Klei Aê Diê Blŭ: Rôm 15:14-22
Êlan kliăng: “Snăn klei kâo čiăng jing klei hưn klei mrâo mrang jăk, amâo djŏ ôh ti anôk arăng hưn leh anăn Krist, huĭdah kâo mdơ̆ng ti dlông atur sa čô mkăn” (Rôm 15:20)
Klei êmuh ksiêm mĭn: Ya klei mĭn Khua ƀĭng kna Y-Pôl čiăng bi êdah kơ Phung Sang Aê Diê ti ƀuôn Rôm? Ya klei drei mă yua mơ̆ng klei hriăm anei?
Khua ƀĭng kna Y-Pôl čih mơĭt klei kkuh čhưn kơ phung đăo ti ƀuôn Rôm leh anăn yăl dliê kơ bruă Aê Diê jao brei ñu nao hưn Klei Mrâo Mrang Jăk kơ phung tue.
Êlâo hĭn, Khua ƀĭng kna Y-Pôl bi mni kơ klei jăk, klei thâo mĭn leh anăn klei dưi bi hriăm hdơ̆ng digơ̆ (êlan 14). Hŏng klei kmah, phung đăo ti ƀuôn Rôm đru leh phung mâo klei dleh dlan. Digơ̆ hur har hriăm Klei Aê Diê Blŭ leh anăn ngă klei digơ̆ hriăm leh.
Tal dua, ñu čiăng mblang ya ngă djŏ kơ đa đa klei ñu jhŏng čih hŏng klei klă, huĭdah mâo pô srăng ênguôt (êlan 15). Ñu mblang ñu knŏng čiăng lŏ bi hdơr kơ digơ̆ ya klei Khua Yang mtă leh.
Tal tlâo, ñu brei thâo Aê Diê mjing leh ñu khua ngă yang hlăm bruă hưn Klei Mrâo Mrang Jăk Aê Diê, mtô Klei Mrâo Mrang Jăk kơ phung tue, leh anăn mnơ̆ng myơr ñu myơr kơ Aê Diê jing Phung Sang Aê Diê phung tue ñu mkŏ mjing leh. Ñu mâo klei găl bi mni kơ bruă ñu ngă leh hlăm Yêsu Krist (êlan 17), ƀiădah mơ̆ng klei mblang anăn, drei thâo ñu knŏng bi mni kơ bruă Aê Diê ngă leh hlăm ñu. Ñu amâo jhŏng blŭ sa mta klei mkăn ôh êngao kơ klei Khua Yang brei ñu blŭ, boh kơ klei anăn jing phung tue gưt leh asăp kơ Aê Diê (êlan 18). Hŏng klei bi knăl yuôm leh anăn hŏng klei myang Yang Mngăt Jăk yơh ñu mtô ênŭm leh Klei Mrâo Mrang Jăk mơ̆ng ƀuôn Yêrusalem leh anăn kbưi tơl truh kơ čar Iliri, jing sa boh čar hlăm ƀuôn ala mtao Rôm ti nah dưr čar Masêdôn. Jih jang jing bruă Aê Diê ngă sơăi! Ƀiădah drei mâo klei hriăm yuôm mơ̆ng Khua ƀĭng kna Y-Pôl hlăm klei gưt asăp kơ Aê Diê, ñu mtô djŏ ya klei Aê Diê čiăng ñu mtô, hdĭp hŏng klei đăo ti krah phung amâo đăo ôh hŏng klei blŭ leh anăn klei ngă. Yang Mngăt Jăk brei bruă ñu ngă mâo boh tŭ dưn jăk snăk (êlan 18-19).
Tal pă, klei ñu čiăng jing hưn Klei Mrâo Mrang Jăk ti anôk arăng ka hưn ôh Anăn Krist (êlan 20). Anei jing klei Aê Diê čiăng, tui si Klei Aê Diê Blŭ čih leh, “Phung ka tuôm hmư̆ klei Ñu ôh srăng ƀuh, leh anăn phung ka tuôm hmư̆ klei Ñu ôh srăng thâo săng” (êlan 21; Y-Êsai 52:15). Mơ̆ng hruê Khua Yang Yêsu iêô, Khua ƀĭng kna ksŭng drŭng hưn Klei Mrâo Mrang Jăk, kyuanăn yơh mâo lu blư̆ ñu čiăng nao čuă Phung Sang Aê Diê ti Rôm ƀiădah ka dưi nao ôh (êlan 22).
Wăt tơdah jing khua pô mtô amâodah sa čô bi đru đăo, Khua Yang ăt jao sơăi kơ grăp čô drei bruă mdê mdê. Klei yuôm hĭn jing amâo djŏ drei bi msĕ hlei pô kdlưn hĭn ôh, ƀiădah si drei myơr leh klei hdĭp drei kơ Khua Yang yua. Knang bĕ kơ klei pap Khua Yang čiăng drei wah lač leh anăn hưn kơ lu phung riêng gah drei thâo klei Khua Yang bi mtlaih.
Si ngă klei Y-Pôl mĭn bi hmăi kơ klei hdĭp drei?
Wah lač: Ơ Khua Yang, lač jăk kơ Ih brei leh kơ kâo mâo sa klei bi hmô jăk mơ̆ng Khua ƀĭng kna Y-Pôl. Đru kâo mâo klei mĭn čiăng hưn Anăn Ih kơ lu mnuih. Brei kơ kâo mâo ai tiê jăk, klei thâo săng kơ Klei Ih Blŭ, leh anăn klei thâo bi hriăm čiăng kâo jing pô hưn dưi atăt lu mnuih wĭt đăo kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
