Klei Aê Diê Blŭ: Y-Mathiơ 11:1
Êlan kliăng: “Kyuadah kâo ngă leh sa klei bi hmô kơ diih, čiăng kơ diih msĕ mơh ngă msĕ si kâo ngă leh kơ diih” (Y‑Yôhan 13:15).
Klei êmuh ksiêm mĭn: Ya klei Khua Yang Yêsu ngă leh kơ phung ƀĭng kna? Ya klei Ñu čiăng phung ƀĭng kna ngă? Leh tiŏ nao phung ƀĭng kna, ya bruă Khua Yang Yêsu ngă? Ya klei hriăm drei mâo mơ̆ng klei Khua Yang Yêsu bi hmô?
Y-Mathiơ 11:1 jing kdrêč lŏ čuê mơ̆ng kdrêč 10, leh mtô mtă kơ phung ƀĭng kna hŏng jih ai tiê, Khua Yang Yêsu tiŏ nao phung ƀĭng kna. Boh blŭ “ruê̆ leh bi hriăm” jing bi hriăm leh jih klei čiăng êdi, brei ƀuh Khua Yang Yêsu bi leh bruă mtô bi hriăm phung ƀĭng kna, Ñu thâo sĭt digơ̆ nao srăng tuôm hŏng ya klei leh anăn ya mta čiăng mprăp leh anăn si srăng ngă.
Leh tiŏ nao phung ƀĭng kna snăn ya klei Khua Yang Yêsu ngă? Klei Aê Diê Blŭ brei thâo Khua Yang Yêsu ăt hlŏng đuĕ nao mơh leh anăn. Boh blŭ “đuĕ mơ̆ng anôk anăn” brei ƀuh Khua Yang msĕ si ngă mtam bruă Ñu leh phung ƀĭng kna hiu mtô klei đăo. Boh blŭ “čiăng bi hriăm leh anăn mtô” brei ƀuh Khua Yang Yêsu thâo nanao hdră kñăm Ñu hriê ti lăn ala leh anăn Ñu amâo tuôm lăm lui ôh hdră kñăm anăn, msĕ si klei Ñu lač leh hŏng Khua ƀĭng kna Y-Pêtrôs hlăm Y-Markôs 1: 38: “Ñu lač kơ digơ̆, “Brei drei nao kơ ƀuôn jĕ giăm čiăng kơ kâo dưi mtô tinăn msĕ mơh; kyua kơ klei anăn yơh kâo hriê ”. Khua Yang Yêsu ăt bi hriăm leh anăn mtô wăt tơdah Ñu bi hriăm leh phung khua ƀĭng kna leh anăn tiŏ nao digơ̆ nao hưn klei đăo, Ñu amâo dôk sa anôk čiăng dôk guôn phung khua ƀĭng kna wĭt hưn ƀiădah Ñu ăt nao hlăm dŭm ƀuôn riêng gah Galilê čiăng hưn mdah Klei Mrâo Mrang jăk leh anăn bi hriăm grăp čô mnuih kơ Lăn Adiê.
Khua Yang Yêsu jing gru bi hmô kơ drei hlăm klei mă bruă kơ Aê Diê. Hruê anei lu blư̆ drei tram êlam hlăm lu bruă mă msĕ si mđing hĭn kơ bruă hiu hưn Klei Mrâo Mrang jăk, amâodah sĭt nao mă bruă Aê Diê hlăm sa wưng snăn drei lŏ mâo klei mĭn čiăng kdŭn, lăm lui. Amâodah sĭt dưi jing khua gĭt gai snăn drei lŏ mâo klei mĭn alah hlăm bruă mă. Brei drei dlăng kơ klei Khua Yang Yêsu bi hmô leh anăn tui hriăm Ñu, sa čô nai jih ai tiê, sa čô khua gĭt gai mâo hdră kčah leh anăn kriăng kƀĭn jih hnơ̆ng hlăm bruă Aê Diê jao leh. Kyua anăn leh ruê̆ bruă klam, Khua Yang Yêsu dưi lač hlăm Y-Yôhan 17:4“Kâo bi guh kơang Ih leh ti lăn ala hŏng klei kâo ngă bi jih leh bruă Ih brei kâo ngă”. Drei dôk mnpŭ mni kơ Aê Diê leh anăn bi leh mơ̆ bruă klam Aê Diê jao kơ pô? Drei ăt adôk mâo dŭm bruă hlăm grăp hruê leh anăn mơ̆ng dŭm bruă mă anăn drei dưi hưn kơ Klei Mrâo Mrang Jăk leh anăn hưn mthâo Lăn Adiê kơ phung riêng gah. Sĭt Aê Diê jao kơ drei dŭm êpul điêt, brei jing nai jih ai tiê leh anăn jing khua gĭt gai tui si klei Khua Yang Yêsu Pô bi mtlaih bi hmô.
Diih dôk tui hlue klei Khua Yang Yêsu bi hmô hlăm bruă mtô bi hriăm leh anăn mă bruă kơ Aê Diê mơ̆?
Wah lač: Ơ Khua Yang, akâo kơ Ih brei kâo ƀuh klei Ih ngă leh čiăng kơ kâo ăt tui hriăm klei Ih bi hmô hlăm bruă Ih jao leh kơ kâo.
Dlăng Klei Aê Diê Blŭ hlăm tlâo thŭn: Y‑Êsai 10:5‑26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
