Klei Aê Diê Blŭ: Klei Bi Hriêng 24:28-29
Êlan kliăng: “Đăm jing pô kčŭt kơ pô riêng gah ih amâo mâo klei ôh, đăm blŭ klei mplư ôh” (Klei Bi Hriêng 24:28)
Klei êmuh ksiêm mĭn: Ya ngă phung đăo brei hưn bi sĭt hŏng klei kpă ênô? Si klei Khua Yang Yêsu bi hmô tơdah arăng tăm pah, mčeh luar kơ Ñu? Si ngă drei srăng ngă hŏng phung čŏng mčeh čiăng ngă jhat kơ pô?
Mtao Salômôn mtô anak brei hưn bi sĭt hŏng klei kpă ênô. Klei hưn luar jing ngă soh hŏng Klei Bhiăn Tal Dua Păn mơ̆ng Aê Diê (Klei Kbiă 20:16). Pô hưn bi sĭt brei blŭ klei kpă ênô ti anăp sang phat kđi, amâo ôh kyua ya mta klei mkăn hưn amâo sĭt. Leh anăn kăn dưi mjhua mơh bruă hưn bi sĭt ti anăp sang phat kđi msĕ si pô čiăng msir klei amâo thâo bi djŏ hŏng pô mkăn. Mtao Salômôn mñă klă: “Đăm lač ôh, “Kâo srăng ngă kơ ñu msĕ si ñu ngă leh kơ kâo, kâo srăng bi wĭt kơ ñu tui si klei ñu ngă leh” (êlan 29). Wăt tơdah jing pô tŭ klei arăng ngă jhat, Khua Yang ăt kăn čiăng mơh phung ƀuôn sang Ñu rŭ ênua, kyua rŭ ênua knŏng bi đĭ klei bi roh đuč. Brei drei đăo knang leh anăn jao jih djăp mta klei kơ Khua Yang jing Pô phat kđi kpă ênô, Ñu mgang nanao, bi mtlaih phung arăng ktư̆ juă (dlăng Klei Bi Hriêng 24:15-20). Klei bhiăn hlăm Klei Bi Mguôp Hđăp mâo êlan hdră bhiăn “lex talionic” jing “ală kơ ală” čiăng ngă klei bhiăn kpă ênô (Bruă Lêwi 24:19-20) ƀiădah Khua Yang Yêsu mtô amâo dưi mjhua ôh klei bhiăn čiăng rŭ ênua ƀiădah brei hdĭp thâo bi khăp wăt hŏng phung roh pô (Y-Mathiơ 5:38-42).
Klei hưn bi sĭt amâo djŏ srăng atăt kơ klei phat kđi soh. Klei bhiăn tơdah kƀah klei kpă ênô srăng ngă kơ phung jăk, kpă ênô srăng tŭ klei phat kđi amâo djŏ, gŏ sang srăng klam klei dleh dlan. Êngao anăn, phung măk ƀai srăng tlaih kơ klei bi kmhal srăng dlăng hơăi mang kơ klei bhiăn leh anăn ngă thiăm lu klei soh. Aê Diê khăp leh anăn mgang phung kpă ênô, ƀiădah srăng bi kmhal phung luar. Klei Aê Diê blŭ: “Yêhôwa bi êmut kheh kơ êlah blŭ klei luar, ƀiădah Ñu mơak hŏng phung blŭ klei sĭt” (Klei Bi Hriêng 12:22). Tơdah phung riêng gah amâodah ƀĭng găp blŭ soh ya klei kơ pô, brei drei bi blŭ hrăm hŏng pô anăn, đăm duah ôh klei rŭ ênua hŏng klei mčeh luar kơ digơ̆. Khua ƀĭng kna Y-Pêtrôs mñă kơ phung ƀuôn sang Aê Diê kơ klei Khua Yang Yêsu tŭ gĭr: “Kyua kơ klei anăn Aê Diê iêu leh diih, kyuadah Krist msĕ mơh tŭ leh klei knap mñai kyua diih, čiăng brei kơ diih klei bi hmô, čiăng kơ diih tui hlue kru Ñu. Ñu amâo tuôm ngă soh ôh, kăn arăng tuôm hmư̆ klei luar mơ̆ng ƀăng êgei Ñu rei. Tơdah arăng dlao wač kơ Ñu, Ñu amâo lŏ dlao wač kơ arăng ôh; tơdah Ñu tŭ klei knap mñai, Ñu amâo arưp aram ôh. Ƀiădah Ñu knang kơ Pô phat kđi hŏng klei kpă” (I Y-Pêtrôs 2:21-23).
Brei drei blŭ nanao klei sĭt nik kyua Ama Hlăm Adiê drei jing Pô Doh Jăk leh anăn kpă ênô. Ñu čiăng kơ phung ƀuôn sang Ñu mâo klei hdĭp jăk mơak, kyua anăn tơdah hưn klei bi sĭt luar, amâodah tơdah rông klei bi roh hlăm ai tiê jing drei luč leh klei êđăp ênang leh anăn klei đăo knang kơ Khua Yang.
Drei jih ai tiê đăo knang jao jih kơ Khua Yang leh anăn blŭ klei kpă ênô mơ̆?
Wah lač: Ơ Khua Yang, bi mni kơ Ih djiê hrô kyua klei soh kâo. Akâo kơ Ih đru kâo hdơr kâo pô jing anak Pô Doh Jăk leh anăn kpă ênô čiăng jih ai tiê đăo knang hlăm klei phat kđi kpă ênô Ih leh anăn blŭ klei sĭt nik. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
