdrong pŭn hiôk, tơplih kơ pơm răm kơ bơngai nai. Krao khan yua anăn Kră Yang Yêsu Krist, Amen.
Lu bơ̆n đei pơma dơnuh hăm bơngai dơnuh kơ’bah, bơngai pơmat tat thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Jop 22
Kênh Youtube BHKTHN:
