Klei Aê Diê Blŭ: Y‑Mathiơ 9:9
Êlan kliăng: “Êjai Yêsu đuĕ mơ̆ng anăn, Ñu ƀuh sa čô êkei anăn gơ̆ Y‑Mathiơ dôk gŭ ti adŭ rĭng jia. Yêsu lač kơ gơ̆, “Tui hlue Kâo.” Gơ̆ kgŭ leh anăn tui hlue Ñu.” (Y‑Mathiơ 9:9).
Klei êmuh ksiêm mĭn: Ti anôk Khua Yang Yêsu ƀuh Y‑Mathiơ? Si ñu wĭt lač kơ klei Khua Yang iêô ñu? Si klei hdĭp ñu bi mlih, leh ñu bi tuôm hŏng Khua Yang Yêsu? Ya mta klei hriăm mñă kơ drei?
Khua Yang Yêsu iêo pă čô ƀĭng kna tal êlâo hĭn hlăk êjai diñu dôk mă bruă. Đa dôk trah kan hlăm êa ksĭ, đa dôk jhĭt ñuăl hlăm čhŏng (Y‑Mathiơ 4:18-22). Leh anăn tal anei Khua Yang iêô Y‑Mathiơ ăt ti anôk ñu dôk mă bruă mơh. Êlâo kơ Khua Yang Yêsu bi tuôm hŏng Y‑Mathiơ êjai ñu dôk gŭ adŭ rĭng jia. Khădah phung Israel bi êmut kơ bruă ñu dưn, ƀiădah anei jing bruă dưi hrui lu prăk leh anăn kjăp. Ƀiădah jih jang mta klei hlăm klei hdĭp ñu bi mlih mdê snăk dơ̆ng mơ̆ng hlăk Khua Yang Yêsu lač kơ ñu: “Tui hlue kâo”. Khă Y‑Mathiơ amâo blŭ ôh, ƀiădah ñu hur har wĭt lač kơ klei Khua Yang iêô hŏng bruă ngă khut khat, kgŭ dơ̆ng leh anăn tui hlue Khua Yang.
Dơ̆ng mơ̆ng sa čô mă bruă nai kai mâo klei hdĭp mdrŏng sah, Y‑Mathiơ čuăn lui jih djăp mta čiăng tui hlue Khua Yang Yêsu, kčưm dơ̆ng hruê mlan hiu êbat mbĭt hŏng Khua Yang. Dơ̆ng mơ̆ng anôk jing sa čô mnuih soh, ñu dưi jing sa čô hlăm 12 khua ƀĭng kna Khua Yang Yêsu, leh anăn êdei ñu sa čô mnuih hưn bi sĭt mdê hĭn kơ Khua Yang. Dơ̆ng mơ̆ng sa čô mă bruă kơ knŭk kna tue, ñu wĭt jing mnuih mă bruă kơ ƀuôn sang pô, kyuanăn yơh lu mnuih thâo kơ Khua Yang Yêsu jing Yang Mêsi hŏng hdruôm hră Klei Mrâo Mrang Jăk Y‑Mathiơ čih pioh kơ phung Israel.
Klei iêô mthưr sa čô rĭng jia jing ƀĭng kna kơ Khua Yang Yêsu sĭt yơh tuôm hŏng lu klei mĭn bi mklăk mdê mdê hlăk ênuk anăn kyuadah dleh êdi kơ arăng tŭ ư hlăm êpul phung ƀĭng kna Khua Yang Yêsu mâo hĕ sa čô mâo klei hdĭp êlâo adih soh jhat msĕ snăn. Khă snăn, hŏng klei Khua Yang iêô Y‑Mathiơ brei ƀuh klei Khua Yang iêô amâo hlue si hlei drei jing ôh, ya klei drei tuôm ngă leh ôh, ƀiădah kbiă hriê kluôm dhuôm mơ̆ng klei Ñu pap amâo mâo knhal pioh brei kơ mnuih.
Rup Pô doh jăk iêô mthưr sa čô mnuih soh tui hlue Ñu brei kơ drei dưi thâo ƀuh drei pô leh anăn thâo kral klei pap klei khăp Khua Yang jing prŏng êdimi pioh brei kơ mnuih amâo năng msĕ si drei. Hlăm klei sĭt, tơdah bi tuôm hŏng phung hlăk êlâo jing jhat ƀai, amâodah dlăng kơ kdrăp ti êngao dleh čiăng mjĕ giăm hlăm Phung Sang Aê Diê, drei kreh dlăng hŏng ală amâo mâo klei khăp čiăng ôh, leh anăn amâo čiăng nao giăm diñu ôh. Klei anei brei ƀuh drei ăt dôk mâo ƀiă lu hnơ̆ng čuăn kơ sa čô mnuih dưi jing phung anak Aê Diê. Đăm bi kdriêl hĕ ôh klei pap Khua Yang hŏng hnơ̆ng čuăn, klei mĭn ênuk anei, ƀiădah brei arăng thâo kral klei Khua Yang pap amâo mâo knhal ôh leh anăn mâo mmông myun dưi bi tuôm hŏng Khua Yang Yêsu găn hŏng klei hdĭp drei.
Drei thâo kral si Khua Yang jing hlăk Ñu iêô drei?
Wah lač: Ơ Khua Yang, Pô khăp leh anăn iêô leh kâo kyua klei pap Ih. Bi mni kơ Khua Yang kyua brei kâo dưi tui hlue Ih, dưi jing anak Ih leh anăn dưi jing phung ƀuôn sang Ƀuôn Ala Mtao Adiê. Akâo kơ Khua Yang yua klei hdĭp kâo tui si klei Ih čiăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 11:21 – 12:21
Kênh Youtube BHKTHN:
