1 Petus 1:1-7
Nqe cim:
“…Txawm yog kub los neeg yuav tsum muab hluavtaws sim saib puas tseem kub. Yog li ntawd, Vajtswv yuav tsum muab nej txojkev ntseeg uas tseemceeb dua kub sim saib puas yuav thev taus. Yog nej thev taus, thaum txog hnub uas Yexus Khetos los Vajtswv yuav qhuas nej thiab nej yuav tau ntsejmuag” (1 Petus 1:7)
Lus nug rau sawvdaws xav:
– Timthawj Petus sau tsab ntawv 1 Petus rau leejtwg?
– Nws txhawb lawv lub zog li cas?
– Dhau zaj kawm peb tau txhawb zog li cas thaum uas ntsib kev sim siab?
Timthawj Petus sau tsab ntawv 1 Petus kwv lam li xyoo 64 tom qab yug Tswv Yexus, nws sau mus txhawb cov ntseeg uas tawg khiav mus nyob rau txhua qhov chaw ntawm cheeb tsam Axias yau (Tiểu Á). Lawv yog cov uas raug tsimtxom hnyav kawg nkaus los ntawm nomtswv Loos thiab tej nomtswv uas kav tebchaws txhua qhov. Tiamsis timthawj Petus txhawb cov ntseeg lub zog kom sawv ruaj khov hauv txoj kev ntseeg thaum raug tsimtxom, zoo siab thiab cia siab ruaj khov rau Vajtswv vim lawv yog cov uas tau Vajtswv xaiv. Txawm lub ntiajteb no yuav ua li cas rau lawv, Vajtswv yeej yog tus xaiv lawv cia lawm, vim lawv tau Vaj Ntsujplig hloov lawv lub neej kom yim hnub yim zoo li Tswv Yexus mus ntxiv (nqe 1-2).
Qhov uas pab tau timthawj Petus thiab cov ntseeg ruaj siab tiv tej kev sim siab, kev tsimtxom, vim yog “Rau qhov nws hlub peb kawg li, nws thiaj tsa Yexus Khetos sawv hauv qhov tuag rov qab los pab peb kom peb muaj txojsia tshiab. Nws ua li no peb txojkev cia siab thiaj ruaj khov” (nqe 3). Cov ntseeg yog cov uas twb yug dua tshiab lawm, thiab dhau los ua ib tug neeg tshiab hauv Tswv Yexus. Los ntawm kev ntseeg Tswv Yexus, peb tau txoj sia ibtxhis thiab “Vajtswv twb khaws txoj koob hmoov ntawd cia rau saum ntuj ceebtsheej tos nej lawm. Txoj koob hmoov ntawd tsis txawj lwj, tsis txawj phem thiab tsis txawj qub li” (nqe 4), tsis zoo li tej khoom qhov txhia chaw uas tibneeg pheej ntshaw.
Hauv txoj kev qaim uas nrog Tswv Yexus mus, muaj tej zaum peb sab nqaij tawv yuav raug sim siab, rau tsimtxom, raug iab liam, muaj tej thaum peb kuj yuav tsum ua ib siab raug txomnyem tuag pub rau tus Tswv, tiamsis qhov tseemceeb peb sab ntsujplig tsis raug poob ib zaug li. Tswv Yexus qhia hais tias: “Nej tsis txhob ntshai tus uas tua tau nej lub cev, tiamsis tua tsis tau nej tus ntsujplig; nej yuav tsum ntshai Vajtswv tus uas muab tau nej lub cev thiab nej tus ntsujplig pov rau hauv ntujtawg” (Mathais 10:28). Cia li ruaj siab thaum uas ntsib tej kev sim siab, “Txawm yog nej yeej yuav raug kev txomnyem nyuaj siab ib nyuag ntu los nej yuav tsum zoo siab” (nqe 6). Vajtswv yeej tsis cia peb nyiaj tej yam uas hnyav dhau peb lub zog thiab thaum dhau tej kev sim siab lawm yog koob hmoov, “Qhov uas Vajtswv cia nej raug tej kev txomnyem ntawd twb yog Vajtswv sim saib nej muab siab rau ntseeg npaum li cas. Txawm yog kub los neeg yuav tsum muab hluavtaws sim saib puas tseem kub. Yog li ntawd, Vajtswv yuav tsum muab nej txojkev ntseeg uas tseemceeb dua kub sim saib puas yuav thev taus. Yog nej thev taus, thaum txog hnub uas Yexus Khetos los Vajtswv yuav qhuas nej thiab nej yuav tau ntsejmuag.” (nqe 7).
Dab Ntxwjnyoog yeej niaj hnub ncig mus ncig los nrhiav kev tawmtsam Vajtswv cov menyuam hnub thaud thiab niaj hnub nimno los ntawm ntau lub tswvyim tsimtxom cov ntseeg. Peb yuav tsum sawv ruaj khov thaum ntsib tej kev tsimtxom, kev sim siab ntawm kev ntseeg, thiab nco ntsoov hais tias peb tsuas los nyob lub ntiajteb ua qhua ib pliag xwb, peb txoj kev cia siab tsis yog nyob hauv lub ntiajteb, tiamsis yog cia siab rau txoj sia ibtxhis hauv Vajtswv lub tebchaws.
Thov Vajtswv,
Vajtswv tus uas muaj kev hlub, thov pab kom nyuam yaus nco ntsoov hais tias, nyuam yaus muaj kev cia siab rau ntawm Koj. Txawm nyuam yaus lub neej yuav ntsib kev tsimtxom, kev sim siab los thov pab kom nyuam yaus sawv ruaj rau hauv txoj kev nqaim uas nrog koj mus. Nyuam yaus tuav Tswv Yexus Khetos lub npe thov, Amees.
Peb tabtom cia siab dabtsi thaum uas ntsib tej kev sim siab?
Nyeem Vajluskub hauv peb lub xyoos: 2 Petus 3
Kênh Youtube BHKTHN:
