Yauhas 20:19-22
19 Hnubkaj thaum tsaus ntuj, cov thwjtim sib sau ua ke rau hauv ib lub tsev thiab liaj qhov rooj huv tibsi, rau qhov lawv ntshai cov Yudais tej nomtswv. Thaum ntawd Yexus hais rau lawv hais tias, “Nej cia li muaj kev kaj siab.” 20 Thaum Yexus hais li ntawd tas, nws cev nws ob txhais tes thiab thws nws sab tav rau lawv saib. Cov thwjtim zoo siab heev rau qhov lawv pom tus Tswv lawm. 21 Yexus rov hais rau lawv dua hais tias, “Nej cia li muaj kaj siab. Leej Txiv txib kuv los li cas, kuv yuav txib nej mus ib yam nkaus li ntawd.” 22 Thaum Yexus hais li ntawd tas, nws txawm tshuab pa rau lawv thiab hais tias, “Nej cia li txais yuav Vaj Ntsujplig tus Dawbhuv.”
Nqi cim:
“Leej Txiv txib kuv los li cas, kuv yuav txib nej mus ib yam nkaus li ntawd” (Yauhas 20:21b).
Lus nug rau sawvdaws xav:
- Tswv Yexus cov thwjtim tabtom nyob qhov chaw twg?
- Lawv lub siab tabtom zoo licas?
- Yam xubthawj uas Tswv Yexus ua thaum tshwm los rau lawv yog dabtsi?
- Nws ua dabtsi thaum yuav txib lawv?
- Tau tus Tswv txib muaj qabhau licas rau peb?
Hnubkaj thaum tsaus ntuj, yog hnub uas Tswv Yexus sawv hauv qhov tuag rov qab los, Tswv Yexus cov thwjtim tabtom sib sau ua ke rau hauv ib lub tsev thiab liaj qhov rooj huv tibsi, rau qhov lawv ntshai cov Yudais tej nomtswv (nqi 19). Txawm yog hais tias Timthawj Yauhas thiab Timthawj Petus twb pom lub qhov ntxa khoob lug cia (Yauhas 20:3-10), Malis Madalas kuj tuaj txog lub qhov ntxa, tau ntsib
Tswv Yexus thiab los qhia txhua yam nws pom rau cov thwjtim paub (Yauhas 20:1118) tiamsis lawv tseem txhawj ntshai thiab khiav nkaum cov Yudais. Tswv Yexus paub meej lawv lub siab txhawj ntshai. Yog li ntawd, yam xubthawj uas nws ua yog hais lus noj qab nyob zoo rau lawv, nplig lawv siab los ntawm lo lus: “Nej cia li muaj kev kaj siab!” Tswv Yexus paub hais tias kev kaj siab yog yam uas cov thwjtim cheemtsum heev nyob rau sijhawm ntawd (nqi 19). Ntxiv mus, Nws cia cov thwjtim saib nws “txhais tes thiab sab tav” uas tseem muaj qhov txhab kom lawv ntseeg hais tias ntawd yog lawv tus Xibfwb tiag. Cov thwjtim thiaj pom thiab paub tseeb hais tias ntawd yog Tswv Yexus tiag tiag, qhov ntawd ua rau lawv zoo siab kawg li (nqi 20).
Tomqab uas sib tham sib nug lawm, Tswv Yexus paub hais tias cov thwjtim tseem cheemtsum kev kaj siab heev, nws thiaj rov nplig lawv siab los ntawm lo lus hais “Nej cia li muaj kaj siab!”. Txuas nkaus ntawd, Nws muab “lub nra” tseemceeb heev cob rau cov thwjtim, Nws hais tias: “Leej Txiv txib kuv los li cas, kuv yuav txib nej mus ib yam nkaus li ntawd.” (nqe 21). Ua ntej uas Tswv Yexus “cob lub nra rau” lawv, Nws hais khov kho hais tias “Nws txais lub nra ntawm Leejtxiv” ua qauv rau cov thwjtim xyaum. Cov thwjtim raws Tswv Yexus qab peb lub xyoos dhau los, lawv twb pom Tswv Yexus “lub nra” thiab paub meej lub luag haujlwm uas Vaj Leejtxiv txiv txib Tswv Yexus los ua yog dabtsi lawm. Nimno, Tswv Yexus muab “lub nra” ntawd cob rau cov thwjtim cia lawv ua haujlwm txuas ntxiv tomqab uas Nws rov mus saum ntuj lawm. Tiamsis Tswv Yexus paub meej hais tias lawv yuav ua tsis tau tes haujlwm no tib leeg, lawv cheemtsum tau Vaj Ntsujplig nrog ua haujlwm. Yog li ntawd, Nws thiaj “tshuab pa” pub Vaj Ntsujplig rau lawv (nqi 22). Qhov no yog yam tseemceeb thiab cheemtsum kawg nkaus rau ib tug neeg uas tau tus Tswv txib. Thaum txog thawj hnub Peetekos tomqab uas Tswv Yexus mus saum ntuj lawm, Vaj Ntsujplig tau nqis los, cov timthawj tau puv npho Vaj Ntsujplig thiab ua tes haujlwm uas Tswv Yexus cob rau lawv tawg paj txi txiv kawg li, txij thaum ntawd los tau tsim tsa muaj Vajtswv Pawg Ntseeg (Tes Haujlwm 2:1-47).
Niaj hnub nim no, peb sawvdaws yog cov uas tau txais kev cawmdim los ntawm lwm tus qhia peb, peb yuavtsum ua ntxiv lub luag haujlwm uas Tswv Yexus txib peb ua yog tshajtawm Txojmoo Zoo rau lwm tus. Peb twb tau Vaj Ntsujplig los kav hauv lub siab lawm, yog li ntawd thaum tawm mus tshajtawm Vajtswv lub npe, peb tsis txhob txhawj ntshai thiab tsis txhob poob siab. Tau tus Tswv txib yog ib txoj koob hmoov zoo kawg nkaus rau peb txhua tus ntseeg vim peb tau los ua tus sawv cev ntawm tus Tswv coj txoj xov hais txog kev hlub thiab kev kaj siab mus qhia rau txhua tus.
Peb puas zeem paub hais tias tus Tswv muab “lub nra cob rau peb ua” hauv ntiajteb no? Peb ua tes haujlwm uas tus Tswv txib zoo licas lawm?
Thov Vajtswv:
Tswv Yexus, thov Koj pab nyuamyaus niaj hnub zeem paub txoj koob hmoov thiab lub nra thaum tau Koj txib, kom nyuamyaus tas siab ua lub luag haujlwm tshajtawm Txojmoo Zoo los ntawm Vaj Ntsujplig lub fwjchim. Ameeg.
Kênh Youtube BHKTHN:
