Klei Aê Diê Blŭ: Y‑Yôna 2:1‑10
Êlan kliăng: “Ƀiădah kâo srăng bi mni kơ Ih, kâo srăng myơr mnơ̆ng ngă yang kơ Ih; ya klei kâo ƀuăn leh kâo srăng bi sĭt. Klei bi mtlaih kbiă hriê mơ̆ng Yêhôwa!” (Y‑Yôna 2:9)
Klei êmuh ksiêm mĭn: Ya ngă khua pô hưn êlâo Y‑Yôna êran đuĕ kơ Khua Yang? Ya jing boh phŭn klei wah lač? Ya klei ñu ƀuăn rơ̆ng hŏng Khua Yang? Ya klei hriăm drei mă tŭ?
Klei Aê Diê Blŭ mtă brei khua pô hưn êlâo Y‑Yôna nao kơ ƀuôn prŏng Niniwơ ur bi kdơ̆ng hŏng phung Niniwơ “Kyuadah Kâo thâo klei jhat ƀai diñu đĭ leh truh kơ Kâo” (Y‑Yôna 1:2). Ƀiădah hrô kơ nao kơ Niniwơ tĭng nah ngŏ dưr, snăn ñu lĕ đĭ kŭmpăn êran đuĕ kơ čar Tarsis tĭng nah yŭ. Khua pô hưn êlâo Y‑Yôna amâo čiăng ôh phung ƀuôn sang jhat ƀai Niniwơ kmhal kơ klei soh, ñu huĭdah Aê Diê jing “Aê Diê thâo ngă jăk, thâo pap, amâo djăl ăl ôh, bŏ hŏng klei jăk, leh anăn bi mlih klei mĭn amâo ngă klei jhat ôh ” (Y‑Yôna 4:2). Ñu čiăng ƀuh diñu tŭ klei bi kmhal. Ƀiădah Khua Yang mơĭt angĭn êbŭ êa ksĭ poh yă tơl kŭmpăn păt čiăng mčah, êjai anăn ñu dôk pĭt jăk hlăm lam kŭmpăn. Phung kahan kŭmpăn huĭ, diñu ngă klei bi mđăo čiăng thâo kyua hlei pô klei jhat anei truh, leh anăn klei mđăo lĕ djŏ kơ khua pô hưn êlâo Y‑Yôna. Ñu hưn sĭt ñu êran đuĕ kơ Aê Diê, phung mnuih anăn hwiê ñu hlăm êa ksĭ hŏng klei mgô̆, leh anăn êa ksĭ ngơ ngĭn amâo lŏ poh yă ôh (Y‑Yôna 1). Aê Diê mkăp sa drei kan prŏng brei lun ñu.
Dôk hlăm tian kan tlâo hruê tlâo mlam, khua pô hưn êlâo Y‑Yôna găn leh klei knap mñai huĭ hyưt tơdah dôk giăm hŏng klei djiê. Ñu thâo kral boh klei dleh dlan ñu pô. “Mơ̆ng tian ƀuôn phung djiê” mblang jing mơ̆ng msat, ñu gĭr iêô kwưh kơ Khua Yang (êlan 1‑3). Ñu hưn mdah klă klei luč klei čang hmăng mơ̆ng tian kan. Pruê̆ blŭ “kâo trŭn leh kơ tur čư̆” (êlan 6) mblang jing “ti gŭ lăn” amâodah “ƀăng êlam”, hưn mdah anôk pioh dơr phung djiê. Ñu thâo kral klei hdĭp ñu dôk đuĕ nao ƀrư̆ ƀrư̆, klei djiê sĭt nik srăng truh. Hlăm mnĭt mmông găn bhiâo anei, klei mĭn ñu dơ̆ng wĭr phă Khua Yang leh anăn kơ “Sang Yang Doh Jăk” Ñu (êlan 4, 7). Ñu dôk hmăng hmưi klei bi mtlaih mơ̆ng Khua Yang, Khua Yang hmư̆ leh klei ñu wah lač leh anăn bi mtlaih ñu.
Aê Diê yua leh klei knap mñai msĕ si sa bĕ giê hnuăt khăp hơiêng čiăng mkra mjuăt khua pô hưn êlâo Y‑Yôna, đru ñu dlăng phă Khua Yang, wah lač kơ Khua Yang, lŏ wĭt đup gưt kơ Khua Yang leh anăn thâo khăp kơ mngăt mnuih dôk rai luč. Boh tŭ dưn, ñu myơr klei bi mni leh anăn ƀuăn srăng bi sĭt klei ñu ƀuăn rơ̆ng, mbĭt hŏng anăn ñu ăt myơr klei mpŭ mni klei bi mtlaih kbiă hriê mơ̆ng Khua Yang leh anăn thâo kral sĭt klei ktang myang Ñu jing prŏng hĭn (êlan 9). Yêhôwa bi êdah ai tiê pap kơ ñu ăt msĕ si bi êdah klei pap hŏng phung ƀuôn sang Niniwơ mơh.
Aê Diê Pô mâo jih klei dưi, Pô doh jăk leh anăn ăt jing Aê Diê bŏ hŏng klei jăk. Hruê anei, Khua Yang ăt yua klei knap mñai, klei lông dlăng čiăng bi hriăm drei. Tơdah dôk găn klei knap mñai snăk, đăm drei êdu ai, luč klei čang hmăng, amâodah blŭ dŭñ dŭñ ôh, ƀiădah dlăng bĕ phă Khua Yang Pô bŏ hŏng klei jăk, wah lač hŏng Ñu msĕ si khua pô hưn êlâo Y‑Yôna hlăk êlâo.
Si ngă drei jih ai tiê wah lač kơ Aê Diê hŏng klei kmhal kơ klei mĭn soh čhuai drei, leh anăn kăp čiăng hiu hưn Klei Mrâo Mrang Jăk kơ lu mnuih mơ̆?
Wah lač: Ơ Ama bŏ hŏng klei jăk, pap brei kơ kâo kyuadah lu blư̆ kâo ngă soh amâo gưt asăp Ih ôh. Brei kâo đup gưt kơ Khua Yang nanao leh anăn mâo ai tiê thâo khăp kơ phung ka thâo kral Khua Yang, hŏng bruă ngă atăt diñu hriê kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
