II Pêtrôs 1:19-21
“Yua kơ dôm tơdrong lu sư khan lê̆ hơdrol noh, ưh kơ đei lĕch đơ̆ng kon bơngai ôh. ‘Bok Kei-Dei yua ‘bơ̆r kon bơngai đĕch na bơ̆n lăng thoi ‘bơ̆r kon bơngai. Mă tơpă đơ̆ng Yang Bơhngol ‘Lơ̆ng bơtho tơbăt kơ lu sư.” (II Pêtrôs 1:21)
Nơ̆r jet tơchĕng pơwao:
– Tơdrong kiơ pơm kơ lu jơ̆ng ‘bang Sư rai lui kơ nơ̆r lu ‘bok khan lê̆ hơdrol Pah So noh sĭt tơpă?
– Sư wă tơ’blŏk kơ kon pơlei Kră Yang tơdrong kiơ kơplah sư pơma “Yang Bơhngol ‘Lơ̆ng bơ̆jang”?
– Bơ̆n đei tơdrong pơtrŭt đơ̆ng Yang Bơhngol ‘Lơ̆ng tơgŭm bơ̆n hŏk Pơhrăm Nơ̆r Kră Yang thoi yơ?
‘Bok Pêtrôs bơtho gah Kră Yang Yêsu jơ̆ ‘Bok mă măt sư đêl mơn ‘bôh tơdrong rŏ sor Sư đei tơwir akâu Sư tơpal kông (II Pêtrôs 1:16-18). Tơdrong noh jơ̆ tơ’bôh pơsĭt trŏ kơ lui gơnang na pơm kơ lu jơ̆ng ‘bang rai lui tơpă kơ nơ̆r lu ‘bok khan lê̆ hơdrol đei khan lê̆ hơdrol gah tơdrong Kră Yang Yêsu wă jur dơ̆ng noh sĭt tơpă. Kư̆m thoi noh, ‘Bok Pêtrôs wă kơ băt sĭt tơdrong noh wă tơ’blŏk kơ lu bơngai lui nai dơ̆ng, “ iĕm athei ‘blŏk hơdơ̆r kơ tơdrong lu sư khan lê̆ hơdrol noh ling-lang, yua kơ tơdrong noh thoi lĕ kơ ŭnh pơchrang hơdah prăt măng truh pơgê…” (trong 19). Kon pơlei Kră Yang dang ei kư̆m đei tơ’blŏk thoi noh mơ̆n, kơplah oei răp gô năr Kră Yang wă jur dơ̆ng, athei kăl kơ đŏk, hŏk pơhrăm, tơchĕng pơwao păng pơm kiơ̆ thoi Sơ̆p Hla ar ‘Bok Kei-Dei bơtho tơ’bôh thoi ŭnh tơ̆k ăn trong, tơgŭm Khul Bơngai lui yak năm oei kơjăp, kĕ jei tơdrong yoch păng tơdrong lôch. Dôm tơdrong jang gô đei tơ’bôh kơplah “ kơ ‘năr gô ‘bôh nhen”, wă khan kơplah Kră Yang Yêsu jur dơ̆ng đơ̆ng plĕnh ti.
‘Bok Pêtrôs pơma khan: “Dôm tơdrong lu ‘bok noh khan lê̆ hơdrol lăm sơ̆p hla bơar ‘Bok Kei-Dei, lu sư ưh kơđei pơma ư kơ kiơ̆ akâu sư kơdih ôh. Yua kơ dôm tơdrong lu sư khan lê̆ hơdrol noh ưh kơ đei lĕch đơ̆ng kon bơngai ôh…” (trong 20-21). Yang Bơhngol ‘Lơ̆ng đei bơ̆ jang bơtho tơ’bôh kơ lu ‘bok khan lê̆ hơdrol wă kơ lu sư chih tơlĕch Nơ̆r Kră Yang ‘Bok Kei-Dei. “Bơ̆jang” đei wă khan “pơdrŭt, chĕp ba” nhen thoi pơnăr thŏng nan mơ̆ng kơ kial thu bơbơ̆t. Lu ‘bok khan lê̆ hơdrol đei chih Sơ̆p Hla bơar ‘Bok Kei-Dei, lu sư nhen thoi bơngai chĕp pơnăr thŏng nan, thong nan nơnăm ‘noh yua kơ kial thu tŭn. Yang Bơhngol ‘Lơ̆ng ăn. Nơ̆r Sư kơ bơ̆n; yua thoi noh, tơm sư Yang Bơhngol ‘Lơ̆ng tơgŭm lu bơngai đŏk, mơ̆ng. Nơ̆r Kră Yang lăm rim jơhnơr dôm tơdrong bơ̆n đei pơhrăm, Kră Yang wă bơtho rim ‘nu bơngai. Ưh kơ đei minh ‘nu bu lăm lu bơ̆n gơh tơblang nơ̆r ‘Bok Kei-Dei kiơ̆ kơ bơ̆n kơdih khan trŏ.
Nơ̆r Kră Yang đơ̆ng Yang Bơhngol ‘Lơ̆ng bơ̆jang bơtho kơ lu ‘bok khan lê̆ hơdrol đei chih, na lu bơ̆n tôm tơdrong lui gơnang kơ Nơ̆r Sư lăm Sơ̆p Hla bơar ‘Bok Kei-Dei. Lu bơ̆n rai đei tơdrong pơtrŭt rai ‘maih đŏk lăng, hŏk pơhrăm Nơ̆r Kră Yang. Kơplah lu bơ̆n lăng hơlen Nơ̆r Kră Yang, lu bơ̆n kăl kơ iŏk đon ala, pơih jơhngơ̆m apinh Yang Bơhngol ‘Lơ̆ng bơtho tơ’bôh păng tơplih chăl arih lu bơ̆n wă kơ jing bơngai thoi Kră Yang wă lăp đon. Apinh Kră Yang ăn kơ lu bơ̆n pơnam, adrin hŏk pơhrăm Nơ̆r Kră Yang, wă kơ Nơ̆r Kră Yang pơchrang ăn kơ jơ̆ng bơ̆n yak năm huay kơ wơ̆l jrok. Athei krao khan apinh Yang Bơhngol ‘Lơ̆ng pơchrang hơdah wă kơ lu bơ̆n huay kơ hlôh ưh kơ trŏ kơ Nơ̆r Kră Yang. Păng kăl hloh, athei chu yom Yang Bơhngol ‘Lơ̆ng kơplah Sư tơ’blŏk, chrih bơtho, bơtho pơjĭ, wă kơ tơdrong arih kiơ̆ Kră Yang ba ăn đei lơi yua kơ Kră Yang păng ba ăn kơ bơngai nai.
Ơ Kră Yang, inh bơnê kơ Ih yua kơ inh đei Nơ̆r Ih đei đơ̆ng Yang Bơhngol ‘Lơ̆ng bơ̆ jang. Apinh tơ’blŏk kơ inh wă kơ băt kơ Nơ̆r Ih jơ̆ tơm tơdrong gơh hơgei, thoi ŭnh kơđeng kơ chăl arih inh, apinh Ih tơgŭm inh chu yom tơdrong đei bơtho tơ’bôh, chrih tơbăt đơ̆ng Yang Bơhngol ‘Lơ̆ng kơplah hŏk pơhrăm Nơ̆r Ih. Yua năn Kră Yang Yêsu Krist, Amen.
Tơdrong kiơ đei tơ’bôh ăn kơ lu bơ̆n đơ̆ng Yang Bơhngol ‘Lơ̆ng kơplah bơ̆n hŏk pơhrăm Nơ̆r Kră Yang?
Đŏk Sơ̆p Hla ar ‘Bok Kei-Dei lăm pêng sơnăm: Jop 23.
Kênh Youtube BHKTHN:
