Mathiơ 20:17-19
“păng jao Inh kơ lu bơngai dêh đe pơlôch. Lu dêh đe gô hiĕk achơ̆ kơ Inh păng teh tach pơjĭ Inh, klaih kơ noh sư pơ̆ng pơlôch hloi tơ ‘long pơglang. Mă-lei kơtĕch pêng năr đơ̆ng rŏng Inh gô iung arih dơ̆ng.”(Mathiơ 20:19)
Nơ̆r jet tơchĕng pơwao:
– Kơplah năm tŏk tơ pơlei Jêrusalem, Kră Yang Yêsu roi ăn kơ lu bơngai pơhrăm kiơ̆ Sư tơdrong kiơ?
– Yua kơ kiơ Sư chông hơdrô̆ lu bơngai pơhrăm kiơ̆ Sư wă roi tơdrong ‘noh?
– Bơ̆n hŏk iŏk tơdrong kiơ đơ̆ng bơ̆n pơhrăm băt gah tơdrong Kră Yang Yêsu chu pơmat?
Kơplah năm tŏk tơ pơlei Jêrusalem, Kră Yang Yêsu chông lu bơngai pơhrăm kiơ̆ Sư weh ataih‘biơ̆ kơ trong wă roi ăn kơ lu sư dôm tơdrong gleh pơmat oei răp gô Sư tơ pơlei Jêrusalem. Tơdrong mă Kră Yêsu chông mơjĭt ’bar ‘nu bơngai pơhrăm kiơ̆ Sư weh ataih ‘biơ̆ kơ trong noh wă roi ăn kơ lu sư băt dôm tơdrong wă truh kơ Sư yua kơ kơplah noh đei tơpôl kon pơlei oei năm hơdai hăm Sư, măl-lei jơ ‘noh jơ gĭt kăl dêh, Kră Yang wă bơtho hơdrô̆ lu jơ̆ng ‘bang Sư đĕch.
‘Nâu wơ̆t mă pêng Kră Yang roi ăn kơ lu jơ̆ng ‘bang gah tơdrong gleh pơmat Sư (Mathiơ 16:21; 17: 22-23),wơ̆t ‘nâu bơih Sư roi se le dêh. Dôm tơdrong Sư wă pŭ iŏk gleh pơmat păng wă iung arih dơ̆ng noh Sư roi ăn kơ lu jơ̆ng’bang truh tơ pêng wơ̆t, Sư wă kơ lu jơ̆ng‘bang hơmet lê̆ jơhngơ̆m, huay kơ tơtăm, huay kơ hli tơrơ, wă kơ đei hơmĕng mưh dôm tơdrong gleh pơmat noh truh kơ Kră Yang dơning kơnh. Kră Yang kư̆m wă kơ lu jơ̆ng ‘bang hlôh tơdrong Sư jur tơ ala teh âu wă lôch tang kon bơngai, păng wă kơ lu jơ̆ng ‘bang hlôh dôm tơdrong mă Sư khŏm pŭ iŏk noh wă dŏng pơklaih huai iŏk kon bơngai đơ̆ng tơdrong yoch. Kră Yang kư̆m tơbăt kơ lu jơ̆ng ‘bang tơdrong Sư gô tơ’bơ̆p lu ‘bok pơgơ̆r tơdrong lui đe Juđê, lu đe ei bơih mă ‘ngơ’ngêl kuă kơ lui kơ Sư ‘Bok Mêsi mă ‘Bok Kei-Dei wơh gô truh tơ lu sư, lu đe ei gô chă đon rôp păng pơlôch lê̆ Sư. Kră Yang Yêsu kư̆m gô tơ’bơ̆p đe Rôm bơngai mă pơgơ̆r teh đak pơm kơnê̆ kơ Sư, Sư chu iŏk đe pơ’brơh kơ Sư lơ tơdrong, đe teh tach pơjĭ Sư,păng pơ̆ng Sư hăm kơđĭnh tơ ‘long pơglang, Sư gô lôch, kơtĕch pêng năr Sư iung arih ‘lơ̆ng rŏ mơyang. (tr.18).
Khul lui bơ̆n dang ei ‘blŏk hơdơ̆r gah tơdrong Kră Yang Yêsu gleh pơmat ‘bơ̆t bơ̆n huch sa pơgơ̆p ‘lơ̆ng rơgoh noh.Trong gleh pơmat Kră Yang ‘nâu bơih tơm tơdrong dŏng pơklaih, tơdah ưh kơ đơ̆ng tơdrong Kră Yang Yêsu chu pơmat,chu lôch lei ‘Bok Kei-Dei ưh kơ mơnat pơklaih bơ̆n đơ̆ng tơdrong yoch ôh, yua kơ “Kiơ̆ kơ tơdrong juăt sơ̆, dôm tơdrong rơgoh, tă rơgoh yua kơ pham.Tơ̆ng ưh kơ huach pham,ưh kơ gơh klaih đơ̆ng tơdrong yoch ôh.”(Hêbrơ 9:22). Đơ̆ng bơ̆n huch sa pơgơ̆p ‘lơ̆ng rơgoh noh tơ’blŏk kơ bơ̆n tơdrong arih bơ̆n rim năr tŏk-bŏk oei pơm kơ Kră Yang lăp đon tơpă ưh? ‘Bok Pôl hlôi nhơ̆m hmoi kơplah sư bơtho khan lu bơngai lui tơ Philip thoi âu: “Mă-lei iĕm kơchăng hli kơ lu bơngai khan sư lui kơjăp mă ưh kơ ‘mêm kơ tơdrong Yêsu lôch tơ’long pơglang. Đei lu bơngai thoi noh dang ei, thoi inh roi kơ iĕm bơih, mă-lei inh wă roi kơ iĕm dơ̆ng.Tơdrong lu sư pơm, inh sơ’ngon dêh, đon ‘brơ̆k mơnat đak măt đơng wă hmoi hloi” (Philip 3:18). Kon pơlei Kră Yang kăl kơ ling-lang ‘blŏk tơdrong ‘nâu, Kră Yang Yêsu lôch păng iung arih wă kơ bơ̆n huay pă hli tơrơ, mă-lei hiôk hian ‘bơ̆t anăp tơdrong yoch păng ‘bơ̆t anăp Kră Yang wă hil phak bơngai yoch, bơ̆n athei arih băt bơnê kơ Kră Yang păng arih ư-ang kơ Anăn Sư.
Bơ̆n kư̆m kăl kơ ‘blŏk tơdrong âu dơ̆ng, ‘bơ̆t năr trong gleh pơmat âu tôch bơih kơnh ‘bôh tơdrong ’lơ̆ng rŏ mơsêh mơyang đơ̆ng tơdrong Kră Yang iung arih kĕ jei noh. Thoi noh, rim wơ̆t bơ̆n sa ‘bĕng păng huch đak hơmu lăm tơdong huch sa ‘lơ̆ng rơgoh, rim ‘nu kơ bơ̆n athei pơm keh nơ̆r pơkă ră roi tơdrong Kră Yang lôch tang bơ̆n đơ̆ng dang ei dĭng truh tơ năr Sư jur dơ̆ng ning-mônh.
Kơkuh kơ Ih Kră Yang, inh bơnê kơ Ih hlôi tuh pham dŏng pơklaih, huai iŏk inh đơ̆ng yoch. Apinh Ih tơgŭm inh ‘mêm kơ Ih đĭ jơhngơ̆m, ling-lang ‘blŏk kơ tơdrong gleh pơmat mă Ih chu pŭ yua kơ inh. Apinh Ih ăn kơ inh arih ư-ang kơ Anăn Ih pơm kơ Ih lăp đon. Inh krao khan yua anăn Kră Yang Yêsu Krist, Amen!
Jơhngơ̆m bơ̆n hăm ‘brơ̆k tơpă ưh kơplah bơ̆n băt kơnăl kơ Kră Yang chu pŭ gleh pơmat yua kơ bơ̆n?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 20-21
Kênh Youtube BHKTHN:
