Klei Aê Diê Blŭ: II Têsalônik 2:1-5
Êlan kliăng: “…kyuadah hruê anăn amâo srăng truh ôh êlâo kơ Mnuih Soh bi êdah, pô anei pioh leh kơ rai luč. Pô anăn srăng bi kdơ̆ng leh anăn bi mđĭ ñu pô ti dlông hĭn kơ jih jang arăng pia yang amâodah kơ mnơ̆ng arăng kkuh mpŭ, tơl ñu dôk gŭ hlăm sang yang Aê Diê leh anăn hưn kơ ñu pô jing Aê Diê” (II Têsalônik 2:3-4)
Klei êmuh ksiêm mĭn: Ti dua klei truh yuôm čiăng thâo kral “Hruê Khua Yang” Khua ƀĭng kna Y-Pôl lač? Jih jang klei bi knăl anăn čiăng lač kơ ya mta klei? Ya drei srăng ngă čiăng thâo kral djŏ jih jang klei bi knăl kơ hruê Khua Yang lŏ hriê?
Hlăm hră mơĭt I Têsalônik, Khua ƀĭng kna Y-Pôl blŭ leh kơ dŭm klei bi knăl hưn êlâo kơ hruê Khua Yang lŏ hriê. Hlăm hră mơĭt anei, leh mtă kơ phung đăo ti ƀuôn Têsalônik răng đăm brei phung khua pô hưn êlâo soh, pô mtô soh duah mplư hŏng klei hgăm kơ hruê Khua Yang lŏ hriê ôh, Khua ƀĭng kna Y-Pôl mñă kơ dua mta klei srăng truh yuôm čiăng kơ phung đăo dưi thâo kral “hruê Khua Yang giăm truh leh.” Anăn jing, êlâo tinăn srăng mâo klei lui wir klei đăo, êdei tinăn “Mnuih Soh srăng bi êdah, pô anei pioh leh kơ rai luč” (êlan 3).
Klei lui wir klei đăo ti êlan 3 amâo djŏ čiăng lač kơ phung amâo đăo sĭt kơ Khua Yang kyuanăn lui wir Khua Yang ôh, ƀiădah čiăng lač kơ pô bi kdơ̆ng hlăm mngăt, klah đuĕ mơ̆ng klei đăo, hngah kơ Aê Diê. “Mnuih soh, pô pioh leh kơ klei rai luč” čiăng lač kơ pô bi kdơ̆ng hŏng klei bhiăn. Dưi lač pô anăn jing Anti-Christ (Pô bi kdơ̆ng hŏng Yang Krist) hŏng klei jing ñu snei, jing “pô bi kdơ̆ng”, “bi mđĭ ñu pô ti dlông hĭn kơ jih jang”, arăng pia kơ ñu “yang” leh anăn “kkuh mpŭ” kơ ñu, ñu bŏ hŏng klei mgao “tơl ñu dôk gŭ hlăm sang yang Aê Diê” leh anăn “hưn kơ ñu pô jing Aê Diê” (êlan 4). Anti-Christ ngă kơ phung đăo thâo săng soh kơ klei Khua Yang Yêsu srăng lŏ hriê kyuanăn digơ̆ êdu ai, huĭ leh anăn lui wir Khua Yang čiăng đăo leh anăn kkuh mpŭ kơ klei luar Satan. Leh anăn anei yơh jing klei Khua ƀĭng kna Y-Pôl lŏ mñă čiăng kơ phung đăo ti ƀuôn Têsalônik lŏ hdơr kơ ya klei ñu tuôm hưn leh êjai ñu dôk mbĭt hŏng digơ̆ hlăk êlâo dih (êlan 5).
Mơ̆ng dua klei bi knăl Khua ƀĭng kna Y-Pôl hưn anăn, brei grăp čô drei răng bi jăk kơ klei mplư hlăm mngăt ăt mâo hlŏng kơ hruê anei. Klei mplư truh amâo djŏ knŏng ti êngao ôh ƀiădah truh wăt hlăm lam Phung Sang Aê Diê mơh kyuadah Khua Yang Yêsu hưn leh hlăm hruê knhal tuč srăng mâo lu phung khua pô hưn êlâo soh leh anăn pô mtô soh. Diñu srăng yua klei blŭ leh anăn mblang soh Klei Aê Diê Blŭ čiăng mplư drei (êlan 2). Tơdah hmư̆ sa klei mtô, brei drei “ksiêm dlăng Klei Aê Diê Blŭ čiăng thâo tơdah klei mtô anăn jing sĭt” (Bruă Phung Khua Ƀĭng Kna 17:11). Kăn ruăt đăo rei tơdah arăng lač Krist tinei amâodah ti adih kyuadah Krist soh dôk jŭm dar drei duah nanao êlan čiăng mplư phung anak čô Khua Yang (Y-Mathiơ 24:24-25). Răng bĕ leh anăn wah lač, hriăm Klei Aê Diê Blŭ grăp hruê čiăng thâo kral klei bi knăl kơ hruê Khua Yang srăng lŏ hriê.
Ya drei srăng ngă čiăng dưi dôk kjăp hlăm klei đăo kơ Khua Yang êjai dôk guôn Ñu srăng lŏ hriê?
Wah lač: Ơ Khua Yang khăp ơi, đru kâo dôk sĭt suôr hŏng Ih leh anăn hŏng Klei Ih Blŭ. Brei bĕ kơ kâo mâo klei thâo mĭn čiăng dưi thâo kral phung khua pô hưn êlâo soh, pô mtô soh hŏng klei diñu mtô soh čiăng kơ kâo dưi weh đuĕ mơ̆ng diñu leh anăn đru phung ayŏng adei kâo amâo nao hlăm êlan soh ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Yap 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
