Loos 15:14-22
Nqe cim:
“Tes haujlwm uas kuv nyiam ua tshaj, yog mus qhia txojmoo zoo rau txhua qhov uas tsis tau muaj neeg mus qhia Yexus Khetos zaj dua li, thiaj tsis muaj neeg hais tias, kuv mus tsa tsev rau ntawm lub qua tsev uas luag twb ncaws tau cia lawm.” (Loos 15:20)
Lus nug rau sawvdaws xav:
– Timthawj Paulus xav qhia tshwm nws lub siab rau Pawg Ntseeg tim lub nroog Loos li cas?
– Peb kawm tau yam dabtsi dhau zaj kawm no?
Timthawj Paulus sau cov lus hais noj qab nyob zoo mus rau cov ntseeg nyob tim lub nroog Loos thiab qhia tes haujlwm uas Vajtswv txib nws mus qhia Txojmoo Zoo rau lwm haivneeg.
Thawj qhov, Timthawj Paulus qhuas txog lawv lub siab zoo, kev txawj ntse, ib leeg txawj qhia ib leeg (nqe 14). Cov ntseeg nyob hauv lub nroog Loos twb muaj txojkev pab dav fo rau cov neeg muaj kev txomnyem. Lawv tiv txomnyem kawm Vajtswv Txojlus thiab ua raws li tej uas lawv tau kawm.
Tim ob, Paulus xav qhia qhov vimchiv ua li cas qee qhov hauv tsab ntawv uas nws sau hais txog thiab hais ncaj qha, nyob tsam muaj ib co nyuaj siab (nqe 15). Paulus txhais lub ntsiab rau lawv tias yog nws xav kom lawv ua raws li Vajtswv qhia.
Tim peb, Paulus qhia paub Vajtswv twb txib nws ua tes haujlwm qhia Txojmoo Zoo rau lwm haivneeg, thiab qhov khoom fij uas Paulus muab fij rau Vajtswv yog tsa muaj cov Pawg Ntseeg nyob hauv lwm haivneeg. Paulus muaj cai khav hauv tus Tswv txog nws tes haujlwm (nqe 17), tiamsis los ntawm tej lus uas nws hais, peb pom tias Paulus tsuas khav Vajtswv tes haujlwm uas nws ua xwb. Paulus tsis kam hais lwm yam txawv yam uas Vajtswv kom nws qhia, nqi zog yog lwm haivneeg los ntseeg Vajtswv (nqe 18). Vim tej txujci tseemceeb, lub hwjchim ntawm Txojmoo Zoo uas Paulus qhia mus rau txhua qhov, txij hauv lub nroog Yeluxalees mus txog rau cheebtsam Ilelikus, yog ib lub xeev uas cov nomtswv Loos kav nyob yav qaumteb tebchaws Makedaunias. Txhua yam yog tus Tswv ua! Tiamsis peb kawm tau ntawm Timthawj Paulus yog lub siab mloog Vajtswv lus, qhia raws nraim li yam uas tus Tswv xav qhia, thiab ua lub neej raws nraim li tej lus uas nws qhia. Vaj Ntsujplig ua rau Paulus tes haujlwm tawg paj txi txiv zoo heev (nqe 18-19).
Tim plaub, Paulus xav faib nws lub zeem muag qhia Txojmoo Zoo mus rau tej chaw uas tsis hnov txog Yexus Khetos zaj (nqe 20). Nov yog Vajtswv txojkev xav, “Cov neeg uas tsis tau muaj neeg qhia Yexus zaj rau lawv, lawv yuav pom; thiab cov neeg uas tsis tau hnov dua Yexus zaj, lawv yuav totaub.” (nqe 21; Yaxayas 52:15). Txij thaum tau tus Tswv hu, Timthawj Paulus rau siab ntso mus qhia Txojmoo Zoo, timkhawv qhia paub Paulus xav mus saib cov ntseeg hauv lub nroog Loos tiamsis mus tsis tau li (nqe 22).
Peb txhua tus txawm yuav yog xibhwb lossis cov ntseeg puavleej tau tus Tswv txib mus ua Nws tes haujlwm sib txawv. Qhov tseemceeb tsis yog peb muab tes haujlwm ntawd los sib tw, tiamsis yog saib peb puas fij peb lub neej tagnrho mus ua tes haujlwm ntawd zoo li cas xwb. Cia li vamkhom tus Tswv, thov Vajtswv thiab ua timkhawv qhia tus Tswv zaj pub rau txhua tus uas nyob ib ncig ntawm koj paub txog tus Tswv txojkev cawm dim.
Thov Vajtswv,
Vajtswv, Koj pub ib tug qauv ua haujlwm zoo li Timthawj Paulus rau nyuam yaus kawm. Thov Koj pab kom nyuam yaus muaj lub siab ua timkhawv qhia txog Koj zaj pub rau ntau leej. Thov Leej Txiv pub kom nyuam yaus ua taus siab ntev, paub Vajtswv Txojlus, tau koob hmoov ua timkhawv coj tau neeg los ntseeg. Nyuam yaus tuav Tswv Yexus lub npe thov, Amees.
Timthawj Paulus lub siab ua haujlwm ua rau peb muaj lub neej zoo li cas?
Nyeem Vajluskub hauv peb lub xyoo: Yaxayas 47
Kênh Youtube BHKTHN:
