Pajlug 24:28-29
Nqe cim:
“Tsis txhob ua timkhawv tsis tseeb tawmtsam lwm tus uas tsis tau ua txhaum lossis hais tej lus uas ntxias luag yuam kev” (Pajlug 24:28).
Lus nug rau sawvdaws xav:
– Vim licas tus ntseeg yuav tsum hais tej lus tseeb?
– Tswv Yexus ua qauv licas thaum Nws raug cem thiab raug liam txim?
– Peb yuav tsum ua licas rau tus uas txhob txwm hais lus ntxias kom lwm tus xav yuamkev?
Vajntxwv Xalumoos qhia menyuam hais lus ua timkhawv tseeb. Ua timkhawv cuav yog ua txhaum Nqe Kev Cai Thib Cuaj ntawm Kaum Nqe Kevcai (Khiavdim 20:16). Tus ua timkhawv yuav tsum hais lus tseeb nyob hauv tsev hais plaub, tsis pub lwm yam laj thawj cuam tshuam ua rau hloov qhov tseeb. Thiab tsis pub siv kev ua timkhawv hauv tsev hais plaub los ua ib yam cuabyeej daws kev ntxub ntxaug ntawm tus kheej rau lwm tus. Vajntxwv Xalumoos hais meej tias: “Tsis txhob hais tias: Kuv yuav ua rau nws ib yam li nws tau ua rau kuv lawm. Kuv yuav pauj tej uas nws ua rau kuv lawm rov rau nws.” (nqe 29). Txawm yog raug tsim txom, los tus Tswv yeej tsis xav kom Nws haiv neeg ua pauj, vim kev ua pauj tsuas ntxiv kev ntxub ntxaug xwb. Cia li tso siab thiab muab txhua yam rau Vajtswv uas yog tus txiav txim ncaj ncees, Nws yeej tiv thaiv thiab cawm tus raug quab yuam (saib Pajlug 24:15-20). Kevcai hauv Vajlugkub Qub muaj ib txoj cai “lex talionis” txhais hais tias “qhov muag pauj qhov muag” los tuav kev ncaj ncees (Levis Kevcai 24:19-20) tiamsis Tswv Yexus qhia hais tias tsis txhob siv txojcai ntawd los pauj tshav, yuav tsum hlub yeeb ncuab (Mathais 5:38-42).
Lus timkhawv tsis tseeb yuav coj mus rau kev txiav txim yuam kev. Yog tias txojcai tsis ncaj ncees yuav ua rau cov neeg zoo, ncaj ncees raug txiav txim yuamkev thiab lawv tsev neeg yuav ris kev txomnyem. Tsis tas li ntawd xwb, thaum cov neeg phem khiav dim kev txiav txim ces yuav ua rau lawv saib tsis taus txoj cai lij choj thiab yim ua txhaum ntxiv. Vajtswv hlub thiab sawv cev tiv thaiv tus ncaj ncees, tiamsis Nws yuav rau txim rau tus hais lus dag. Vajtswv Txojlus qhia tias: “Tus TSWV ntxub tej neeg uas hais lus dag, tiamsis nws txaus siab rau cov neeg uas hais lus tseeb” (Pajlug 12:22).
Yog tej neeg ibncig ntawm koj lossis koj tus phoojywg hais tej yam tsis tseeb txog koj, ces cia li sibtham nrog lawv twjywm, txhob nrhiav kev ua pauj los ntawm kev liam txim rau lawv. Timthawj Petus qhia Vajtswv haiv neeg txog tus qauv ua siab ntev ntawm Tswv Yexus: “21Vajtswv xav kom nej muaj lub siab zoo li ntawd, rau qhov Yexus Khetos twb raug kev tsimtxom this nej thiab ua yam ntxwv rau nej xyaum lawm, nws ua li ntawd nej thiaj yuav ua tau li nws ua. 22Yexus tsis tau ua ib qho txhaum, thiab tsis muaj leejtwg hnov nws hais ib lo lus dag li. 23Thaum luag thuam nws, nws tsis teb luag ib los li; thiab thaum luag tsimtxom nws, nws tsis foom luag, tiamsis nws muab tej ntawd tso rau Vajtswv tus uas txiav txim ncaj ncees.” (I Petus 2:21-23).
Peb yuav tsum niaj hnub hais lus tseeb rau qhov peb Leej Txiv nyob saum ntuj ceeb tsheej yog tus Dawbhuv thiab Ncaj Ncees. Nws xav kom Nws haiv neeg muaj lub neej tau koob hmoov, yog li ntawd thaum peb hais lus ua timkhawv cuav lossis khaws kev ntxub ntxaug hauv siab ces peb twb poob kev thajyeeb nyabxeeb thiab tsis muaj kev tso siab rau Vajtswv lawm.
Thov Vajtswv,
Tus Tswv, ua tsaug uas Koj tau tuag theej nyuam yaus tej kev txhaum. Thov pab nyuam yaus niaj hnub nco ntsoov tias nyuam yaus yog tus Dawbhuv thiab Ncaj Ncees li menyuam, kom nyuam yaus cia siab tag nrho rau Koj txoj kev txiav txim ncaj ncees thiab niaj hnub hais lus tseeb. Nyuam yaus tuav Yexus Khetos lub npe thov, Amees.
Nyeem Vajluskub hauv peb lub xyoos: II Xwmtxheej 24
Kênh Youtube BHKTHN:
