Klei Aê Diê Blŭ: Y‑Luk 6:12-18
Êlan kliăng: “Hlăk anăn Yêsu kbiă nao đĭ čư̆ čiăng wah lač, leh anăn Ñu dôk wah lač kơ Aê Diê jih sa mlam.” (Y‑Luk 6:12)
Klei êmuh ksiêm mĭn: Ya ngă Khua Yang Yêsu jing Aê Diê ƀiădah Ñu ăt wah lač mơh? Si knuih hdĭp wah lač Khua Yang? Ya ngă Khua Yang wah lač jih sa mlam? Si drei hriăm klei bi hmô wah lač mơ̆ng Khua Yang?
Khua Yang Yêsu jing Aê Diê (Y‑Yôhan 10:30), ƀiădah Ñu jing Aê Diê Pô Tal Dua. Khua Yang lui leh klei Ñu jing mtăp mđơr hŏng Aê Diê čiăng jing Anak (Philip 2:6-8). Hlăm klei jing anăn, ñu gưt asăp Ama Ñu leh anăn wah lač nanao hŏng Ama jing Aê Diê hlue si klei jing Ama – Anak. Mâo đa klei Anak čiăng mdê hŏng klei Ama čiăng ƀiădah Ñu mpŭ leh anăn gưt ngă klei Ama čiăng nanao (Y‑Mathiơ 26:42).
Klei truh hlăm klei yăl dliê anei brei ƀuh Khua Yang Yêsu dôk tlă anăp hŏng klei phung Pharisi kčŭt leh anăn bi rŭng, ruah 12 čô phung khua ƀĭng kna, êjai mtô mblang leh anăn bi hlao phung ƀuôn sang (Y‑Luk 6:17-18). Tơdah kčưm dơ̆ng ngă bruă, ñu mâo lu klei dleh dlan čiăng wah lač. Wah lač leh anăn bŏ hŏng Yang Mngăt Jăk êjai tŭ klei Ƀaptem (Y‑Luk 3:21-22), wah lač kăm ƀơ̆ng huă êjai 40 hruê mlam (Y‑Luk 4:2), wah lač grăp aguah ưm “… Aguah ưm, adiê adôk mmăt, Yêsu kgŭ leh anăn kbiă nao kơ anôk hjăn, leh anăn Ñu wah lač tinăn.” (Y‑Markôs 1:35), amâodah hbĭl mâo mmông găl (Y‑Luk 5:16), amâodah leh jih ruê̆ sa hruê dlông “Leh brei phung lu đuĕ wĭt, Ñu đĭ čư̆ hjăn Ñu, čiăng wah lač. Tơl adiê mmăt leh, Ñu dôk hjăn Ñu tinăn.” (Y‑Mathiơ 14:23)…
Hŏng Khua Yang Yêsu, wah lač hjăn leh anăn dôk hjăn păn hŏng Ama jing sa mta klei yuôm êdimi, jing sa klei bi mjuăt klei hdĭp myang, Ñu djă pioh nanao. Khua Yang khăng wah lač hjăn hlăm anôk kriêp ñăt, ti anôk anăn mâo čư̆ leh anăn mlam mmăt jing anôk leh anăn mmông jăk găl hĭn. Êjai wah lač, Khua Yang Yêsu iêô kơ Aê Diê “Ama” hŏng klei khăp hơiêng, jĕ giăm leh anăn đăo knang. Kdlưn hĭn kơ jih jang, hlăk dôk hlăm asei mlei kđeh, Ñu “…Êjai Ñu dôk hdĭp hlăm asei mlei, Yêsu wah lač leh anăn kwưh hŏng klei ur ktang leh anăn hŏng êa ală…” hlăm war Gêtsêmanê (Hêbrơ 5:7). Khua Yang Yêsu jing Anak Aê Diê mâo jih klei dưi ƀiădah ăt pioh êlâo hĭn kơ klei wah lač nanao leh anăn lui leh kơ drei sa klei bi hmô klă mngač kơ drei kơ ai tiê klei mĭn wah lač.
Leh jih sa mlam wah lač, Khua Yang Yêsu kčưm dơ̆ng sa hruê mrâo bŏ hŏng klei ktang myang hlăm bruă ruah 12 čô khua ƀĭng kna. Anei jing sa bruă yuôm bhăn snăk hlăm bruă Khua Yang ngă kyuadah klei ruah anei amâo djŏ êlưih msĕ si ngă sa klei bi lông čiăng ruah phung mâo klei thâo ôh. Drei ƀuh hlăm êpul phung khua ƀĭng kna mâo djăp mta mnuih, mnuih thâo hră mbĭt hŏng phung trah kan hriăm ƀiă; êlan hdră mĭn klei kđi čar, thŭn gưl ăt mdê mơh; wăt klei ruah Y‑Yuđas Iskariôt ăt mâo klei kñăm čiăng đru mâo mmông găl dôk giăm Khua Yang čiăng mâo klei bi mlih. Jih jang klei dôk hlăm hdră bruă kơ ênuk hlŏng lar Aê Diê sơăi. Kyuanăn yơh, Khua Yang “Wah lač kơ Aê Diê jih sa mlam”.
Khua Yang Yêsu, Anak Aê Diê, lui leh kơ drei sa klei bi hmô wah lač. Klei hdĭp drei ăt tlă anăp hŏng lu mta klei dleh dlan, klei lông dlăng. Mta čuăn kơ klei tŭ jing amâodah hơăi kơ klei hdĭp drei tui hlue Khua Yang jing klei wah lač yơh.
Si ngă diih djă pioh klei mjuăt myang êlâo hĭn, wah lač tui si klei bi hmô mơ̆ng Khua Yang mơ̆?
Wah lač: Ơ Ama doh jăk! Brei kâo tui klei Khua Yang Yêsu bi hmô hlăm klei wah lač, wah lač êlâo hĭn čiăng kơ kâo dưi găn jih klei dleh dlan hlăm klei hdĭp, sĭt suôr tui hlue Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Mmuñ Hđăp 29-30
Kênh Youtube BHKTHN:
