Lukas 6:12-18
Nqe cim:
“Tom qab ntawd, muaj ib hnub Yexus mus thov Vajtswv pem roob, thiab nws nyob pem thov Vajtswv ib hmos” (Lukas 6:12)
Lus nug rau sawvdaws xav:
– Vim li cas Tswv Yexus yog Vajtswv los Nws kuj tseem thov Vajtswv?
– Tswv Yexus muaj lub neej thov Vajtswv li cas?
– Vim li cas Tswv Yexus thov Vajtswv ib hmos kaj ntug?
– Peb kawm Tswv Yexus tus qauv thov Vajtswv li cas?
Tswv Yexus yog Vajtswv (Yauhas 10:30), tiamsis los ntawm lub meejmom Nws yog Vaj Leej Tub. Tswv Yexus tau tso lub meejmom sib luag li Vaj Leej Txiv tseg los ua Leej Tub (Filipis 2:6-8). Hauv lub meejmom ntawd Nws mloog Leej Txiv lus thiab pheej sib txuas nrog Leej Txiv li Txiv-Tub. Muaj qee lub sijhawm Leej Tub dej siab txawv Leej Txiv dej siab tiamsis Nws yeej hwm thiab mloog raws li Leej Txiv siab nyiam xwb (Mathais 26:42).
Lub sijhawm hauv zaj xwm no qhia pom Tswv Yexus tabtom ntsib kev tawmtsam thiab tsim kev kub ntxhov ntawm cov Falixais, xaiv 12 tug thwjtim, qhuab qhia thiab kho mob rau tej pejxeem sawvdaws (Lukas 6:17-18). Thaum pib ua haujlwm, Tswv Yexus muaj ntau yam kev cheemtsum thov Vajtswv. Thov Vajtswv thiab puv npo Vaj Ntsujplig lub sijhawm ua kevcai raus dej (Lukas 3:21-22), yoo mov thov Vajtswv 40 hnub (Lukas 4:2), Thov Vajtswv txhua tagkis sawv ntxov “Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qhov chaw uas tsis muaj neeg thiab thov Vajtswv” (Malakaus 1:35), Lossis txawm yog qhov twg los tsuav yog muaj sijhawm (Lukas 5:16), lossis thaum xaus ib hnub “Tom qab uas Yexus kom lawv mus tsev tas lawm, nws tib leeg nce mus thov Vajtswv pem roob. Thaum tsaus ntuj lawm nws tseem nyob nws pem roob” (Mathais 14:23)…
Nyob hauv Tswv Yexus, kev thov Vajtswv ib leeg ntsiag to nrog Leej Txiv yog yam uas cheemtsum heev, thiab yog tus cai sab ntsujplig Tswv Yexus pheej coj rawv. Tswv Yexus pheej thov Vajtswv ib leeg ntawm tej chaw ntsiag to, saum roob thiab hmo ntuj yog qhov chaw thiab lub sijhawm uas zoo tshaj plaws. Thaum thov Vajtswv, Tswv Yexus pheej hu Vajtswv ua “Txiv” qhia tshwm kev sib hlub, sib ncawg thiab ntseeg siab. Qhov uas zoo tshaj plaws thaum uas Tswv Yexus tseem hnav cev nqaij daim tawv, “…nws thov nws quaj thiab los kua muag kawg li. Vajtswv mloog nws tej lus thov, rau qhov nws txo nws lub hwjchim thiab muab nws txojsia tso plhuav rau Vajtswv kav” hauv lub vaj Khexemanes (Henplais 5:7). Tswv Yexus yog Vajtswv tus ua tau ib puas tsav yam Leej Tub tiamsis Nws tseem muab kev thov Vajtswv tso siab dua txhua yam thiab tseg tau tus qauv zoo rau peb txog kev thov Vajtswv.
Tom qab uas thov Vajtswv ib hmos kaj ntug tas, Tswv Yexus pib hnub tshiab puv npo Vajtswv lub hwjchim rau tes haujlwm xaiv 12 tus thwjtim. Nov yog ib tes haujlwm tseemceeb heev hauv Tswv Yexus lub luag haujlwm, vim qhov kev xaiv no tsis yooj yim li ib txoj kev sib tw nrhiav tus neeg txawj ntse. Peb pom hauv cov thwjtim muaj txaus txhua hom tibneeg, muaj cov kawm txawj ntse, muaj cov kws ntaus ntses, muaj cov ceev tebchaws, muaj cov xyoo laus, xyoo hluas sib txawv thiab kiag Yudas Ixakali-us tau xaiv los nyob ze Tswv Yexus kom nws hloov pauv. Vim txhua yam ntawd puavleej nyob rau hauv Vajtswv kev npaj tseg lawm. Twb yog vim li ntawd Tswv Yexus thiaj thov Vajtswv ib hmos kaj ntug.
Tswv Yexus yog Vajtswv Leej Tub, Nws tseg tau ib tug qauv thov Vajtswv rau peb. Peb lub neej yeej ntsib ntau yam kev txomnyem, kev sim siab. Yam uas pab peb kovyeej lossis swb hauv kev nrog tus Tswv mus yog kev thov Vajtswv.
Thov Vajtswv,
Leej Txiv tus dawbhuv! Thov pab nyuam yaus kawm tus qauv thov Vajtswv ntawm Tswv Yexus, saib kev thov Vajtswv yog yam tseemceeb kom hla dhau tej kev nyuaj hauv lub neej, ncajncees nrog tus Tswv mus txog hnub kawg. Nyuam yaus tuav Yexus Khetos lub npe thov, Amees.
Peb puas saib kev thov Vajtswv yog yam tseemceeb, thiab puas xyaum thov Vajtswv raws li Tswv Yexus tus qauv?
Nyeem Vajluskub hauv peb lub xyoo: Phau Ntawv Nkauj 29-30
Kênh Youtube BHKTHN:
