II Kevcai 30:5-10
Nqe cim:
“Nws yuav muab tej lus foom tsis zoo no rau nej tej yeebncuab uas ntxub thiab tsimtxom nej” (II Kevcai 30:7)
Lus nug rau sawvdaws xav:
– Tus Tswv uas yog Vajtswv yuav ua dabtsi rau cov neeg uas ntxub thiab tsimtxom Nws haivneeg?
– Feem xyuam cov Yixalayees yuav tsum ua, tus Tswv thiaj tsomkwm thiab foom koob hmoov yog dabtsi?
– Raws peb xav, yam twg yog qhov uas nyuaj tshaj rau tus ntseeg uas nrog tus Tswv mus?
Ntu Vajluskub no qhia paub, txawm yog cov Yixalayees tawg ri sua mus nyob txhua qhov chaw vim qhov uas lawv tsis ua raws li Vajtswv Txojlus qhia, los txojkev sib txuas ntawm Vajtswv thiab cov Yixalayees tsis muaj hnub tu mus li. Tsuav yog tus Tswv haivneeg lees lawv tej kev txhaum, tso kev ua phem tseg, tig rov los ua tus ntseeg zoo, ces Nws txoj koob hmoov yeej nrog nraim lawv, Nws yuav coj thiab pub rau lawv rov muaj tebchaws. Tsis yog li ntawd xwb, Vajtswv tseem coglus yuav rau txim rau cov neeg uas ntxub thiab tsimtxom Nws haivneeg.
Tej zaum muaj ntau lub vimchiv sib txawv, lwm haivneeg thiaj ntxub thiab tsimtxom cov Yixalayees, tiamsis tsuas muaj ob lub vimchiv tshwjxeeb nram qab no: Thib ib, tus Vajtswv uas lawv pehawm tsis zoo li tej tswv uas lwm haivneeg pe. Yog li lwm haivneeg thiaj nrhiav tswvyim ua timkhawv tias lawv tus vajtswv muaj hwjchim dua, tiamsis qhov tseeb tiag lawv ua tsis tau. Thib ob, vim qhov uas cov Yixalayees npluanuj thiab heev dua lwm haivneeg, yog li lwm haivneeg thiaj xav txov lawv. Yog li, qhov kev nyuaj uas tuaj ntawm lwm haivneeg nyob ibncig yuav tsis yog ib qhov kev ntshai rau cov Yixalayees yog tias lawv ua yog lawv feem xyuam, uas yog ua raws li Vajtswv Txojlus qhia. Thaum ntawd txhua yam kev nyuaj, Vajtswv yuav daws tagnrho rau lawv.
Qhov kev nyuaj loj tshaj plaws ntawm cov Yixalayees thiab cov ntseeg Yexus tsis yog ntsib raug tej uas tuaj sab nraud tuaj xwb. Qhov nyuaj yog qhov uas tswj lub siab nyob ze tus Tswv thiab Nws Txojlus nyob hauv kev ua neej txhua hnub. Tseeb tiag tsis yoojyim tswj txojkev ntseeg thiab txojkev hlub tus Tswv kom txaus nkaus nyob hauv lub ntiajteb uas puv npho tej kev txhaum no. Nov yog lub vimchiv Phau ntawv II Kevcai ntau zaus hais rau tus Tswv haivneeg yuav tsum hlub tus Tswv uas yog Vajtswv kawg siab kawg ntsws, ua Nws tes haujlwm xwb, thiab ua qhov ntawd tau txais tej lus cog tseg zoo uas Vajtswv pub. Tus Tswv paub tej kev sim siab thiab tej kev txomnyem, thaiv Nws cov menyuam kev ua neej txhua hnub. Thiab yam uas tus Tswv xav tau ntawm Nws haivneeg yog tsis txhob vim ib lub vimchiv twg es muab yus qhov feem xyuam uas ua raws li Vajtswv Txojlus qhia tso tseg. Tsuav yog peb tuav rawv kev ntseeg thiab kev hlub tus Tswv, Nws yeej yuav daws tej kev nyuaj raws li Nws lub tswvyim, thiab cog lus yuav foom koob hmoov rau cov neeg uas ncaj ncees ntseeg tus Tswv.
Thov Vajtswv,
Tus Tswv, hauv lub neej muaj ntau yam kev sim siab puv nkaus no, nyuam yaus thov cog lus yuav ua raws li Vajtswv Txojlus qhia hauv kev ua neej kom xwv tau txais Koj tej koob hmoov. Nyuam yaus tuav Tswv Yexus lub npe thov, Amees.
Yam dabtsi ua rau peb tsis yeem ua raws li Vajtswv Txojlus qhia ntau zaus?
Nyeem Vajluskub hauv peb lub xyoo: Yausuas 6
Kênh Youtube BHKTHN:
