Klei Aê Diê Blŭ: Y‑Mathiơ 13:47-52
Êlan kliăng: “Dŏng bĕ phung arăng atăt kơ klei djiê, bi mtlaih bĕ phung nao kơ anôk arăng bi mdjiê” (Klei Bi Hriêng 24:11)
Klei êmuh ksiêm mĭn: Ya rup Khua Yang Yêsu mtô kơ klei phat kđi mơ̆ng Ƀuôn Ala Mtao Adiê? Ya klei Khua Yang čiăng kơ phung ƀĭng kna Ñu ngă hlăk anăn? Si diih ngă tơdah thâo hruê Khua Yang phat kđi giăm truh leh?
Khua Yang Yêsu lŏ dơ̆ng mtô kơ Ƀuôn Ala Mtao Adiê msĕ si sa čô mnuih trah jal mă kan, tơdah trah jal ƀuh bŏ kan snăn ktŭng ti hang jih jang mnơ̆ng hlăm jal, leh anăn srăng ruah mă kan jăk, bi phung kan jhat hŏng djah djâo srăng hwiê hĕ. Klei bi hmô anei msĕ si klei bi hmô kơ mdiê ƀlê leh anăn rơ̆k jhat ƀiădah Khua Yang Yêsu čiăng mñă hĭn kơ hruê knhal tuč leh anăn klei truh kơ phung amâo jing mnuih hlăm Ƀuôn Ala Mtao Adiê hlăm hruê phat kđi. Khua Yang čiăng kơ drei thâo amâo mâo ôh klei pô dưi lui hĕ hlăm hruê phat kđi, msĕ si sa blah jal kan prŏng snăk mâo mă jih jang hlăm lam, dĭng buăl jăk Aê Diê srăng mbha phung ƀai hŏng phung kpă ênô, bi phung ƀai dĭng buăl jăk Aê Diê srăng dlăm hlăm kpur pui prŏng mâo klei čŏk hia leh anăn kriêt êgei.
Khua Yang Yêsu yăl dliê klei bi hmô anei amâo djŏ čang hmăng kơ phung ƀĭng kna Ñu hơ̆k mơak kyua thâo kơ phung ƀai srăng tŭ klei phat kđi kjham snăk leh anăn amâo mâo ôh hlei pô dưi tlaih, ƀiădah Khua Yang čiăng kơ phung ƀĭng kna Ñu ngă bruă. Tơdah Khua Yang êmuh “Diih thâo săng leh mơ̆ jih klei anăn? Digơ̆ lač kơ Ñu, “Ơ, thâo săng mơh” (êlan 51). Khua Yang Yêsu čiăng kơ phung ƀĭng kna klă sĭt thâo kơ klei yuôm bhăn mơ̆ng Ƀuôn Ala Mtao Adiê kyua tơdah thâo săng leh, diñu srăng ngă msĕ si klei Ñu čiăng. Boh blŭ “khua čih hră” lač kơ klei čih leh anăn mtô bi hriăm klei bhiăn kơ mnuih ƀuôn sang, Khua Yang iêô phung ƀĭng kna jing “grăp čô khua čih hră arăng bi hriăm leh pioh kơ ƀuôn ala mtao adiê” (êlan 52), diñu srăng msĕ si pô sang adih amâo mdăp ôh mnơ̆ng yuôm pô ƀiădah ba mdah kơ grăp čô mnuih thâo leh anăn dlăng. Khua Yang Yêsu čiăng kơ phung ƀĭng kna Ñu jing phung hiu hưn kơ Ƀuôn Ala Mtao Adiê kơ lu mnuih thâo, kmhal klei soh, đăo kơ Khua Yang leh anăn mâo klei bi mtlaih. Klei diñu čiăng hưn kơ lăn ala anei jing ênoh yuôm mơ̆ng Ƀuôn Ala Mtao adiê, hnơ̆ng mơ̆ng Ƀuôn Ala Mtao Adiê, hnơ̆ng čuăn čiăng jing mnuih hlăm Ƀuôn Ala Mtao Adiê, leh anăn klei phat kđi huĭ hyưt kơ phung amâo jing mnuih hlăm Ƀuôn Ala Mtao Adiê.
Phung ƀuôn sang Aê Diê hruê anei brei klă sĭt thâo săng Klei Aê Diê Blŭ leh anăn thâo săng klei Ñu čiăng, Ñu “…amâo čiăng ôh sa čô srăng rai luč, ƀiădah čiăng kơ jih jang srăng truh kơ klei kmhal kơ klei soh” (II Y‑Pêtrôs 3:9), kyua anăn Khua Yang dưm Sang Aê Diê ti krah lăn ala čiăng đru kơ lăn ala thâo kơ Khua Yang. Phung đăo jing “grăp čô khua čih hră arăng bi hriăm leh pioh kơ ƀuôn ala mtao adiê” čiăng hưn kơ phung mkăn thâo kơ Ƀuôn Ala Mtao Adiê čiăng kơ lu mnuih tlaih mơ̆ng klei phat kđi hlăm hruê knhal tuč.
Drei lač mơ̆ kơ phung riêng gah kơ Khua Yang Yêsu leh anăn Ƀuôn Ala Mtao Adiê?
Wah lač: Ơ Khua Yang, kâo thâo hruê Ih lŏ hriê giăm leh, akâo kơ Ih đru kâo hur har hưn Khua Yang kơ phung riêng gah čiăng kơ diñu tlaih mơ̆ng klei phat kđi hlăm hruê knhal tuč leh anăn dưi tlaih.
Dlăng Klei Aê Diê Blŭ hlăm tlâo thŭn: Y‑Yôhan 5:1-30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
