Klei Aê Diê Blŭ: I Y-Pêtrôs 1:1-7
Êlan kliăng: “…čiăng kơ klei diih đăo sĭt nik jing yuôm hĭn kơ mah thâo rai tuč arăng lông dlăng hlăm pui, dưi mâo klei bi mni, klei guh kơang, leh anăn klei mpŭ ti hruê Yêsu Krist srăng bi êdah” (I Y-Pêtrôs 1:7)
Klei êmuh ksiêm mĭn: Khua ƀĭng kna Y-Pêtrôs čih hră I Y-Pêtrôs kơ hlei pô? Ya klei ñu mđĭ ai digơ̆? Si drei dưi mđĭ ai tơdah tuôm hŏng klei lông dlăng?
Khua ƀĭng kna Y-Pêtrôs čih hră I Y-Pêtrôs hlăm brô krah thŭn 64 êdei kơ klei kkiêng kơ Khua Yang Yêsu, čiăng mđĭ ai phung đăo dôk hdĭp bra đuĕ ti krĭng Asi. Anei jing phung đăo tŭ klei phung Rôm ktư̆ juă, ngă jhat kjham snăk lar kluôm ala čar ngă kơ digơ̆ hdĭp bra đuĕ, ƀiădah ñu mđĭ ai digơ̆ brei dôk kjăp ti krah klei arăng ngă jhat, hơ̆k mơak hŏng klei đăo knang kjăp kyua diñu jing phung Aê Diê ruah. Wăt tơdah lăn ala ngă jhat kơ diñu dưn snăn hŏng Aê Diê diñu ăt jing phung Aê Diê ruah, mâo Yang Mngăt Jăk bi doh jăk čiăng gưt kơ Khua Yang Yêsu Krist, grăp hruê jing msĕ si Khua Yang hĭn (êlan 1-2).
Klei ngă Khua ƀĭng kna Y-Pêtrôs leh anăn phung đăo dưi dôk kjăp hŏng klei lông dlăng, arăng ngă jhat, anăn jing “Hŏng klei Ñu pap prŏng snăk Ñu bi kkiêng drei mrâo leh, brei drei mâo klei čang hmăng hdĭp kyua klei Yêsu Krist kbiă lŏ hdĭp mơ̆ng phung djiê” (êlan 3). Phung đăo jing phung dưi lŏ kkiêng mrâo, jing phung mrâo hlăm Yang Krist. Kyua klei đăo drei mâo klei hdĭp hlŏng lar “jing ngăn dưn amâo thâo rai, amâo thâo čhŏ, amâo thâo dliu ôh, pioh leh hlăm adiê kơ diih” (êlan 4), amâo djŏ jing klei hdĭp jing êjai msĕ si mnơ̆ng dhơ̆ng ti lăn ala anei ôh.
Hlăm hdră êbat hlăm ktuê êlan điêt tui hlue Khua Yang, năng ai mâo mmông asei mlei drei tŭ klei lông dlăng, arăng ngă jhat, kjham hĭn tơl djiê kơ Khua Yang, ƀiădah klei yuôm bhăn jing mngăt drei amâo srăng luč liê ya mta ôh. Khua Yang Yêsu mtô: “Đăm huĭ ôh kơ phung dưi bi mdjiê asei mlei ƀiădah amâo dưi bi mdjiê mngăt, ƀiădah huĭ bĕ kơ Pô dưi bi mdjiê mngăt wăt asei mlei hlăm war pui” (Y-Mathiơ 10:28). Brei kjăp ai tiê tơdah tuôm hŏng klei lông dlăng “wăt tơdah ară anei năng ai diih srăng tŭ bhiâo klei lông dlăng lu mta dưn” (êlan 6). Ƀiădah Khua Yang amâo brei drei tŭ klei lông dlăng êgao hnơ̆ng ôh, leh anăn leh klei lông dlăng jing klei jăk mơak, “čiăng kơ klei diih đăo sĭt nik jing yuôm hĭn kơ mah thâo rai tuč arăng lông dlăng hlăm pui, dưi mâo klei bi mni, klei guh kơang, leh anăn klei mpŭ ti hruê Yêsu Krist srăng bi êdah” (êlan 7).
Satan ăt kăp čiăng duah klei ngă kơ phung ƀuôn sang Aê Diê hlăk đưm ăt msĕ mơh ară anei hŏng hdră anei amâodah hdră mkăn. Akâo kơ Khua Yang đru drei kjăp ai tiê tơdah tuôm hŏng klei arăng ngă jhat, klei lông dlăng hlăm klei đăo, leh anăn hdơr nanao drei knŏng jing phung dôk êjai ti krah klei hdĭp anei, klei drei đăo knang amâo djŏ ti lăn ala anei ôh ƀiădah jing klei hdĭp hlŏng lar tơdah Khua Yang Yêsu lŏ hriê.
Ya klei drei srăng đăo knang tơdah tuôm hŏng klei lông dlăng?
Wah lač: Ơ Ama khăp hơiêng! Akâo kơ Ih đru kâo mñă nanao kơ pô kâo knang hlăm Khua Yang čiăng kâo mâo klei mơak leh anăn kjăp ktang tơdah tuôm hŏng klei lông dlăng ngă jhat hlăm êlan tui hlue Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Y-Pêtrôs 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
