Mathais 9:9
Yexus txawm tawm qhov ntawd mus, thaum nws tabtom taug kev mus, nws pom ib tug txivneej sau se hu ua Mathais, zaum ntawm lub rooj sau se. Yexus hais rau Mathais hais tias, “Koj cia li nrog kuv mus.”
Lus nug rau sawvdaws xav:
- Tswv Yexus pom Mathais tab tom nyob qhov twg?
- Nws ua li cas thaum hnov Yexus hu?
- Mathais lub neej pauv hloov li cas thaum tau ntsib Yexus?
- Zaj kawm hnub no xav qhia peb txog yam dabtsi?
Tswv Yexus hu plaub tug timthawj xubthawj thaum lawv tseem tab tom ua haujlwm. Ob tug tab tom ntaus ntses hauv hiav thiab ob tug tab tom ntxiv vas hauv nkoj (Ma-thi-ơ 4:18-22). Thiab zaum no, Tswv Yexus hu Mathais nrog nws mus ces Mathais kuj nyob ntawm nws qhov chaw ua haujlwm. Ua ntej ntsib Tswv Yexus, Mathais zaum ntawm lub rooj sau se. Txawm hais tias, Mathais tes haujlwm raug cov Yixalayees ntxub kawg los, ntawd yog ib tes haujlwm nrhiav tau noj thiab ruaj khov. Tiamsis txhua yam hauv Mathais lub neej pauv hloov ua rau xav tsis thoob thaum nws tau hnov Tswv Yexus hu hais tias: “Koj cia li nrog kuv mus”. Txawm hais tias Mathais tsis hais ib lo lus twg li los nws yeej teb Tswv Yexus lub suab hu los ntawm tes haujlwm tshwm uas txiav txim siab sawv tsees los nrog Yexus mus.
Yog ib tug nomtswv muaj haujlwm ua ruaj khov, Mathais zoo siab tso txhua yam tseg los nrog Tswv Yexus mus, pib lub neej mus rau ub rau no nrog Tswv Yexus ua ke. Yog ib tug neeg txhaum, Mathais tau los ua ib tug hauv Tswv Yexus 12 tug timthawj, thiab tom qab ntawd yog ib tug timkhawv tshwjxeeb rau Yexus. Xub thawj, Mathais yog ib tug ua haujlwm rau lwm haiv neeg tej nomtswv, tiamsis tau rov los ua haujlwm rau nws haiv neeg, ua rau coob leej ntau tus paub Tswv Yexus yog Tus Mexiyas los ntawm phau ntawv Txojmoo Zoo uas yog Mathais sau tshwjxeeb mus rau cov neeg Yudais.
Hu ib tug neeg sau se los ua Yexus tus timthawj paub ntsoov yuav muaj neeg tawm ncauj tawm lus txog qhov ntawd, vim khwv rau sawvdaws lees hais tias, ib tug neeg muaj lub neej yav tas los ua phem li ntawd ho tau los ua ib pab nrog Yexus cov timthawj. Tiamsis qhov uas tus Tswv hu Mathais, qhia rau peb paub hais tias, tus Tswv hu peb tsis yog hu los ntawm peb yog leejtwg, tau ua yam phem li cas los lawm, tiamsis yog hu peb los ntawm tus Tswv nplooj siab hlub loj kawg nkaus uas muaj pub rau tibneeg.
Qhov ua tus Dawbhuv hu ib tug neeg muaj txim txhaum los cuag nws, ua rau peb pom txog peb tus kheej yeej tsis tsimnyog tau tus Tswv hlub thiab ua rau peb paub txog tus Tswv kev hlub uas nws muab pub rau peb tibneeg loj kawg nkaus li. Nyob hauv lub neej, thaum ntsib cov neeg uas ua tsis zoo rau peb lossis peb saib cov uas tsis tshua ua zoo rau pawg ntseeg, peb kheev saib lawv mus rau qhov tsis tshua zoo pestsawg, thiab tej zaum peb muaj kev cais deb cov ntawd. Qhov ntawd qhia tau hais tias, peb tseem muaj qee yam ntaus ntsuas txog ib tug neeg tau los ua Vajtswv menyuam. Txhob muab Vajtswv kev hlub pub dawb los xav ua nqaim nqaim raws li tibneeg kev xav, cia lwm tus tau paub Vajtswv kev hlub pub dawb uas muaj loj kawg nkaus thiab muaj sijhawm tau ntsib tus Tswv los ntawm peb lub neej.
Koj paub tus Tswv yog tus zoo licas thaum nws hu koj los cuag nws?
Thov Vajtswv:
Tus Tswv, Koj hlub nyuam yaus thiab hu nyuam yaus los ntawm Koj txojkev hlub pub dawb. Nyuam yaus ua tus Tswv tsaug vim uas Koj tau pub nyuam yaus los nrog Koj mus, tau ua Koj me nyuam thiab tau ua pejxeem hauv Koj lub tebchaws. Thov tus Tswv siv nyuam yaus lub neej raws li Koj siab nyiam, Ameeg.
Email: kawmvajluskubtxhuahnub@gmail.com
Kênh Youtube BHKTHN:
