Mathais 20:20-23
Nqe cim:
“Lub ntiajteb thiab txhua yam hauv ntiajteb uas neeg ntshaw tabtom yuav dua mus; tiamsis tus uas ua raws li Vajtswv lub siab nyiam, tus ntawd yuav nyob mus ibtxhis li.” (I Yauhas 2:17)
Lus nug rau sawvdaws xav:
- Yakaunpaus thiab Yauhas niam tau thov Tswv Yexus yam dabtsi?
- Dhau ntawm Tswv Yexus cov lus teb, Nws xav kom cov thwjtim nkag siab txog yam dabtsi?
- Muaj tej lub sijhawm twg uas peb kuj muaj lub siab ntshaw zoo li Yakaunpaus thiab Yauhas?
Txawm tias twb hnov Tswv Yexus qhia txog Nws txoj kev txomnyem thiab kev sawv hauv qhov tuag rov los peb zaug lawm, tiamsis cov thwjtim tseem tsis tau nkag siab. Lawv xav tias Tswv Yexus mus nram Yeluxalees yog mus tawmtsam cov neeg Loos thiab sawv ua vajntxwv. Yog vim li ntawd, lawv thiaj mus thov kom tau cov meejmom siab hauv tus Tswv lub tebchaws. Lo lus thov ntawm Yakaunpaus thiab Yauhas niam yog: “… Thov koj coglus rau kuv hais tias, thaum koj los ua Vajntxwv lawm, koj yuav pub kuv ob tug tub, ib tug zaum ntawm koj sab xis thiab ib tug zaum ntawm koj sab laug” (nqe 21). Ntawd yog ob lub meejmom tseemceeb thiab nyob ze vajntxwv tshajplaws.
Tswv Yexus yeej paub zoo txog Yakaunpaus thiab Yauhas lub siab ntshaw thaum Nws muab nkawd hu ua “Npau-anekes” uas txhais hais tias “xob nthe li tub” (Malakaus 3:17), thiab Nws xav pab kom nkawd kovyeej lub siab ntshaw ntiajteb. Qhov xubthawj, Tswv Yexus hais tias, “Yam uas neb thov ntawd, neb tsis totaub”. Nkawd yeej tsis totaub txog Tswv Yexus txoj haujlwm cawm tibneeg, nkawd tseem xav txog Tswv Yexus zoo li cov neeg Yudais uas tabtom tos tus Mexiyas los pab lawv haivneeg dim ntawm cov neeg Loos kev tswjhwm thiab ua vajntxwv kav hauv ntiajteb. Qhov ob, Tswv Yexus hais tias, “Lub khob uas kuv yuav haus, neb puas haus taus?” Nws xav kom nkawd nkag siab tias txojkev muaj yeej yog txojkev txomnyem. Txawm nkawd tseem tsis tau totaub txog lub khob txomnyem, los qhov uas nkawd muaj lub siab xav koom nrog Tswv Yexus hauv Nws txojkev txomnyem kuj yog qhov uas zoo (nqe 22). Tswv Yexus hais meej tias nkawd kuj yuav raug ib feem ntawm Nws txojkev txomnyem thiab (nqe 23). Qhov peb, Tswv Yexus qhia rau nkawd paub tias lub meejmom tau nyob sab xis thiab sab laug hauv Vajtswv lub tebchaws tsis yog raws li neeg lub siab ntshaw, tiamsis yog nyob ntawm Vaj Leej Txiv lub siabnyiam raws li Nws txojkev txiav txim ncaj ncees.
Niaj hnub nimno, muaj coob tug tseem ua haujlwm hauv Pawg Ntseeg raws li tus kheej lub siab ntshaw, lawv xav kom muaj lub meejmom siab, tau sawv daws qhuas, lossis tau ua tej haujlwm tseemceeb,… Cov neeg no siv txhua txoj hau kev kom tau txoj haujlwm uas lawv ntshaw. Tswv Yexus tsis hais nyhav rau Yakaunpaus thiab Yauhas, vim Nws xav hloov nkawd lub siab ntshaw yam nyob ntiajteb los ua lub siab ntshaw yam nyob saum ntuj. Tus Tswv xav kom peb ua tau lubneej yim hnub yim zoo thooj Nws thiab ua txhua yam pab lwm tus. Tus Tswv kuj xav kom peb ntshaw ua lub neej muaj nqis rau Vajtswv lub tebchaws thaum coj tau coob tug los cuag Vajtswv. Tswv Yexus tau hloov Yakaunpaus thiab Yauhas lub siab ntshaw ntiajteb los ua lub siab ntshaw ua txhua yam rau Tebchaws Ceeb Tsheej, thiab Nws kuj yuav ua li ntawd rau peb txhua tus uas ntseeg Nws niaj hnub nimno yog hais tias peb txaus siab muab lub neej rau Nws siv.
Thov Vajtswv,
Vajtswv tus uas paub txhua yam, Koj paub tias nyuam yaus tabtom ua Koj tes haujlwm los ntawm nplooj siab zoo li cas. Thov hloov lub siab ntshaw ntiajteb hauv nyuam yaus los ua lub siab ntshaw yam saum ntuj, thov fij nyuam yaus lub neej rau Koj thiab cia ua Koj txoj haujlwm. Nyuam yaus tuav Yexus Khetos lub npe thov, Amees.
Peb tabtom ntshaw lub meejmom ntiajteb lossis tabtom ntshaw fij lubneej ua tus Tswv tes haujlwm?
Nyeem Vajluskub hauv peb lub xyoos: Yaxayas 22.
Kênh Youtube BHKTHN:
