Klei Aê Diê Blŭ: Y-Mathiơ 13:31-32
Êlan kliăng:“Kyuanăn Kâo hưn kơ diih, jih jang klei soh leh anăn jih jang klei blŭ mgao dưi mâo klei pap brei kơ mnuih, ƀiădah klei blŭ mgao hŏng Yang Mngăt Jăk amâo dưi mâo klei pap brei ôh. Leh anăn hlei pô blŭ bi kdơ̆ng hŏng Anak Mnuih dưi mâo klei pap brei; ƀiădah hlei pô blŭ bi kdơ̆ng hŏng Yang Mngăt Jăk, amâo dưi mâo klei pap brei ñu ôh, thâodah hlăm ênuk anei amâodah hlăm ênuk êdei srăng truh.” (Y-Mathiơ 13:31-32)
Klei êmuh ksiêm mĭn: Hlăm klei bi hriêng anei Khua Yang Yêsu bi êdah si Ƀuôn ala mtao adiê jing? Ya ngă Ñu yăl dliê bi êdah msĕ snăn? Ya klei bi mđĭ ai drei mâo tơdah hriăm kơ klei Ƀuôn ala mtao adiê đĭ hriê kơ prŏng?
Khua Yang Yêsu yăl dliê kơ Ƀuôn ala mtao adiê jing msĕ si “sa asăr djam bei hat”, jing sa mta asăr mjeh điêt hĭn ƀiădah tơdah gơ̆ čăt dlông leh srăng jing sa ƀĕ ana kyâo tơl “čĭm hlăm adiê ngă hruh ti adhan ñu”. Khua Yang Yêsu yăl dliê kơ Ƀuôn ala mtao adiê msĕ snăn čiăng bi sĭt klei hưn êlâo hlăm Y-Êsai 53:2 “Kyuadah Ñu hriê kơ prŏng leh ti anăp Yêhôwa msĕ si sa mnơ̆ng mda arăng pla, msĕ si agha kbiă leh mơ̆ng lăn thu. Ñu amâo mâo klei kƀăt amâodah klei kdrăm ôh tơl brei drei čiăng dlăng kơ Ñu, leh anăn amâo mâo klei siam ôh tơl drei khăp kơ Ñu.” Anăn jing klei phung mnuih ênuk Khua Yang Yêsu tĭng ksiêm soh kơ Ñu, diñu mưč kơ anôk Khua Yang Yêsu kbiă hriê, diñu amâo uêñ ôh kơ klei Khua Yang Yêsu mtô ƀiădah duah êlan kčŭt kơ bruă Khua Yang Yêsu ngă čiăng bi luč knuih Gơ̆. Ƀiădah amâo djŏ ôh kyua klei anăn Ƀuôn ala mtao adiê amâo dưi đĭ hriê kơ prŏng, ƀiădah mâo sa hruê ñu srăng “Prŏng”, “Kjăp” leh anăn “Mâo Boh Tŭ Dưn”. Wăt tơdah phung tui hlue Khua Yang Yêsu tal êlâo mâo knŏng ƀiă dưn, ƀiădah knŏng tlâo pluh thŭn êdei leh Khua Yang Yêsu đĭ wĭt kơ adiê, Klei Mrâo Mrang Jăk dưi bi lar pral êdimima, arăng hưn kơ tar ƀar čar Asi leh anăn čar Ơrôp.
Hruê anei, năng ai drei mâo klei mĭn dôk jưp tơdah ƀuh phung mnuih Viêt Nam đăo kơ Khua Yang knŏng ƀiă snăk, mâo lu mnuih ăt dôk bi kah hŏng phung đăo kơ Khua Yang Yêsu, ăt dôk mâo lu klei dleh dlan hŏng phung ƀĭng găp mă bruă mbĭt amâodah hŏng phung riêng gah tơdah drei bi êdah klei đăo djŏ tui si hnơ̆ng čuăn mơ̆ng Klei Aê Diê Blŭ. Brei drei hdơr, năng ai mnuih mkăn ka thâo săng ôh kơ Klei Mrâo Mrang Jăk, bi drei, drei thâo klă snăk kơ boh yuôm Klei Mrâo Mrang Jăk leh anăn kơ klei Ƀuôn ala mtao adiê jing prŏng. Drei amâo hêñ amâodah huĭ ôh tơdah bi êdah klei đăo, kăn drei êdu ai leh anăn kdŭn lei tơdah arăng tlao mưč. Brei phung đăo thâo Ƀuôn ala mtao adiê đĭ hriê kơ prŏng leh, ară anei dôk đĭ hriê kơ prŏng leh anăn srăng đĭ hriê kơ prŏng nanao, leh anăn êdei anăp tơdah Khua Yang Yêsu lŏ hriê snăn klei prŏng Ƀuôn ala mtao adiê srăng bi êdah hŏng klei klă ênŭm. Wăt tơdah ară anei hin Ƀuôn ala mtao adiê ka bi êdah klă ênŭm dưn mơh ƀiădah Phung Sang Aê Diê yơh jing anôk kơ lăn ala anei knang hlăm lu mta klei “čĭm hlăm adiê hriê ngă hruh ti adhan ñu” (êlan 32). Brei drei lač msĕ si Khua ƀĭng kna Y-Pôl hlăm Rôm 1:16 snei: “Sĭt nik kâo amâo hêñ ôh kơ klei mrâo mrang jăk, kyuadah ñu jing klei myang Aê Diê pioh bi mtlaih grăp čô hlei pô đăo, phung Yuđa êlâo hĭn, leh anăn wăt phung Grĕk mơh.”
Si ngă drei thâo mơ̆ kơ klei jing prŏng Ƀuôn ala mtao adiê ară anei hin leh anăn ti êdei anăp?
Wah lač: Ơ Khua Yang, đru kâo amâo hêñ ôh kơ Klei Mrâo Mrang Jăk, ƀiădah đăo kjăp kơ klei Ƀuôn ala mtao Ih jing prŏng, bi êdah nanao klei đăo kơ Ih klă ênŭm hlăm djăp mta klei truh.
Dlăng Klei Aê Diê Blŭ hlăm tlâo thŭn: Y-Luk 2:1-40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
