Klei Aê Diê Blŭ: Y-Mathiơ 20:20-23
Êlan kliăng: “Lăn ala leh anăn klei ñu tluh srăng êgao tuč, ƀiădah hlei pô ngă klei Aê Diê čiăng srăng dôk hdĭp hlŏng lar.” (I Y-Yôhan 2:17)
Klei êmuh ksiêm mĭn: Ya klei amĭ Y-Yôhan leh anăn Y-Yakơ akâo kơ Khua Yang Yêsu? Mơ̆ng klei Khua Yang wĭt lač, ya klei Ñu čiăng phung ƀĭng kna thâo săng tơdah tui hlue Khua Yang? Hlăm ya boh klei drei mâo klei čang hmăng msĕ si Y-Yôhan leh anăn Y-Yakơ?
Wăt tơdah hmư̆ leh klei Khua Yang Yêsu lač kơ klei Ñu tŭ knap mñai leh anăn kbiă lŏ hdĭp truh tlâo blư̆, ƀiădah phung khua ƀĭng kna ăt ka thâo săng ôh. Diñu bi mĭn Khua Yang Yêsu nao ti ƀuôn Yêrusalem čiăng ngă klei krŭ kdơ̆ng leh anăn jing mtao. Kyua anăn diñu hnêč akâo kơ bruă klam prŏng hĭn hlăm sang mtao Khua Yang. Klei amĭ Y-Yôhan leh anăn Y-Yakơ akâo jing “…Brei dua čô anak êkei kâo dưi dôk gŭ sa čô tĭng hnuă, sa čô tĭng điâo ih hlăm ƀuôn ala mtao Ih” (êlan 21). Anei jing dua anôk bruă mâo klei dưi prŏng hĭn, jĕ giăm hĭn hŏng mtao.
Khua Yang Yêsu thâo sĭt klei Y-Yôhan leh anăn Y-Yakơ čiăng tơdah Ñu bi anăn kơ digơ̆ jing “Bôanerjơ” jing anak êkei phung anak grăm (Y-Markôs 3:17), leh anăn Khua Yang čiăng đru diñu dua tlaih mơ̆ng klei khăp lăn ala anăn. Tal sa, Khua Yang lač, “Diih amâo thâo săng ôh ya klei diih akâo”. Diñu klă sĭt ka thâo săng ôh klei Khua Yang bi mtlaih ƀiădah ăt thâo săng kơ Ñu msĕ si klei phung Yuđa dôk čang guôn Yang Mêsi truh đru bi mtlaih mơ̆ng phung Rôm kiă kriê leh anăn jing mtao ti lăn. Tal dua, Khua Yang lač, “Dưi mơ̆ diih mnăm atŏ kâo srăng mnăm?” Khua Yang čiăng diñu thâo kơ êlan klei dưi jing êlan knap mñai, êlan tŭ klei dleh dlan. Wăt tơdah diñu ăt ka thâo săng ôh kơ atŏ knap mñai ƀiădah bruă diñu čang hmăng kah mbha klei knap mñai hŏng Khua Yang Yêsu jing sa klei jăk (êlan 22). Khua Yang ăt brei diñu thâo diñu ăt srăng dưi găn sa kdrêč klei knap mñai Khua Yang tŭ (êlan 23). Tal tlâo, Khua Yang brei diñu ktưn hưn dưi dôk tĭng hnuă amâodah tĭng điâo srăng amâo kyua khăp amâodah klei čiăng hjăn pô ôh dưi mâo ƀiădah kyua klei čiăng hlŏng lar mơ̆ng Aê Diê mơ̆ng klei Ñu phat kđi kpă ênô.
Hruê anei, mâo lu mnuih mă bruă hlăm Sang Aê Diê hŏng lu klei čiăng mdê mdê, diñu čiăng kơ pô mâo bruă prŏng hĭn, hnơ̆ng hmăi lu hĭn amâodah srăng ngă ya bruă yuôm bhăn… Phung anei duah djăp hdră čiăng dưi mâo bruă klam pô čang hmăng hŏng djăp mta hdră êlan. Khua Yang Yêsu amâo ƀuah Y-Yôhan leh anăn Y-Yakơ kjham ôh kyua Ñu čiăng bi mlih klei čiăng hlăm kđeh asăr diñu dua jing klei êpa mhao hlăm mngăt. Khua Yang čiăng kơ drei êpa mhao msĕ si Khua Yang hĭn, săn asei lu hĭn. Khua Yang čiăng drei êpa mhao klei hdĭp pô srăng tŭ dưn kơ Ƀuôn Ala Mtao Adiê tơdah dưi ba lu mngăt mnuih lŏ wĭt kơ Khua Yang. Khua Yang Yêsu bi mlih leh klei Y-Yôhan leh anăn Y-Yakơ khăp hlue si kđeh asăr hŏng klei čiăng myơr jih klei hdĭp kơ Ƀuôn Ala Mtao Adiê snăn Ñu ăt srăng ngă klei anăn kơ jih jang drei jing phung đăo leh kơ Ñu hruê anei, knŏng čiăng kơ drei tŭ ư myơr jih klei hdĭp pô kơ Khua Yang.
Drei dôk čiăng kơ klei hlăm kđeh asăr anei amâodah êpa mhao myơr jih klei hdĭp mă bruă kơ Khua Yang?
Wah lač: Ơ Khua Yang Pô myang hĭn, Ih thâo kâo dôk mă bruă kơ Ih hŏng ya klei mtrŭt, akâo kơ Ih bi mlih klei čiăng hlăm kđeh asăr hlăm kâo jing klei êpa mhao hlăm mngăt, myơr jih klei hdĭp kâo kơ Khua Yang leh anăn kơ bruă Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
