Klei Aê Diê Blŭ: Y‑ Mathiơ 15:1-6
Êlan kliăng: “Snăn kyua klei bhiăn diih pô, diih yap leh klei Aê Diê blŭ jing hơăi mang.” (Y‑Mathiơ 15:6)
Klei êmuh ksiêm mĭn: Khua Yang Yêsu brei thâo ya klei phung khua čih hră leh anăn phung Pharisi ngă soh? Si phung anei khăng mgang tơdah ngă soh klei bhiăn anăn? Hlăm ya boh klei drei msĕ si phung khua čih hră leh anăn phung Pharisi?
Tơdah phung khua čih hră leh anăn phung Pharisi lač kơ phung ƀĭng kna Khua Yang ngă soh hŏng klei bhiăn aduôn aê, Khua Yang Yêsu ktrâo kơ phung Pharisi ngă soh hŏng klei bhiăn tal êma. Klei Aê Diê Blŭ mtô brei huĭ mpŭ kơ amĭ ama (Klei Kbiă 20:12) leh anăn hlei pô blŭ kơ amĭ ama arăng srăng mdjiê (Klei Kbiă 21:17). Phung Yuđa brei thâo klei bhiăn anei mtô diñu brei huĭ mpŭ, khăp leh anăn rông ba amĭ ama pô, khădah snăn, sa hlăm dŭm klei bhiăn aduôn aê mtô “Tơdah sa čô lač kơ ama amâodah amĭ ñu, Ya mnơ̆ng kâo dưi đru ih, kâo myơr leh kơ Aê Diê, amâo lŏ yuôm brei ñu đru amĭ ama ñu ôh” (êlan 5).
Phung hlue ngă klei bhiăn anei djŏ mơ̆ diñu khăp đei kơ Aê Diê leh anăn čiăng myơr jih jang kơ Aê Diê? Amâo djŏ snăn ôh, diñu dôk hngah kơ bruă klam rông ba amĭ ama kyua huĭ srăng hmăi kơ ngăn drăp pô. Tơdah lač “myơr leh kơ Aê Diê” amâo djŏ ôh jing jih jang ngăn drăp diñu myơr leh kơ Sang Aê Diê. Ƀăng êgei lač “myơr” ƀiădah diñu ăt kriê dlăng ngăn drăp anăn leh anăn yua kơ hdră kñăm hjăn pô, bi hŏng amĭ ama, diñu bi juh pô kyua amâo lŏ mâo bruă klam ôh. Klei bhiăn mơ̆ng aduôn aê anei ba diñu kơ klei hdĭp čuôt klih, leh anăn ngă soh ti anăp Aê Diê kyua diñu ngă soh hŏng klei bhiăn tal êma mơ̆ng Aê Diê.
Hruê anei, lu blư̆ tơdah drei ăt lač “Khăp kơ Aê Diê, khăp kơ Aê Diê” hlăk êjai drei amâo mâo ôh sa bruă ngă klei khăp hŏng phung khăp hơiêng msĕ si amĭ ama leh anăn ayŏng amai adei pô. Khua ƀĭng kna Y‑Yôhan mtô leh hlăm I Y‑Yôhan 4:20 lač, “Hlei pô lač, “Kâo khăp kơ Aê Diê,” ƀiădah bi êmut kơ ayŏng adei ñu, ñu jing sa čô luar yơh. Kyuadah hlei pô amâo khăp ôh kơ ayŏng adei ñu, pô ñu tuôm ƀuh leh, si ñu dưi khăp kơ Aê Diê, Pô ñu amâo tuôm ƀuh ôh”. Klei Aê Diê čang hmăng kơ drei jing “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt” (Y‑Yôsuê 1:8). Wăt tơdah drei dưi săn asei, tŭ klei luč liê amâodah bi mlih hŏng klei pô khăp čiăng ƀiădah drei mâo klei mđĭ ai tơdah thâo pô dôk ngă hlue si klei Aê Diê čiăng leh anăn Ñu srăng mơak kyua drei. Akâo kơ Khua Yang brei drei amâo mgang ôh kơ bruă ngă amâo gưt Klei Aê Diê Blŭ mtô, amâo yua ôh dŭm mta phŭn hmư̆ msĕ si “djŏ guôp”, ƀiădah brei jih ai tiê thâo răng kyua tơdah amâo hlue si Klei Aê Diê Blŭ mtô, drei dôk ngă soh hŏng Ñu.
Drei khăng mgang kơ dŭm bruă ngă amâo hlue ngă Klei Aê Diê Blŭ mtô mơ̆?
Wah lač: Ơ Khua Yang, akâo kơ Ih đru kâo gưt asăp Aê Diê hlăm djăp boh klei hlăm klei hdĭp, akâo kơ Ih đru kâo amâo dưi lui amâodah čŏng mtrŭn hnơ̆ng čuăn hlăm Klei Ih Blŭ kyua thâo sĭt kâo srăng mâo klei jăk mơak hlăm klei pô gưt asăp. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Hêbrơ 5:11-7:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
