I Kôrintô 3:1-8
“Inh pơtăm găr sư boih, na Apôlê pruih đak, mă-lei ‘Bok Kei-Dei ăn kơ tơmam noh gơh wơ̆ tih.”
(I Kôrintô 3:6)
Nơ̆r jet tơchĕng pơwao:
– ‘Bok Pôl sư wă pơma kiơ kơplah sư khan kơ sư kơdih hăm Abôlô khan măr sư jơ̆ “đĭch đam”?
– Sư yua rup pơtih gia kơ bơngai jang mir ‘ba wă tơblang ăn kơ tơdrong kiơ?
– Lu bơ̆n juăt kơ đei jơhngơ̆m đon thoi yơ hăm bơngai mă bơ̆jang hơdai kơ Kră Yang?
Lăm chăl hơdrol, Pôl đei pơma gah tơdrong bơngai oei arih kiơ̆ kơ sĕch akar, ưh tam mă wơ̆ gah bơhngol noh jơ̆ ‘ngeng, tơgar. Lu sư kiơ̆ păng pơ-ư ang kơ bơngai mă chông anhăk, pơm ăn kơ tơdrong tơklah tơklang, pơm khul lăm khul bơngai lui (trong 1-4). Thoi noh, Sư ba ăn tơdrong trŏ lăp, wă kơ wơ̆ ‘lŏ, noh jơ̆ nhen thoi minh ‘nu bơngai bơ̆jang pơm đĭch (trong 5). Kơplah khan kơ Sư kơdih jơ̆ bơngai “đĭch”, Sư wă pơma kơ tơdrong ưh kơ jô̆ sư đei “tơdrong jang” ôh mă lei sư jang ‘noh bơ̆jang kơ Kră Yang păng wih wăn kơ ‘nhŏng oh bơngai lui păng sư hăm Abôlô jơ̆ nhen thoi bơngai đĭch.
Sư yua kơ tơdrong jang mir ‘ba wă tơblang ăn kơ tơdrong sư hăm Abôlô ưh kơ đei tơdrong tơgar băl ôh, mă lei măr sư jơ̆ bơngai jang hơdai băl păng Kră Yang đei pơjao ăn tơdrong jang pha ra pha: Sư jơ̆ pơtăm, Abôlô tuh đak. Pơma pha noh jơ̆ bơ̆jang nhen thoi bơngai đĭch, Măr sư Abôlô ưh kơ đei la yơ wă tơgar băl ôh mă lei măr sư tơdŏng dih băl lăm tơdrong bơ̆jang kơ Kră Yang. ‘Bơ̆t anăp Kră Yang, đơ̆ng tơdrong jang măr sư ‘noh jơ̆ “lei lăi đĕch”, ưh kơ trŏ tơdrong jang bơngai ayơ hloh kơ bơngai ayơ na pơ ư kơ bơngai âu dah pơjăm bơngai to ôh. Bu bu dai tơdrong pơjao ăn đơ̆ng Kră Yang, păng gô “đei tơmam apah đơ̆ng Kră Yang kiơ̆ thoi tơdrong jang đêl pơm”. Kră Yang ưh kơ lăng tơdrong jang bơ̆n dah pơting kơ bơngai âu jang lơ, dah jang tŏ sĕt, dah tơdrong jang bơngai âu kăl bơngai to ưh. Kră Yang ưh kơ pơting kơ bơngai âu na apah ăn kơ bơngai to ôh. Tơdrong pơting ‘noh jơ̆ đơ̆ng lăm lu bơngai ala teh âu ba ăn tơdrong ‘nhĕng băl.
Jơhngơ̆m đon pơyom kơ bơngai bơ̆jang hơdai noh jơ̆ đơ̆ng blŭng a lăm tơdrong tơchĕng ‘bok Pôl, sư đei tơchĕng mă kơdih sư mă bơngai nai jơ̆ bơ̆jang nhen thoi “đĭch”. Rim ‘nu kơ bơ̆n mă khan jơ̆ng ‘bang, ‘bok bơtho, bơngai thây bơtho, bơngai lui…noh đĭ đăng jơ̆ “đĭch đam Kră Yang” minh ‘nu đei chĕp tơdrong jang đơ̆ng Kră Yang pơjao ăn. Phŏ lu bơ̆n lơ ‘bôh tơdrong jang bơ̆n tih hloh kơ bơngai nai. Mă lei Pôl đei bơtho dôm tơdrong đei plei noh jơ̆ đơ̆ng Kră Yang ăn ngăl. ‘Bar wơ̆t sư đei pơma pran, “Kră Yang ‘Bok Kei-Dei pơm ăn wơ̆ ‘lŏ” (trong 6-7). Kơplah Pôl đei pơma “bơngai pơtăm păng pơngai tuh đak ưh kơ đei rơ a kiơ”, ưh kơ trŏ sư pơjăm tơdrong jang mă lu bơngai jang chă ră roi, pơhrăm ăn kơ bơngai nai wơ̆ ‘lŏ, mă lei sư đei tơblŏk Khŭl Bơngai Lui kăl kơ lăng mă trŏ kơ dôm lu “đĭch đam Kră Yang”. Dang ei, tơdrong sơ’ngon dêh noh jơ̆ lơ bơngai lăm lu bơ̆n lăng bơngai bơ̆jang hơdai ‘noh nhen thoi bơngai wă tơgar băl lăm tơdrong đei plei na jing ba ăn tơdrong tơgar băl, đơ̆ng noh lăng ưh kơ iă, tơklah dih băl. Kăl kơ lăng trŏ kơ tơdrong jang bơ̆n kơdih, tơdrong jang bơngai nai, păng tơdrong dŏng tơgŭm đơ̆ng Kră Yang tơgŭm ăn kơ bơ̆n ưh kơ đei tơdrong tơgar băl, ba ăn kơ bơ̆n ưh kơ lăng bơngai mă bơ̆jang hơdai nhen thoi bơngai ayăt, mă lei tơdrong pơyom dih băl nhen thoi bơngai jang dŏng dih băl.
Ơ Kră Yang, Apinh Ih ăn kơ inh băt kơ inh hăm ‘nhŏng mŏ oh lăm Khŭl Bơngai Lui nhen lei lăi đĕch wă wang hơdai pơjing tơiung dêh char Kră Yang. Apinh Ih ăn kơ inh đei jơ-hngơ̆m pơyom păng dŏng tơgŭm dih băl wă pơjing tơiung Khŭl Bơngai Lui Ih. Yua anăn Kră Yang Yêsu Krist. Amen
‘Bai pơhrăm năr âu tơgŭm Ih đei hơmet ming tơdrong tơchĕng glăi na hơmet ming thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 9
Kênh Youtube BHKTHN:
