Klei Aê Diê Blŭ: Y-Mathiơ 26:14-16
Êlan kliăng: “Dơ̆ng mơ̆ng mông anăn ñu duah hruê găl dưi jao Yêsu” (Y-Mathiơ 26:16)
Klei êmuh ksiêm mĭn: Khua ƀĭng kna Y-Mathiơ brei thâo ya klei mtrŭt Y-Yuđas Iskariôt lhiăr kơ Khua Yang Yêsu? Hruê anei si drei srăng “čhĭ Khua Yang”?
Khua ƀĭng kna Y-Mathiơ lač klă anăn pô lhiăr kơ Khua Yang, anăn jing Y-Yuđas Iskariôt, sa hlăm phung pluh dua čô khua ƀĭng kna (êlan 14). Klei Khua ƀĭng kna Y-Mathiơ yăl dliê kơ klei mphŭn mâo ya ngă Y-Yuđas Iskariôt lhiăr leh kơ Khua Yang brei ƀuh: Tal sa, Y-Yuđas jing khua ƀĭng kna Khua Yang Yêsu, ƀiădah ñu amâo yap yuôm ôh klei pap yuôm bhăn Khua Yang brei leh kơ ñu, ñu mâo leh klei Khua Yang ruah leh anăn dưi tui hlue Khua Yang, dưi hmư̆ ti knga klei Khua Yang mtô, dưi dôk mbĭt hŏng Khua Yang hlŏng jih thŭn Khua Yang mă bruă. Ƀiădah bi hŏng Y-Yuđas, ñu dlăng kơ klei anăn jing thŭn mlan bŏ hŏng klei čhuai kyuadah tui hlue hĕ sa čô mnuih amâo ba hriê klei tŭ dưn hŏng mnơ̆ng mnuă ôh kơ ñu. Tal dua, ñu jing mnuih khăp kơ prăk leh anăn duah klei hing ang. Knŏng Khua ƀĭng kna Y-Mathiơ yơh čih yăl dliê klă kơ ênoh prăk Y-Yuđas čhĭ Khua Yang Yêsu. Anei amâo djŏ ênoh prăk prŏng ôh kyuadah tlâo pluh asăr prăk knŏng jing ênoh prăk bi hnô kơ klei hdĭp sa čô hlŭn (Klei Kbiă 21:32). Ênguôt snăk tơdah ñu tŭ ư čhĭ Mtao Adiê čiăng mă prăk! Khua ƀĭng kna Y-Mathiơ brei ƀuh klei Y-Yuđas Iskariôt khăp kơ prăk hlăm klei ñu čih yăl dliê kơ klei êmuh ênoh prăk tơdah Y-Yuđas čŏng čiăng nao bi tuôm hŏng phung knơ̆ng khua ngă yang: “Ya mnơ̆ng diih srăng brei kơ kâo tơdah kâo jao Yêsu kơ diih?” Tơdah bi tŭ ư leh hŏng ênoh tlâo pluh asăr prăk, Khua ƀĭng kna Y-Mathiơ brei thâo: “Dơ̆ng mơ̆ng mông anăn ñu duah hruê găl dưi jao Yêsu” (êlan 16). Klei anei brei ƀuh Y-Yuđas čŏng čiăng thơ̆ng leh anăn duah jih mmông găl čiăng čhĭ Khua Yang Yêsu mă prăk, leh anăn ti knhal tuč ñu čhĭ Khua Yang tlâo pluh asăr prăk!
Hruê anei, drei amâo čhĭ Khua Yang msĕ si Y-Yuđas ôh, ƀiădah klei lhiăr kơ Khua Yang ăt srăng truh mơh hlăm klei hdĭp drei. Ênguôt snăk tơdah hruê anei drei ăt mâo anăn jing phung đăo kơ Yêsu Krist mơh ƀiădah knŏng tui hlue Khua Yang msĕ si tui hlue sa mta klei đăo. Drei kluôm dhuôm amâo thâo kral ôh klei pap Khua Yang brei leh kơ drei tơdah tui hlue Ñu leh anăn dưi dôk hlăm sang Ñu. Khua ƀĭng kna Y-Pôl mtă leh kơ drei snei: “Kyuadah hŏng klei pap yơh diih tlaih leh kyua klei đăo. Klei bi mtlaih anăn amâo kbiă hriê mơ̆ng diih pô ôh, ƀiădah jing klei Aê Diê brei” (Êphêsô 2:8). Kyuanăn yơh drei tui hlue Khua Yang ƀiădah dlăng kơ klei hing ang, klei tŭ dưn, klei dưi lăn ala anei jing prŏng hĭn kơ Khua Yang, jhŏng čhĭ Khua Yang čiăng mâo kơ drei pô. Drei ăt nao kơ sang Aê Diê, ăt wah lač, ăt myơr, wăt tăp năng djă bruă prŏng mơh hlăm Phung Sang Aê Diê, ƀiădah hdĭp hŏng klei ai ngăm, lač khăp kơ Khua Yang ƀiădah lŏ lhiăr kơ Khua Yang, lač khăp kơ phung ayŏng adei ƀiădah lŏ ngă jhat kơ phung ayŏng adei, sa ai hŏng klei soh čiăng mâo klei tŭ dưn kơ pô… Amâodah lač snei, tơdah drei tui hlue Khua Yang ƀiădah drei dưm klei tŭ dưn kơ drei pô jing ti dlông hĭn kơ Khua Yang, kyua klei tŭ dưn lăn ala anei drei lhiăr kơ Khua Yang leh anăn kơ phung ayŏng adei snăn drei dôk čhĭ Khua Yang amâo mdê ôh hŏng Y-Yuđas Iskariôt! Akâo Khua Yang đru drei ƀuh klei pap Khua Yang brei kơ drei prŏng êdimima čiăng drei hdơr knga bi mni kơ Khua Yang, djă pioh klei sĭt suôr tui hlue Khua Yang tơl knhal tuč.
Hŏng ya êlan drei bi êdah klei sĭt suôr tui hlue Khua Yang?
Wah lač: Ơ Khua Yang Yêsu khăp ơi, bi mni kơ Ih bi mtlaih kâo leh. Đru kâo hdơr nanao kơ klei jăk Ih, sĭt suôr tui hlue Ih tơl knhal tuč, leh anăn đăm brei kâo mâo klei blŭ amâodah bruă ngă hngah kơ Khua Yang amâodah čhĭ Khua Yang ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Kôrantô 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
