Klei Aê Diê Blŭ: Y-Yôsuê 8:1-2
Êlan kliăng: “Yêhôwa lač kơ Y-Yôsuê, “Đăm huĭ amâodah êdu ai ôh. Mă mbĭt hŏng ih jih jang phung mnuih bi blah, leh anăn kgŭ bĕ, đĭ nao kơ ƀuôn Ahi. Nĕ anei, kâo jao leh hlăm kngan ih mtao ƀuôn Ahi leh anăn phung ƀuôn sang ñu, ƀuôn, leh anăn čar ñu” (Y-Yôsuê 8:1)
Klei êmuh ksiêm mĭn: Ya ngă Aê Diê lač kơ Y-Yôsuê “Đăm huĭ amâodah êdu ai ôh”? Tơdah mâo mă leh ƀuôn Ahi tui si klei Aê Diê ƀuăn, ya klei phung ƀuôn sang Aê Diê ngă leh anăn ya klei diñu dưi ngă? Ya klei brei drei ngă tơdah mrâo găn klei amâo tŭ jing?
Leh phung ƀuôn sang Israel gưt asăp Aê Diê bi mtlaih klei rŭng răng kyua klei soh, Aê Diê čiăng kơ diñu kgŭ leh anăn lŏ dơ̆ng nao mŭt mă ƀuôn Ahi. Êlâo dih, kyua klei soh Y-Akan, pô tlĕ leh mnơ̆ng năng brei kơ Aê Diê leh diñu mâo mă ƀuôn Yêrikô, snăn phung Israel bi blah amâo dưi ôh. Năng ai ară anei diñu ăt dôk rŭng răng, huĭ hyưt. Diñu rŭng răng si srăng ngă čiăng thâo sĭt amâo lŏ mâo ôh klei soh mdăp ti krah phung ƀuôn sang. Năng ai diñu huĭ srăng lŏ tuôm hŏng klei amâo dưi bi blah. Năng ai diñu đing klei thâo gĭt gai mơ̆ng Y-Yôsuê kyua êlâo dih diñu mưng leh hŏng klei Y-Môis gĭt gai… Hlăm boh klei anăn, Aê Diê lač hŏng Y-Yôsuê: “Đăm huĭ amâodah êdu ai ôh”. Ñu čiăng kơ Y-Yôsuê leh anăn phung ƀuôn sang amâo dưi lui ôh, ƀiădah srăng kgŭ mơ̆ng klei amâo dưi kyua adôk bruă klam prŏng ti anăp. Ară anei, tơdah klei soh ti krah phung ƀuôn sang dưi msir mghaih leh, klei bi mguôp plah wah Aê Diê leh anăn diñu dưi lŏ bi mrâo, Ñu lŏ dôk mbĭt leh anăn brei klei jăk kơ diñu. Aê Diê ƀuăn Ñu jao leh Mtao Ahi, phung ƀuôn sang hlăm ƀuôn leh anăn jih krĭng ala čar digơ̆ hlăm kngan Y-Yôsuê. Phung ƀuôn sang Israel ăt srăng bi rai ƀuôn anei msĕ si diñu bi rai leh ƀuôn Yêrikô.
Êlâo dih, tơdah diñu mă ƀuôn Yêrikô, ƀuôn tal êlâo diñu mă hlăm krĭng ala čar Aê Diê ƀuăn, phung ƀuôn sang bi rai hĕ jih mnơ̆ng plah mă msĕ si boh mnga tal êlâo mơ̆ng čar anăn myơr kơ Aê Diê (Klei Mtô Mñă Klei Bhiăn 26:1-4). Ară anei, Aê Diê brei diñu dưi mă mnơ̆ng plah mă leh anăn hlô mnơ̆ng ƀuôn Ahi tơdah diñu mă ƀuôn anei, msĕ si êlâo dih diñu tuôm brei leh klei dưi ngă snăn (Klei Mtô Mñă Klei Bhiăn 2:35; 3:7). Tơdah Y-Akan dôk guôn tơl Aê Diê brei dưi ngă snăn ñu leh anăn gŏ sang ñu amâo srăng tŭ klei djiê ôh!
Sĭt nik grăp čô hlăm phung drei tuôm leh hŏng klei amâo mâo dưi hlăm klei hdĭp. Ƀiădah wăt tơdah si klei anăn truh êgao leh, đăm êdu ai ôh. Brei drei kgŭ leh anăn lŏ nao phă anăp. Brei Klei Aê Diê Blŭ bi mđĭ ai bi hrô kơ brei klei lĕ anăn ngă kơ drei lui hĕ. Msĕ si phung ƀuôn sang Israel, tơdah mâo Aê Diê dôk mbĭt hŏng diñu, diñu amâo lŏ huĭ kơ ya mta klei ôh. Tơdah leh drei mghaih msir leh klei soh hlăm klei hdĭp, leh anăn mâo Aê Diê dôk mbĭt, snăn lui hĕ jih klei êdu ai, klei rŭng răng, čiăng êbat nao tui hlue Aê Diê leh anăn mă bruă kơ Ñu. Khua Yang brei klei amâo mâo tŭ jing truh, snăn Ñu ăt srăng brei klei tŭ jing truh djŏ mmông Ñu tơdah drei gưt asăp kluôm dhuôm. Klei amâo tŭ jing amâo huĭ ôh, knŏng huĭ kơ klei amâo tŭ jing ƀiădah amâo mâo djăp klei đăo čiăng lŏ kgŭ nao phă anăp.
Ya klei rŭng răng, êdu ai dôk hmăi kơ hdră drei tui hlue leh anăn mă bruă kơ Aê Diê?
Wah lač: Ơ Khua Yang, akâo kơ Ih brei kâo thâo đăo knang kơ Ih leh anăn Klei Aê Diê Blŭ čiăng kgŭ mơ̆ng klei amâo tŭ jing pô. Akâo kơ Ih đru kâo lŏ dơ̆ng êbat hŏng ai tiê đăo sĭt Ih srăng brei kơ kâo klei dưi leh anăn tŭ jing hlue si wưng Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
