Pajlug 28:3
Nqe cim:
“Tus muaj hwjchim uas tsimtxom cov neeg pluag zoo ib yam li kob tuamtsam nag uas los ntaus tej qoobloo tuag tas” (Pajlug 28:3)
Lus nug xav:
– Tus duab kob tuamtsam nag uas los ntaus tej qoobloo tuag tas qhia tawm yam dabtsi hauv nqe pajlug no?
– Vajntxwv Ahaj lub neej zoo ib yam li kob cua daj cua dub uas los rhuav tshem, zoo li cas?
– Peb siv qhov tseeb no rau hauv peb lub neej li cas?
Nqe pajlug hnub no qhia tawm ib tug duab uas muaj zog heev, zoo li kob cua daj cua dub. Feem ntau tibneeg siv daim duab nag los piv txog txoj koob hmoov, vim dej nag pab ua kom av noo, ywg thiab ua rau tej qoob loo, nroj tsuag muaj sia, loj hlob. Tiamsis yog nag los hlob dhau heev lossis muaj cua daj cua dub, ces nws yuav “ntaus tej qoobloo tuag tas”, ua rau muaj kev puastsuaj. Ib yam li ntawd, tus thawjcoj uas tsim txom cov neeg txomnyem thiab cov neeg uas tsis muaj zog ces coj tsis tau kev ncaj ncees thiab koob hmoov los rau cov neeg txomnyem tiamsis tsuas ua rau lawv raug mob thiab puastsuaj xwb.
Vajntxwv Ahaj lub neej qhia meej txog nujnqi uas nws tsim txom cov neeg pluag thiab cov tsis muaj zog. Vajntxwv Ahaj xav tau Nanpaus lub vaj txiv hmab, nws thiaj npaj tua Nanpaus los ntawm kev tsis ncaj ncees. Vim li ntawd, Vajtswv thiaj txiav txim rau nws los ntawm tus cev Vajtswv lus Eliyas. Thaum kawg, Vajntxwv Ahaj tuag hauv kev ua rog, thiab dev los yaim nws cov ntshav ntawm qhov chaw uas nws tua Nanpaus (saib 1 Vajntxwv 21:19; 22:38).
Tom qab ntawd, nws cajceg raug rhuav puastsuaj tag, thiab poj vajntxwv Yexenpees kuj tuag txaus ntshai heev raws nraim li Vajtswv Txojlus tau hais tseg. Vajtswv yeej ib txwm mob siab tshwjxeeb rau cov neeg pluag, cov tsis muaj zog thiab cov uas tsis muaj txaus siv. Vajtswv muab txoj haujlwm ua thawj coj rau tibneeg, tsis hais hauv zej zos, hauv Pawg Ntseeg, tsev neeg yog los tiv thaiv thiab txhawb nqa lwm tus, tsis yog cia quab yuam lwm tus. Thaum cov neeg uas muaj hwjchim lam tau lam siv hwjchim los ua kom muaj nqis rau tus kheej, ces lawv yuav dhau los zoo li kob cua daj cua dub uas rhuav tshem, tsis yog txhim kho thiab txhawb nqa lwm tus.
“Tus neeg pluag uas quab yuam cov pluag zoo yam nkaus li pluav nag uas hlob kawg ua rau qoob loo piam tag.” (nqe 3 HMOWSV). Qhov tseeb no kuj siv rau peb txhua tus, txawm yog nyob rau lub meejmom twg, tagnrho peb txhua tus puavleej yog cov “neeg pluag” ntawm Vajtswv xubntiag. Vim “Thaum peb niam peb txiv yug peb los, peb yeej tsis coj ib yam dabtsi los. Thaum peb tuag peb yeej yuav coj tsis tau ib yam dabtsi mus thiab” (1 Timautes 6:7). Txhua yam uas peb muaj puavleej yog Vajtswv pub xwb. Txhua txoj koob hmoov uas peb tau txais puavleej yog los ntawm Vajtswv kev hlub tshua xwb. Vajtswv tso peb ib leeg ib lub chaw sib txawv, tiamsis ntawm Vajtswv xubntiag peb puavleej yog neeg “pluag” thiab “txomnyem” ib yam nkaus. Vim li ntawd peb yuav tsum coj ncaj ncees raws li Vajtswv txoj kev ncaj ncees, qhia tshwm lub siab hlub tshua, ncaj ncees thiab kev hlub. Dhau los ntawm Tswv Yexus, peb pom Nws tus qauv uas zoo kawg nkaus tsis quab yuam cov neeg txomnyem, tiamsis nws txo hwjchim “los tu sawvdaws thiab muab nws txojsia los txhiv ntau leej” (Malakaus 10:45). Thov Vajtswv pab kom peb ua neej nyob nrog lwm tus raws li Tswv Yexus tus qauv, sib hlub, tu sawvdaws, tsis txhob sib quabyuam.
Thov Vajtswv,
Vaj Leej Txiv Saum Ntuj Ceeb Tsheej, tus Vajtswv uas ncaj ncees thiab muaj kev hlub tshua, thov pab nyuam yaus txhob siv lub hwjchim los quab yuam cov neeg txomnyem, tiamsis cia nyuam yaus paub hmov tshua lwm tus thiab pab cov neeg uas tabtom xav tau kev pab. Nyuam yaus tuav Tswv Yexus Khetos lub npe thov, Amees.
Peb coj li cas rau cov neeg pluag thiab txomnyem?
Nyeem Vajluskub hauv peb lub xyoos: Yauj 22
Kênh Youtube BHKTHN:
