II Pêtrôs 1:12-15
“Thoi noh na inh adrin chih kơ iĕm, wă kơ iĕm đei hla bơar tơdrong inh bơtho, hli thĕng kơ inh lôch, iĕm oei đei hla bơar tơdrong inh bơtho, na iĕm huay kơ hiơt.” (II Pêtrôs 1:15)
Nơ̆r jet tơchĕng pơwao:
- ‘Bok Pêtrôs tơ’bôh nơ̆r pơma dơnuh đơ̆ng bơngai bơtho tơdrong lui kơ Kră Yang thoi yơ?
- Tơdrong kiơ pơchŭt Pêtrôs, kư̆m thoi bơngai bơtho tơdrong lui dang ei đĭ jơhngơ̆m hăm tơdrong jang?
– Đei pơdrŭt kơ bơ̆n thoi yơ gah nơ̆r pơma dơnuh đơ̆ng bơngai bơtho tơdrong lui Kră Yang?
Jơ̆ bơngai Kră Yang wơh bơtho tơdrong lui kơ Kră Yang păng kư̆m bơngai chih hla bơar ‘Bok Kei-Dei, ‘bok Pêtrôs pơma roi kơdih sư đơ̆ng lăm nơ̆r ‘Bok Kei-Dei năr ‘nâu thoi âu, sư hơpơi kơ lu bơngai lui mă sư bơtho wơ̆ ’lŏ lăm tơdrong lui ngăl. Lăm tơdrong jang thoi bơngai bơtho tơ’bôh đĭ jơhngơ̆m, mă khan lu bơngai lui băt bơih tơdrong tơpăt sĭt, mălei jơ̆ bơngai ră roi bơtho tơdrong Kră Yang lei na tơdrong jang hơnơ̆ng păng ưh kơ pơdơh noh tơ’blŏk kơ lu sư gah tơdrong tơpăt sĭt.
Đơ̆ng nơ̆r pơma dơnuh ‘nâu, bơ̆n ‘bôh dôm tơdrong pơtrŭt ‘bok Pêtrôs, păng lu bơngai bơtho tơdrong Kră Yang dang ei đĭ jơhngơ̆m hăm tơdrong jang: Mă mônh, sư băt tơdrong kơnhăm lăm tơdrong jang bơtho tơdrong lui noh yua Nơ̆r Kră Yang wă bơtho tơ’bôh tơ’blŏk kơ khul bơngai lui: “Inh arih tơ ala teh âu dang yơ, inh bơtho tơ’blŏk kơ iĕm dang noh,” (trong 13). Yua kơ bơtho tơdrong lui Kră Yang noh minh tơdrong jang gĭt găl, minh tơdrong lơ̆ng hăm tơdrong jang Kră Yang pơjao kơ rim bơngai. Mă ’bar, sư kư̆m băt tơdrong jang noh bơih tơdrong tơpăt trŏ, tơdrong jang trŏ kăl kơ jang, tơguăt hăm đĭ chăl arih sư. Mă pêng, Kră Yang Yêsu đei tơ băt kơ sư ưh kơ đunh sư gô lôch (trong 14). Dah băt jơ năr rai kơđeh, bơngai bơtho tơdrong lui kang athei hơdrin đĭ jơhngơ̆m jang keh tơdrong jang Kră Yang pơjao kơ bơ̆n đơ̆ng rŏng kơ bơ̆n brŏk tơ Kră Yang, lu pơngai lui ling lang ‘blŏk păng pơm kiơ̆ Nơ̆r Kră Yang mă bơ̆n đei pơhrăm.
Đơ̆ng Nơ̆r pơma dơnuh ‘bok Pêtrôs lăm tơdrong jang jing bơngai bơtho tơdrong lui Kră Yang, đei pơtrŭt kơ bơ̆n wă hŏk pơhrăm Nơ̆r Kră Yang, chu iŏk tơdrong đe bơtho thoi minh ‘nu pơngai hŏk pơhrăm đei pơtơ̆p pơjuăt hăm Kră Yang “Kră Yang ăn kơ inh hơpiĕt lu bơngai gơh bơtho tơ’bôh wă kơ inh băt yua nơ̆r pơma tơiung lu bơngai rơdu tơrăn.” (Êsai 50:4). Dah đei Kră Yang krao lăm tơdrong jang bơtho tơdrong lui, bơ̆n kăl kơ băt hơđăl tơdrong kơnhăm lăm tơdrong jang ‘nâu noh tơgŭm kơ ‘nhŏng oh bơ̆n hlôh băt Kră Yang păng wơ̆ ’lŏ gah bơhngol. Thoi ei mă khan đei tơ’bơ̆p tơdrong pơmat dah tơdrong chơt hiôk sơ’ngon kơplah bơ̆n bơ̆jang le na bơ̆n kư̆ kơjăp lăm tơdrong bơ̆jang. Tơdrong arih ‘bônh kơ tôch, kăl kơ băt jơ năr bơ̆n rim năr kơđeh hloh, păng Kră Yang yua lăm chăl khul bơngai lui. Dah bơ̆n ưh kơ wă jang lei Kră Yang gô krao bơngai nai. Apinh Kră Yang ăn kơ bơ̆n đei jơhngơ̆m bơtho ră roi tơdrong lui Kră Yang, athei đĭ jơhngơ̆m jing bơngai rei adrĕch tơdrong lui tơpă; jơ̆ bơngai pơhrăm tơdrong lui pơm ‘lơ̆ng, athei ‘maih wă sơng iŏk Nơ̆r Kră Yang wă kơ wơ̆ ’lŏ gah bơhngol păng Kră Yang yua lăm tơdrong bơtho tơdrong lui.
Ơ Kră Yang, apinh Ih ăn kơ inh đei jơhngơ̆m ‘maih wă hŏk pơhrăm băt kơ Kră Yang. Apinh Kră Yang bơtho inh păng hiôk lăp đon yua inh jing bơngai bơtho tơdrong lui Kră Yang hăm jơhngơ̆m hơdrin, tơnăp lăm tơdrong jang, wă tơgŭm kơ lu ‘nhŏng oh nai pơhrăm băt Nơ̆r Kră Yang păng wơ̆ ’lŏ tơdrong lui. Krao khan yua anăn Kră Yang Yêsu Krist, Amen.
Lu bơ̆n oei rok kiơ̆ kơmĭl đơ̆ng ‘bok Pêtrôs pơma dơnuh thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: II Kôrintô 11
Kênh Youtube BHKTHN:
