Mathais 13:47-52
Nqe cim:
“Tsis txhob ua xyem xyav, cia li pab tus neeg tsis muaj txim txhaum uas luag yuav coj mus tua povtseg” (Pajlug 24:11).
Lus nug rau sawvdaws xav:
– Tswv Yexus hais txog kev txiav txim saum ntuj Ceebtsheej dhau ntawm daim duab twg?
– Tus Tswv xav kom Nws cov thwjtim yuav tsum ua licas rau lub sijhawm ntawd?
– Koj yuav ua dabtsi thaum paub hais tias tus Tswv hnub txiav txim los yuav txog?
Tswv Yexus rov qhia ntxiv txog Ntuj Ceebtsheej zoo li ib lub vas cuab ntses, thaum tso lub vas ib pliag pom hais tias mag ntses ntau ces rub tawm, coj txhua yam ntses uas mag hauv lub vas tawm saum nqhuab, tomqab ntawd zaum xaiv cov ntses uas zoo, tshuav cov ntses tsis zoo thiab tej liamsim raug muab povtseg. Zaj lus pivtxwv no kuj zoo ib yam li zaj lus pivtxwv hais txog nplej thiab txhauv, tiamsis Tswv Yexus xav hais hnyav dua txog hnub uas ntiajteb kawg thiab qhov xaus txaus ntshai ntawm cov neeg uas tsis yog Ntuj Ceebtsheej tug thaum hnub txiav txim. Tus Tswv xav qhia rau peb paub hais tias tsis muaj leejtwg tau tshwjtawm nyob hauv hnub txiav txim, zoo li lub vas loj loj uas mag tau txhua yam ntses rau hauv, tej timtswv yuav cais tus neeg phem tawm ntawm cov neeg zoo, cov neeg phem yuav raug pov rau hauv lub cubtawg uas muaj kev quaj qw tom hniav qees.
Tswv Yexus piav zaj lus pivtxwv no tsis yog qhia kom Nws cov thwjtim thiab peb zoo siab npuaj teg thaum paub hais tias cov neeg phem yuav raug txiav txim hnyav thiab tsis dim dhau, tiamsis tus Tswv xav kom Nws cov thwjtim yuav tsum ua haujlwm. Thaum tus Tswv nug hais tias: “Nej puas totaub tej no? Lawv teb hais tias: Peb totaub lawm” (nqe 51). Ntawd yog Tswv Yexus xav kom Nws cov thwjtim yuav tsum paub tseeb lub ntsiab txaus nkaus ntawm Ntuj Ceebtsheej, vim thaum totaub lawm, lawv thiaj yuav ua haujlwm li Nws lub siabnyiam. Lo lus “tus xibhwb uas qhia Vajtswv txoj Kevcai” yog hais txog tus neeg muab sau thiab qhia txoj kevcai rau cov pejxeem, tus Tswv muab cov thwjtim hu ua “tus xibhwb uas qhia Vajtswv txoj Kevcai uas twb kawm paub txog Ntuj Ceebtsheej lawm” (nqe 52), lawv yuav zoo li tus tswv tsev uas tsis zais tej khoom muaj nqis rau hauv txhab tiamsis muab tawm los rau sawvdaws paub thiab pom. Tswv Yexus xav kom Nws cov thwjtim tshajtawm txog Ntuj Ceebtsheej rau lwm tus paub, kom lawv lees kev txhaum, ntseeg Tswv Yexus thiab tau txais kev cawmdim. Yam uas lawv yuav tsum qhia rau neeg ntiajteb yog qhia txog qhov muaj nqis ntawm Ntuj Ceebtsheej, cej ciam ntawm Ntuj Ceebtsheej, tus cai kom tau ua pejxeem nyob saum Ntuj Ceebtsheej, thiab kev txiav txim txaus ntshai rau cov uas tsis muaj feem nyob saum Ntuj Ceebtsheej.
Vajtswv cov menyuam tiam no yuav tsum paub tseeb Vajtswv Txojlus thiab totaub Vajtswv lub siabnyiam, Nws “…tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg” (II Petus 3:9), vim li ntawd tus Tswv thiaj cia Pawg Ntseeg nyob hauv lub ntiajteb kom pab lub ntiajteb paub txog Nws. Cov ntseeg yog “tus xibhwb uas qhia Vajtswv txoj Kevcai uas twb kawm paub txog Ntuj Ceebtsheej lawm” yuav qhia rau lwm tus paub txog Ntuj Ceebtsheej kom coob leej khiav dim kev txiav txim nyob rau hnub kawg.
Thov Vajtswv
Tus Tswv, nyuam yaus paub hais tias hnub Koj rov los twb los ze lawm, thov pub rau nyuam yaus kub siab lug qhia txog Koj rau lwm tus ibncig kom lawv khiav dim txojkev txiav txim thaum kawg thiab tau cawmdim. Amees.
Peb puas qhia cov neeg ibncig txog Tswv Yexus thiab Ntuj Ceebtsheej lawm tau?
Nyeem Vajluskub hauv peb lub xyoos: Yauhas 5:1-30
Kênh Youtube BHKTHN:
