Klei Tŭ Dưn Mơ̆ng Phung Đăo – 5/3/2023

1601

 

 

Klei Aê Diê Blŭ: Y‑Mathiơ 5:13‑16

Êlan kliăng: “Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.” (Y‑Mathiơ 5:16)

Klei êmuh ksiêm mĭn: Ya dua rup Khua Yang Yêsu yua čiăng bi hmô hŏng klei hdĭp phung đăo? Si ênoh yuôm leh anăn klei tŭ dưn mơ̆ng dua rup anei hlăm klei hdĭp? Si klei tŭ dưn mơ̆ng knhuah hdĭp phung đăo drei ba kơ ƀuôn sang?

Trăn Klei Aê Diê Blŭ hruê anei mâo hlăm dŭm klei mtô ti dlông čư̆, Khua Yang Yêsu bi hmô klei hdĭp phung đăo msĕ si “hra kơ lăn” leh anăn“klei mngač kơ lăn ala” (êlan 13‑14). Anei jing dua mta phŭn yuôm leh anăn brei klei tŭ dưn prŏng snăk hlăm klei hdĭp. Hra jing sa mta mnơ̆ng bi ƀăt amâo dưi kƀah ôh hlăm klei hdĭp grăp hruê mâo hnơ̆ng tŭ dưn prŏng snăk. Hlăm ênuk Khua Yang Yêsu, tơdah lač kơ hra, arăng bi mĭn mtam kơ tlâo mta klei jing ñu snei: Tal sa, doh jăk: phung đăo msĕ si hra čiăng lač brei mâo klei hdĭp doh jăk, kiă kriê klei hdĭp pô tlaih đuĕ mơ̆ng klei čhŏ mrŏ lăn ala (Y‑Yakơ 1:27). Tal dua, răng pioh: si hra rơ̆ng kơ mnơ̆ng ƀơ̆ng huă amâo brŭ jhat msĕ snăn mơh klei hdĭp phung đăo brei răng pioh knhuah hdĭp weh đuĕ kơ klei soh, ba klei tŭ dưn kơ phung riêng gah. Tal tlâo, bi ƀăt: klei msĭn mơ̆ng hra brei klei bi ƀăt kơ mnơ̆ng ƀơ̆ng huă đăm kba čhuăr. Knhuah hdĭp phung đăo brei ba klei bi ƀăt leh anăn klei jăk siam kơ lăn ala msĕ snăn mơh.

Khua Yang Yêsu lŏ lač: Tơdah hra luč klei msĭn, hra anăn amâo lŏ yuôm ôh, knŏng tuh hwiê hĕ kơ tač (êlan 13). Tơdah knhuah hdĭp phung đăo amâo ba klei tŭ dưn ôh kơ phung riêng gah ăt kăn yuôm mơh ti anăp Khua Yang leh anăn jih jang mnuih. Khua Yang mdưm drei ti lăn ala anei čiăng kăp hưn mdah Anăn Khua Yang, ba klei tŭ dưn kơ mnuih mkăn leh anăn đru diñu lŏ wĭt hŏng Khua Yang. Kyuanăn, tơdah klei hdĭp drei amâo ba klei tŭ dưn kơ mnuih ti lăn ala ƀiădah mklăk wĭt, phung mnuih lăn ala lĕ lŏ bi hmăi kơ drei snăn jing amâo lŏ yuôm ôh ti anăp Khua Yang leh anăn tŭ klei hwiê lui hĕ yơh.

Čuê tluôn, Khua Yang Yêsu bi hmô phung đăo msĕ si “klei mngač kơ lăn ala”. Klei jing klei mngač kăp pioh mtrang. Klei hdĭp phung đăo brei mtrang klei mngač mơ̆ng adiê dlông čiăng đru mnuih mkăn thâo kral Khua Yang leh anăn wĭt kơ Ñu. Klei mngač amâo dưi pioh mdăp hĕ ôh ƀiădah brei mtrang mngač čiăng kơ mnuih mkăn thâo ƀuh leh anăn mtrang êlan kơ diñu. Klei hdĭp phung đăo msĕ snăn mơh, drei amâo dưi mdăp hĕ ôh klei drei jing anak Aê Diê, ƀiădah brei hưn mdah, mtrang mngač ti anăp mnuih mkăn hŏng bruă jăk drei ngă čiăng kơ mơ̆ng anăn yơh diñu dưi ƀuh leh anăn bi mni kơ Khua Yang drei (êlan 16). Klei mngač mâo hnơ̆ng tŭ yuôm prŏng snăk hlăm klei hdĭp kyuadah ñu mtrang leh anăn atăt êlan kơ arăng nao bi djŏ klông anăp. Phung đăo brei duh kơ knhuah hdĭp phung đăo grăp hruê kăp mtrang mngač Anăn Khua Yang kơ phung riêng gah leh anăn đru diñu duah ƀuh klei sĭt nik.

Si ngă knhuah hdĭp drei jing pui kđen mtrang klei sĭt nik kơ phung riêng gah mơ̆?

Wah lač: Ơ Khua Yang, akâo Ih đru kâo duh kơ knhuah hdĭp phung đăo čiăng kơ kâo jing hra kơ lăn leh anăn klei mngač kơ lăn ala sĭt, ba klei tŭ dưn kơ mnuih mkăn leh anăn đru diñu thâo kral Ih.

Dlăng Klei Aê Diê Blŭ hlăm tlâo thŭn: Y‑Đaniel 6:19‑7:14

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTus Ntseeg Yexus Kev Ua Neej – 5/3/2023
Bài tiếp theoẢnh Hưởng Của Cơ Đốc Nhân – 5/3/2023