Klei Aê Diê Blŭ: Y-Mathiơ 22:23-33
Êlan kliăng: “Kyuadah hlăm hruê kbiă lŏ hdĭp êkei amâo lŏ dôk mô̆ ôh, mniê kăn lŏ dôk ung rei, ƀiădah diñu srăng jing msĕ si phung dĭng buăl jăk Aê Diê hlăm adiê” (Y-Mathiơ 22:30)
Klei êmuh ksiêm mĭn: Hlei phung Sadusi jing? Kơ ya klei diñu êmuh Khua Yang Yêsu? Ya ngă brei drei hur har hriăm Klei Aê Diê Blŭ?
Phung Sadusi jing sa phung arăng mpŭ leh anăn mdrŏng sah. Diñu đăo kluôm ênŭm kơ hdruôm hră Klei Bi Mguôp Hđăp, ƀiădah diñu tŭ ư knŏng atur klei đăo mơ̆ng êma pŏk hdruôm hră Y-Môis čih đuč mâo klei kă kjăp. Diñu hngah kơ klei kbiă lŏ hdĭp, kơ phung dĭng buăl jăk, kơ yang jhat, diñu kñăm kơ klei mĭn êngiê pô leh anăn hdĭp kyua klei tŭ dưn kơ diñu pô kyudah diñu đăo mâo knŏng sa klei hdĭp đuč. Phung Sadusi hriê êmuh Khua Yang Yêsu, diñu mă sa klei bi hmô klă čiăng bi sĭt kơ klei amâo mâo klei hdĭp ênuk êdei ôh. Tui si klei čih hlăm klei bhiăn, “Tơdah sa čô êkei djiê amâo mâo anak ôh, brei adei ñu čuê nuê čiăng bi mâo anak kơ ayŏng ñu” (êlan 24). Sa boh sang mâo kjuh čô ayŏng adei, leh anăn jih kjuh čô djiê sơăi êjai ka mâo anak ôh. Mô̆ ayŏng khua čuê nuê dôk jih kjuh čô ayŏng adei tui si klei bhiăn ƀiădah amâo mâo pô mâo anak ôh. Diñu mâo klei êmuh,“Snăn ti hruê kbiă lŏ hdĭp, mniê anăn srăng jing mô̆ kơ hlei pô hlăm phung kjuh čô anăn, kyuadah jih jang diñu dôk leh mniê anăn sơăi?” (êlan 28). Yêsu lŏ wĭt lač, “Diih čhuai leh kyuadah diih amâo thâo săng ôh Klei Aê Diê Blŭ čih, kăn thâo săng rei klei myang Ñu” (êlan 29). Khua Yang Yêsu brei phung Sadusi thâo diñu amâo thâo săng êlam ôh kơ Klei Aê Diê Blŭ, amâo săng amâodah dlăng ti gŭ đei kơ klei myang Aê Diê. Diñu bi mđĭ klei bhiăn ƀiădah lui hĕ klei dưi Aê Diê. Klei anei bi êdah kơ diñu kluôm dhuôm amâo đăo ôh kơ klei khăp, klei pap leh anăn kơ klei myang Aê Diê.
Klei Khua Yang Yêsu lŏ wĭt lač brei thâo ƀiă kơ klei mdê phung hdĭp hlăm Ƀuôn Jăk. Tal sa, jih jang bruă ngă ti Ƀuôn Jăk amâo msĕ bruă ngă ti lăn ala ôh, si tô hmô huă ƀơ̆ng, mnăm, bi dôk ung mô̆…Tal dua, klei hdĭp hlăm Ƀuôn Jăk jing klei hdĭp jăk klă, amâo mâo mnơ̆ng bi đuôm amâodah gai mơ̆ng mnơ̆ng mkăn msĕ si ti lăn ala ôh. Tal tlâo, phung hdĭp hlăm Ƀuôn Jăk jing hdĭp hlăm klei guh kơang msĕ si phung dĭng buăl jăk.
Khua Yang Yêsu bi hdơr kơ phung Sadusi hdơr kơ Klei Kbiă 3:6, Aê Diê lač: “Leh anăn ñu lač, “Kâo jing Aê Diê Y-Abraham, Aê Diê Y-Isăk, leh anăn Aê Diê Y-Yakôp.” Aê Diê jing Pô Dôk Hdĭp Hlŏng Lar kyuanăn Anăn pia “Kâo jing” lač kơ klei jing ară anei hin. Ară anei tlâo čô phung aê anăn djiê leh mơ̆ng sui ƀiădah Aê Diê ăt jing Aê Diê kơ diñu. Leh anăn Khua Yang lač, Aê Diê amâo jing Aê Diê kơ phung djiê ôh, ƀiădah Aê Diê kơ phung hdĭp. Snăn yơh, sĭt nik Klei Bi Mguôp Hđăp mâo klei mtô kơ klei kbiă lŏ hdĭp leh djiê.
Hruê anei, brei drei pioh lu mmông hriăm Klei Aê Diê Blŭ grăp hruê čiăng thâo săng hĭn kơ Khua Yang, hŏng klei anăn drei dưi bi kdơ̆ng hŏng klei bi kdơ̆ng mơ̆ng klei đăo soh, klei mtô soh. Tơdah mâo Klei Aê Diê Blŭ, amâo djŏ drei hdĭp knŏng mâo klei tŭ dưn kơ Khua Yang hlăm klei hdĭp anei ôh, ƀiădah wăt mprăp drei pô bi jăk mơh čiăng kơ drei êpa mhao nanao kơ klei hdĭp hlăm Ƀuôn Jăk guh kơang.
Ya drei ngă čiăng dưi đĭ hriê kơ prŏng hlăm klei pap leh anăn klei thâo kral Khua Yang?
Wah lač: Ơ Khua Yang, đru kâo hur har dlăng leh anăn hriăm Klei Ih Blŭ čiăng kơ kâo dưi dôk kjăp hlăm klei đăo ti anăp klei bi kdơ̆ng mơ̆ng klei đăo soh leh anăn klei mtô soh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
