Klei Aê Diê Blŭ: II Y-Pêtrôs 1:19-21
Êlan kliăng: “Kyuadah amâo tuôm mâo ôh sa mta klei hưn êlâo kbiă hriê mơ̆ng klei mnuih mĭn, ƀiădah Yang Mngăt Jăk mtrŭt mnuih blŭ klei kbiă mơ̆ng Aê Diê.” (II Y-Pêtrôs 1:21)
Klei êmuh ksiêm mĭn: Ya klei ngă kơ phung khua ƀĭng kna đăo hĭn kơ klei phung khua pô hưn êlâo hlăm Hdruôm Hră Klei Bi Mguôp Hđăp jing sĭt nik? Ya klei ñu čiăng lač kơ phung ƀuôn sang Aê Diê tơdah mñă “Yang Mngăt Jăk mgei mtrŭt”? Si drei dưi mâo klei mđĭ ai mơ̆ng Yang Mngăt Jăk đru hriăm Klei Aê Diê Blŭ?
Khua ƀĭng kna Y-Pêtrôs mtô kơ Khua Yang Yêsu jing Pô ñu ƀuh leh klei kdrưh kơang Ñu ti čư̆ bi mlih rup (II Y-Pêtrôs 1:16-18). Klei anăn jing klei bi klă năng đăo knang ngă kơ ñu đăo kjăp hĭn kơ klei phung khua pô hưn êlâo lač leh kơ klei Khua Yang Yêsu lŏ hriê jing sĭt nik. Mbĭt anăn, Khua ƀĭng kna Y-Pêtrôs ăt čiăng mơ̆ng klei bi mklă anăn mñă kơ phung đăo mkăn, “diih răng kơ klei anăn msĕ si kơ pui kđen mtrang hlăm anôk mmăt,…” (êlan 19). Phung ƀuôn sang Aê Diê hruê anei ăt mâo klei mñă msĕ snăn mơh, êjai dôk guôn hruê Khua Yang lŏ hriê, brei drei dlăng, hriăm, ksiêm mĭn leh anăn hluê ngă klei Klei Aê Diê Blŭ mtô jing pui mtrang êlan, đru kơ phung đăo êbat nao hŏng klei kjăp, dưi hĭn hŏng klei soh leh anăn klei djiê. Djăp mta bruă srăng bi êdah hlăm wưng “aguah mngač truh”, jing tơdah Khua Yang Yêsu lŏ hriê mơ̆ng adiê.
Khua ƀĭng kna Y-Pêtrôs mñă klă: “Amâo mâo sa čô dưi mblang hjăn tui si klei mĭn ñu pô klei hưn êlâo hlăm Klei Aê Diê Blŭ, kyuadah amâo tuôm mâo ôh sa mta klei hưn êlâo kbiă hriê mơ̆ng klei mnuih mĭn,…” (êlan 20-21). Yang Mngăt Jăk mtrŭt leh phung khua pô hưn êlâo čiăng kơ diñu blŭ leh anăn čih Klei Aê Diê Blŭ. “Mtrŭt: jing “mtrŭt, ba mbĭt”, msĕ si čhiăm kŭm păn mâo angĭn thut puh đung. Phung khua pô hưn êlâo čih Klei Aê Diê Blŭ , ƀiădah diñu jing msĕ si pô mđĭ čhiăm kŭm păn, mran đung nao kyua angĭn thut. Yang Mngăt Jăk pô brei leh Klei Aê Diê Blŭ; kyuanăn, Yang Mngăt Jăk pô ăt jing Pô đru kơ phung dlăng, phung hmư̆ Klei Aê Diê Blŭ hlăm djăp ênuk mâo leh klei hriăm Aê Diê čiăng mtô kơ grăp čô mnuih. Amâo mâo sa čô dưi mblang Klei Aê Diê Blŭ tui si klei ñu pô mĭn jing djŏ ôh.
Klei Aê Diê Blŭ mơ̆ng Yang Mngăt Jăk mtrŭt phung khua pô hưn êlâo čih, snăn brei drei đăo knang kluôm dhuôm klei Ñu blŭ hlăm Klei Aê Diê Blŭ. Drei lŏ mâo klei mđĭ ai mâo thiăm klei khăp čiăng ksiêm dlăng, tui hriăm Klei Aê Diê Blŭ. Tơdah ksiêm dlăng Klei Aê Diê Blŭ, brei drei mâo klei luă gŭ, pŏk ai tiê akâo kơ Yang Mngăt Jăk ktrâo atăt leh anăn bi mlih klei hdĭp drei čiăng jing mnuih Aê Diê čiăng. Akâo kơ Ih brei kơ drei gĭr, hur har tui hriăm Klei Aê Diê Blŭ, čiăng kơ Klei Aê Diê Blŭ mtrang kơ jơ̆ng drei hlăm klei hdĭp amâo mâo wơr êlan ôh. Akâo bĕ kơ Yang Mngăt Jăk mtrang čiăng kơ drei amâo mâo thâo săng čhuai ôh Klei Aê Diê Blŭ. Leh anăn boh nik, brei drei gưt kơ Yang Mngăt Jăk tơdah Ñu mñă, ƀuah mkra, čiăng kơ klei hdĭp drei tui hlue Khua Yang ba klei tŭ dưn kơ Ñu leh anăn kơ pô mkăn.
Ya klei brei ƀuh drei dôk knang kơ Yang Mngăt Jăk tơdah hriăm Klei Aê Diê Blŭ?
Wah lač: Ơ Khua Yang, akâo mni lač jăk kơ Ih kyua mâo Klei Aê Diê Blŭ jing klei Yang Mngăt jăk mtrŭt. Akâo kơ Ih mñă čiăng kơ kâo thâo Klei Aê Diê Blŭ jing phŭn kơ klei thâo mĭn, pui kđen kơ klei hdĭp kâo. Akâo kơ Ih đru kâo gưt kơ klei mtô, ƀuah mkra mơ̆ng Yang Mngăt Jăk tơdah hriăm Klei Aê Diê Blŭ. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
