Phau Ntawv Nkauj 1:1-3
Nqe cim
“Cov neeg uas tau koob hmoov yog cov uas tsis ua raws li cov neeg siab phem tej lus haub ntxias, thiab tsis xyaum ua raws li cov neeg txhaum ua lossis tsis nrog cov neeg uas tsis hwm Vajtswv koom ua ib lub siab. Tiamsis cov uas tau kev kaj siab yog cov uas hwm tus Tswv txojkevcai thiab kawm txojkevcai ntawd nruab hnub hmo ntuj.” (Phau Ntawv Nkauj 1:1-2)
Lus nug rau sawvdaws xav:
– Ntu Vajluskub no qhia yam dabtsi rau tus Tswv cov menyuam?
– Li cas thiaj yog kawm tus Tswv Txojlus nruab hnub hmo ntuj?
– Peb muaj kev txiav txim siab li cas thaum kawm tas zaj no?
Phau Ntawv Nkauj 1:1-3 qhia peb yam rau tus Tswv cov menyuam hais txog qhov uas tswj lub neej sab ntsujplig kom tau koob hmoov. Tim ib, tswj sab ntsujplig hauv tus ntseeg lub neej. Tus uas sau Phau Ntawv Nkauj no pib hais lo lus “koob hmoov” thaum nws sau phau ntawv. Cov neeg uas “tsis ua raws li cov neeg siab phem tej lus, tsis ua raws li cov neeg txhaum, tsis nrog cov neeg tsis hwm tus Tswv koom siab yuav tau koob hmoov” (nqe 1). “ua raws”, “xyaum”, “nrog” yog tej kev ua txhua hnub ntawm tibneeg. Cia kom tau koob hmoov, tus Tswv cov menyuam cheemtsum paub xaiv ua qhov uas tsimnyog txojkev ntseeg Tswv Yexus. Dua li ntawd, yuav tau mloog tus Tswv hais, tsis taug thiab tsis mloog cov neeg siab phem tej lus hais.
Tim ob, tswj sab ntsujplig tsis yog lub nra hnyav. “Kaj siab hwm tus Tswv txojkevcai” (nqe 2a). Tus Tswv txojkevcai tsis yog muab los ua lub nra hnyav rau Nws haivneeg ris, tiamsis cia kom lawv zeem paub meej qhov uas lawv ua tsis tau ntawm tus kheej, cia tus Tswv hloov kev ua neej, ntseeg thiab muaj kev sib zoo raug nrog tus Tswv zoo dua, sab ntsujplig nyob tso siab plhuav hauv Nws.
Tim peb, tswj sab ntsujplig los ntawm kev kawm tus Tswv Txojlus nruab hnub hmo ntuj. Tus Tswv cov menyuam uas muaj lub neej kawm Nws tej lus nruab hnub hmo ntuj yuav zoo ib yam li tsob ntoo cog ze ntawm ntug dej, tej nplooj ntsuab xiab thiab txi txiv ncw. Txhua yam nws ua vammeej thiab tau tus Tswv foom koob hmoov. Nov yog tus Tswv tej lus cog tseg rau Nws cov menyuam uas rau siab ntso kawm Nws Txojlus nruab hnub hmo ntuj. Nov yog lub tswvyim ua rau cov ntseeg Yexus tau koob hmoov thaum nrog tus Tswv mus.
Nruab hnub hmo ntuj kawm tus Tswv Txojlus tsis tau txhais hais tias tsuas nyeem, kawm xwb tiamsis yog yuav tsum xav thiab ua raws tej ntsiab lus kawm tau tsheej nqe Vajluskub tsis tseg tsis tu li. Lo lus “kawm” muaj lub ntsiab hais tias ua tib zoo saib, xav, kawm kom zoo thiab muaj kev rau siab siv zog ua hauv lub neej txhua hnub, nws tsis yog lam “hnov lub pobntseg sab no dhau mus rau lub pobntseg sab tod”. Tu siab kawg nkaus, muaj ntau tus ntseeg Tswv Yexus lam tau lub npe hais tias mus pehawm tom tuamtsev ib xyoos tas xyoos tuaj, los kev ntseeg yeej tsis loj hlob, yeej tseem “tsis tau paub Yexus Khetos”, vim lawv tsis “kawm” tus Tswv Txojlus nruab hnub hmo ntuj, lawv saib tus Tswv Txojlus tsis tseemceeb rau lawv lub neej, thiab lawv tsis ua raws li qhov tseeb lossis tej kab ke ua raws li tus Tswv Txojlus qhia. Muaj ntau yam nyob puag ncig ntawm peb txojkev ua neej, tej zaub mov noj, nyiaj txiag kuj yog ib yam ua rau peb cia li saib tus Tswv tej lus tsis tseemceeb rau kev ua neej lawm. Thov tus Tswv pub rau peb tiv taus tej kev nyuaj no, peb thiaj tswj tau lub neej sab ntsujplig los kawm tus Tswv Txojlus nruab hnub hmo ntuj kom tau txais tus Tswv tej koob hmoov.
Thov Vajtswv,
Tus Tswv, thov Koj pab nyuam yaus thiab nyuam yaus tsevneeg tswj tau sab ntsujplig nyiam kawm Koj Txojlus, nruab hnub hmo ntuj kawm thiab ua raws li Koj tej lus qhia kom nyuam yaus lub neej tau koob hmoov thiab haum Koj siab. Nyuam yaus tuav Tswv Yexus lub npe thov, Amees.
Peb puas muab qhov uas kawm tus Tswv Txojlus txhua hnub saib ua qhov tseemceeb rau yus?
Nyeem Vajluskub hauv peb lub xyoo: Khiavdim 11
Kênh Youtube BHKTHN:
