Pajlug 19:2-3
Nqe cim.
“Muaj ibtxhia raug kev puastsuaj vim lawv tej haujlwm ruam thiab lawv liam txim rau tus Tswv.” (Pajlug 19:3).
Lus nug rau sawvdaws xav:
- Vajntxwv Xalumoos qhia licas txog tus neeg siab kub thiab tus neeg ruam?
- Tus neeg ruam xav licas thaum ua txhaum?
- Peb yuav tsum ua dabtsi thiaj ua tau lub neej raws li Vajtswv Txojlus qhia
thiab yuav tsum ua licas thaum ua txhaum rau tus Tswv?
Nyob hauv ob nqe Pajlug 19:2-3, Vajntxwv Xalumoos qhia menyuam pom txog tus neeg siab kub thiab tus neeg ruam lub neej kom tej menyuam ua tau neeg ntse. Lo lus “tus neeg siab kub” nyob hauv nqe 2 hais txog kev ua tshwm ntawm tus neeg “ruam” hauv nqe 3. Tus neeg ntse yog tus uas paub hwm tus Tswv, vim “Tus uas hwm tus Tswv, tus ntawd thiaj yog tus uas muaj kev txawj ntse. Cov neeg ruam nyiam thuam lub tswvyim thiab tsis kawm txuj kawm ci” (Pajlug 1:7). Tiamsis, tus neeg ruam tawmtsam tus Tswv txojkev thiab tej lus qhia. Thaum kawg tej uas tus neeg ruam ua yuav ua rau nws raug teebmeem thiab ua txhaum vim tsis ua siab ntev, xav ua kom sai sai thiab tsis xyuamxim hauv lub neej. Tshaj qhov ntawd, tus neeg ruam ua “tej haujlwm ruam” yog tej uas ua rau tus kheej raug puastsuaj. Thaum saib tsis taus tus Tswv tej kevcai thiab tej lus qhia, ces tus neeg phem yuav ua tsis tau lub neej raws tus Tswv siab nyiam. Lawv lub neej ua phem thawb ntiag lawv mus qaug rau kev txhaum, lawv yuav raug Vajtswv rau txim (Pajlug 11:31; 14:22). Tiamsis qhov phem tshaj yog thaum lawv ua txhaum thiab raug txiavtxim lawm, los lawv yeej tsis kam lees txim rau tus Tswv, lawv tseem liamtxim rau Nws. Tus neeg ruam tej kev tawv ncauj tsis yog tsuas ua rau tus kheej lub neej tiam no raug teebmeem xwb, nws tseem yuav raug txiav txim pov mus rau hauv ntuj tawg ibtxhis thiab.
Vajtswv pub Vajluskub rau tibneeg ua tus taw kev rau lub neej, taw qhia txhua tus ntseeg paub ua neeg ntse kom tau txais koob hmoov. Yog li ntawd, thov tus Tswv pab peb txhua tus nyiam kawm Vajtswv Txojlus, paub tswj tus kheej hauv kev kawm thiab ua raws li Vajtswv Txojlus qhia. Nrog rau qhov ntawd, yuav tsum vamkhom Vaj Ntsujplig qhuab qhia, qhuab ntuas, thiab pab peb tawmtsam yeej tej kev ntshaw sab nqaij tawv, coj peb taug txojkev ncaj ncees (Kalatias 5:16-18). Thaum ua txhaum, peb yuav tsum thov Vaj Ntsujplig qhia peb zeem paub kev txhaum, paub lees txim rau tus Tswv thiab rov qab los taug Nws txojkev. Vajtswv Txojlus qhuab ntuas thiab kuj ceebtoom rau tus Tswv cov menyuam hais tias: “Yog li ntawd, nej yuav tsum nco ntsoov tej uas nej hnov thiab nej kawm los lawm. Nej yuav tsum coj raws li tej ntawd thiab tso plhuav nej tej kev txhaum tseg. Yog nej tsis tsim dheev los Kuv yuav los saib nej ib yam li tus tub sab tuaj; nej yuav tsis paub lub sijhawm uas Kuv los” (Tshwmsim 3:3). Thaum ua txhaum yuav tsum lees txim rau tus Tswv. Tsis txhob liam txim rau tus Tswv ib zaug li, thiab kuj txhob ua plam lub sijhawm rov qab los taug txojkev ncaj thiaj yuav tsis raug txiav txim ibtxhis.
Thov Vajtswv,
Tus Tswv, nyuam yaus ua Koj tsaug vim Koj pub Txojlus rau nyuam yaus.Ua tsaug vim Koj zam nyuam yaus tej kev txhaum thaum nyuam yaus lees txim. Koj pab nyuam yaus ua tau lub neej raws Koj siab nyiam thiab qhia nyuam yaus zeem paub kev txhaum rov los cuag Koj. Amees.
Peb yuav lees txim tamsim, lossis yuav liam txim rau tus Tswv thaum Nws rau txim rau peb?
Nyeem Vajluskub hauv peb lub xyoos: Exekees 6:1-7:9
Kênh Youtube BHKTHN:
