Klei Aê Diê Blŭ: Y‑Yôhan 20:19-22
Êlan kliăng: “Msĕ si Ama tiŏ hriê leh kâo, msĕ snăn mơh kâo tiŏ nao diih.” (Y‑Yôhan 20:21b).
Klei êmuh ksiêm mĭn: Ti anôk phung ƀĭng kna Khua Yang Yêsu dôk hlăk anăn? Si ngă ai tiê digơ̆? Ya klei Khua Yang Yêsu ngă tal êlâo hĭn hlăk Ñu hriê bi êdah kơ digơ̆? Ya bruă Khua Yang ngă tơdah Ñu tiŏ nao digơ̆? Ya klei yuôm hŏng diih tơdah dưi mâo Khua Yang tiŏ nao?
Tlam hruê tal sa hlăm hruê kăm, jing hruê Khua Yang Yêsu kbiă lŏ hdĭp mơ̆ng phung djiê, jih jang phung ƀĭng kna Ñu dôk bi kƀĭn ti sa anôk hgăm kyua huĭ kơ phung Yuđa (êlan 19). Khădah khua ƀĭng kna Y‑Yôhan leh anăn khua ƀĭng kna Y‑Pêtrôs ƀuh leh mơh msat êhŏng (Y‑Yôhan 20:3-10), wăt H’Mari Madala truh leh ti msat, tuôm leh hŏng Khua Yang Yêsu kbiă lŏ hdĭp leh anăn hưn lač kơ phung ƀĭng kna jih jang klei (Y‑Yôhan 20:11-18) ƀiădah digơ̆ ăt rŭng răng, huĭ hyưt leh anăn đuĕ dăp mơ̆ng phung Yuđa. Khua Yang Yêsu thâo săng klă ai tiê digơ̆. Kyuanăn, klei tal êlâo hĭn Khua Yang ngă jing bi juh digơ̆ hŏng klei lač: “Brei klei êđăp ênang dôk mbĭt hŏng diih.” Khua Yang thâo mta klei phung ƀĭng kna čiăng hĭn hlăk anăn jing klei êđăp ênang yơh (êlan 19). Leh anăn, Ñu brei digơ̆ dlăng “kngan leh anăn djiêu” adôk gru êka čiăng kơ digơ̆ đăo Ñu jing Nai digơ̆ pô yơh. Phung ƀĭng kna ƀuh leh anăn thâo kral Khua Yang Yêsu snăn digơ̆ hơ̆k mơak snăk (êlan 20).
Leh blŭ hrăm mbĭt, Khua Yang Yêsu thâo kơ phung ƀĭng kna Ñu adôk čiăng snăk mâo klei êđăp ênang, kyuanăn lŏ sa blư̆ Ñu lač kơ digơ̆ “Brei klei êđăp ênang dôk mbĭt hŏng diih” Leh mmông anăn mtam, Ñu jao bruă tiŏ nao yuôm bhăn kơ phung ƀĭng kna, “Msĕ si Ama tiŏ hriê leh kâo, msĕ snăn mơh kâo tiŏ nao diih.” (êlan 21). Êlâo kơ Khua Yang “tiŏ nao” digơ̆, Ñu bi klă bruă jao kơ Ñu jing msĕ si rup bi hmô čiăng kơ digơ̆ tui ngă msĕ snăn. Phung ƀĭng kna tui hlue Khua Yang mâo tlâo thŭn êgao, digơ̆ ƀuh leh bruă ngă Khua Yang Yêsu leh anăn thâo klă ya jing bruă Aê Diê Ama tiŏ hriê Ñu. Ară anei, Ñu jao bruă tiŏ nao anăn kơ phung ƀĭng kna Ñu lŏ čuê ngă hlăk leh Ñu đĭ wĭt kơ adiê. Ƀiădah, Khua Yang Yêsu thâo klă kơ digơ̆ amâo dưi ngă ôh bruă tiŏ nao anăn hjăn păn ƀiădah čiăng mâo Yang Mngăt Jăk nao mbĭt. Kyuanăn, Ñu “ƀhur êwa” čiăng brei Yang Mngăt Jăk kơ digơ̆ (êlan 22). Anei jing klei yuôm bhăn snăk leh anăn čiăng snăk kơ sa čô mâo bruă tiŏ nao. Truh hruê knăm Pantơkôt tal êlâo leh Khua Yang Yêsu đĭ wĭt ti adiê, Yang Mngăt Jăk trŭn hriê, phung khua ƀĭng kna bŏ hŏng Yang Mngăt Jăk leh anăn digơ̆ ngă bruă Khua Yang jao mâo boh lu snăk, dơ̆ng mơ̆ng anăn Phung Sang Aê Diê mkŏ mjing (Bruă Ƀĭng Kna 2:1-47).
Hrue anei, jih jang drei jing phung mă tŭ klei bi mtlaih mơ̆ng pô mkăn, snăn drei ăt lŏ čuê ngă bruă jao Khua Yang tiŏ nao drei hiu hưn Klei Mrâo Mrang Jăk kơ pô mkăn msĕ mơh. Drei mâo leh Yang Mngăt Jăk dôk hlăm ai tiê drei, kyuanăn tơdah hiu hưn Anăn Khua Yang drei amâo lŏ huĭ ôh, kăn êdu ai rei. Dưi mâo Khua Yang tiŏ nao jing sa klei pap kơ grăp čô phung đăo, kyuadah drei jing pô bi ala mơ̆ng Khua Yang čiăng ba klei mrâo mrang klei khăp leh anăn klei êđăp ênang truh kơ jih jang mnuih.
Si ngă drei thâo mơ̆ Khua Yang tiŏ nao drei hlăm lăn ala anei? Si diih ngă bruă Khua Yang jao anei?
Wah lač: Ơ Khua Yang, akâo kơ Ih đru kâo thâo kral nanao klei pap leh anăn bruă klam Khua Yang tiŏ nao čiăng kơ kâo jih ai tiê ngă bruă jao hiu hưn Klei Mrâo Mrang Jăk hŏng klei myang Yang Mngăt Jăk.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 4:8-44
Kênh Youtube BHKTHN:
