Klei Aê Diê Blŭ: Klei Mtô Mñă Klei Bhiăn 30:5-10
Êlan kliăng: “Yêhôwa, Aê Diê diih srăng bi lĕ jih jang klei tăm pah anei ti dlông phung ngă kơ diih leh anăn phung roh diih, phung bi knap diih” (Klei Mtô Mñă Klei Bhiăn 30:7)
Klei êmuh ksiêm mĭn: Ya klei Yêhôwa srăng ngă kơ djuê ana bi êmut leh anăn ngă jhat kơ phung ƀuôn sang Ñu? Ya bruă brei phung ƀuôn sang Israel ngă čiăng mâo nanao Aê Diê mgang leh anăn hơêč hmưi? Hlue si ih, ya jing klei lông dlăng prŏng hĭn kơ phung tui hlue Khua Yang?
Trăn Klei Aê Diê Blŭ anei bi êdah wăt tơdah phung ƀuôn sang Israel lar bra djăp anôk kyua amâo hdĭp hlue si Klei Aê Diê Blŭ mtô, ƀiădah klei bi mguôp plah wah Aê Diê leh anăn phung ƀuôn sang Ñu amâo mjưh mdei lă lar ôh. Knŏng čiăng kơ phung ƀuôn sang Aê Diê tŭ ư kmhal klei soh pô, lăm lui klei soh ƀai, wĭt kơ knuih hdĭp huĭ mpŭ mni kơ Aê Diê, snăn klei pap Ñu ăt brei kơ phung ƀuôn sang Ñu čiăng bi klin, lŏ bi mrâo diñu. Amâo djŏ knŏng dŭm năn ôh, Aê Diê lŏ ƀuăn srăng tuh klei bi kmhal kơ djuê ana bi êmut leh anăn ngă jhat kơ phung ƀuôn sang Ñu.
Năng ai mâo lu mta phŭn mdê mdê čiăng kơ dŭm djuê ana mkăn bi êmut leh anăn ngă jhat kơ phung ƀuôn sang Israel, ƀiădah klă sĭt mâo dua mta phŭn ti tluôn anei: Tal sa, Aê Diê diñu kkuh mpŭ amâo msĕ hŏng phung yang amâo mâo sĭt mơ̆ng dŭm djuê ana mkăn ôh. Kyua anăn dŭm djuê ana anăn duah nanao hdră bi mklă yang diñu jing ktang hĭn, leh anăn boh tŭ klă sĭt diñu amâo tŭ jing nanao. Tal dua, kyua klei mdrŏng sah leh anăn êdah êdi hĭn kơ dŭm djuê ana mkăn mơ̆ng phung ƀuôn sang Israel ngă kơ dŭm djuê ana anăn čiăng plah mmiă nanao Israel. Khădah snăn, klei gun kpăk truh mơ̆ng dŭm djuê ana riêng gah srăng amâo dưi jing klei rŭng răng ôh tơdah phung ƀuôn sang Israel hdĭp djŏ tui si bruă klam diñu, anăn jing gưt asăp djăp mta Klei Aê Diê Blŭ mtô. Hlăk anăn djăp klei dleh dlan adôk, Aê Diê srăng msir mgaih kơ diñu.
Klei lông dlăng prŏng hĭn mơ̆ng phung ƀuôn sang Israel leh anăn grăp čô phung đăo amâo djŏ tuôm hŏng klei huĭ hyưt arăng ngă jhat mơ̆ng êngao ôh. Klei lông dlăng phŭn jing bruă djă pioh ai tiê amâo kbưi hŏng Aê Diê leh anăn Klei Aê Diê Blŭ ôh hlăm klei hdĭp mda grăp hruê. Klă sĭt amâo ênưih ôh čiăng djă pioh klei đăo leh anăn klei khăp Aê Diê kluôm ênŭm ti krah klei hdĭp bŏ hŏng klei mplư dŭm dar. Anăn jing mta phŭn ya ngă hdruôm hră Klei Mtô Mñă Klei Bhiăn lu blư̆ mñă kơ phung ƀuôn sang Ñu brei jih ai tiê, jih mngăt huĭ mpŭ kơ Aê Diê, mă bruă knŏng hjăn kơ Ñu đuč, leh anăn mbĭt anăn jing lu klei ƀuăn jăk mơak Ñu brei kơ phung ƀuôn sang Ñu. Hĭn kơ jih jang, Aê Diê thâo klei mplư ăt msĕ si klei dleh dlan, gun kpăk phung ƀuôn sang dôk tuôm grăp hruê. Leh anăn klei Aê Diê čang hmăng kơ phung ƀuôn sang Ñu jing đăm ôh kyua mta phŭn dlăng msĕ djŏ klă lui hĕ bruă klam pô, anăn jing hdĭp gưt asăp Klei Aê Diê Blŭ mtô. Knŏng čiăng kơ drei krơ̆ng kjăp klei đăo leh anăn klei khăp hlăm Aê Diê, klă sĭt Ñu srăng msir mgaih djăp klei dleh đlan hlue si klei thâo mĭn Ñu, leh anăn mbĭt anăn jing klei ƀuăn brei klei jăk mơak kơ hlei pô sĭt suôr hŏng Khua Yang.
Ya klei ngă kơ drei lu blư̆ amâo hdĭp djŏ tui si Klei Aê Diê Blŭ mtô?
Wah lač: Ơ Khua Yang, ti krah klei hdĭp mâo lu klei mplư kwang dar, akâo kơ Ih đru kâo ƀuăn rơ̆ng hdĭp hlue si Klei Aê Diê Blŭ mtô hlăm djăp mta bruă hlăm klei hdĭp čiăng kâo mâo klei jăk mơak Aê Diê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
