Klei Aê Diê Blŭ: Klei Kbiă 37:10-29
Êlan kliăng: “Diih amâo thâo hĕ kơ asei mlei diih jing sang kkuh mpŭ kơ Yang Mngăt Jăk dôk leh hlăm diih, Pô diih mă tŭ leh mơ̆ng Aê Diê? Diih amâo lŏ jing dŏ diih pô ôh?” (I Kôrantô 6:19)
Klei êmuh ksiêm mĭn: Ya tlâo mta doh jăk dưi dưm hlăm anôk doh jăk? Si Y-Bêsalel ngă leh mkă hŏng klei Aê Diê ktrâo lač? Ya klei hriăm hruê anei mñă kơ drei hlăm knuih kkuh mpŭ kơ Aê Diê?
Mâo tlâo mta mnơ̆ng doh jăk dưi dưm hlăm anôk doh jăk jing jhưng, jơ̆ng dian leh anăn knưl čuh mnơ̆ng ƀâo mngưi. Tal sa, jhưng ngă hŏng kyâo akasi jŭm dar hŏng mah, mnơ̆ng yua ti dlông jhưng, jam leh anăn čhiên dưm mnơ̆ng ƀâo mngưi, êlŭ, leh anăn kbhê pioh yua tuh mnơ̆ng myơr. Ti jhưng mâo nanao pluh dua klŏ kpŭng dưi dăp dua pruê̆ bi hmô kơ pluh dua êpul djuê ana Israel, leh anăn klei myơr ngă hŏng dŭm mta êa mnăm. Mnơ̆ng myơr ti jhưng bi hmô kơ ai tiê hdơr knga kơ Aê Diê brei leh mnơ̆ng ƀơ̆ng huă čiăng yua grăp hruê kơ pluh dua êpul djuê ana Israel, leh anăn ăt jing klei bi hmô kơ asei mlei leh anăn êrah Khua Yang Yêsu hlăm klei bi mtlaih anak mnuih.
Tal dua, jơ̆ng diăn hŏng mah mâo kjuh pui kđen, jing mrô ênŭm, grăp pui kđen dưi bi msiam msĕ si boh amandê, sa boh leh anăn mnga ñu. Kjuh pui kđen mtrang mngač nanao ti anăp Yêhôwa Aê Diê jih mlam, bi knal kơ klei guh kơang Aê Diê mtrang mngač nanao hlăm Israel. Êa pui yua čuh pui kđen hlăm anôk doh jăk jing êa pui ôliu mâo mnuih ƀuôn sang mkăp brei. Klei mngač mơ̆ng jơ̆ng diăn mñă kơ drei kơ Khua Yang Yêsu jing klei mngač kơ lăn ala (Y-Yôhan 8:12).
Tal tlâo, knưl čuh mnơ̆ng ƀâo mngưi hŏng ana akasi tuh mah doh. Phung khua ngă yang srăng čuh mnơ̆ng ƀâo mngưi dua blư̆ hlăm grăp hruê; aguah ưm leh anăn tlam mmăt (Klei Kbiă 30:7-8) hŏng mnơ̆ng ƀâo mngưi dưi mkra mjing mdê hjăn, pioh hjăn kơ bruă kkuh mpŭ kơ Aê Diê. Klei bi hmô kơ mnơ̆ng ƀâo mngưi jing klei phung đăo wah lač.
Phung ƀuôn sang Israel mphŭn kkuh mpŭ kơ Aê Diê hŏng klei gưt asăp kluôm ênŭm hlăm bruă mkŏ mjing Sang čhiăm leh anăn ngă djăp kdrăp yua doh jăk msĕ si Klei Aê Diê Blŭ mtă leh (Klei Kbiă 25:23-40; 30:1-5, 22-38). Phung khua ngă yang bi ala kơ phung ƀuôn sang ngă klei bhiăn kkuh mpŭ grăp hruê hlăm Anôk kkuh mpŭ. Dŭm kdrăp doh jăk leh anăn klei bhiăn kkuh mpŭ êlâo dih jing rup bi hmô kơ Khua Yang Yêsu. Ñu jing kpŭng leh anăn êa hdĭp, jing klei mngač mtrang atăt êlan kơ grăp čô mnuih hlăm klei kkuh mpŭ kơ Aê Diê năng djŏ. Hruê anei, asei mlei phung ƀuôn sang Aê Diê jing Sang Yang Mngăt Jăk dôk hlăm drei, ktrâo lač kơ drei hlăm klei kkuh mpŭ sĭt nik, djŏ klă. Klei kkuh mpŭ bi mơak kơ Aê Diê jing knuih hdĭp hdơr knga, đăo knang, gưt asăp mơ̆ng grăp čô đăo kơ Ñu.
Ya klei drei ƀuăn bi mlih hlăm klei kkuh mpŭ kơ Aê Diê grăp hruê?
Wah lač: Ơ Khua Yang, akâo kơ Ih đru kâo thâo kkuh mpŭ kơ Ih năng djŏ hŏng klei wah lač hŏng jih ai tiê leh anăn knuih hdĭp gưt asăp Ih. Akâo kơ Ih đru kơ djăp klei kâo mĭn, klei blŭ leh anăn bruă ngă kâo bi êdah kâo jing dŏ Ih leh anăn mâo Ih hlăm klei hdĭp kâo grăp hruê.
Dlăng Klei Aê Diê Blŭ hlăm tlâo thŭn: Y-Luk 11:29-54
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
