Klei Aê Diê Blŭ: Klei Kbiă 35:4-9
Êlan kliăng: “Brei grăp čô myơr tui si ñu mĭn leh, amâo djŏ ôh hŏng klei ênguôt amâodah hŏng klei mgô̆, kyuadah Aê Diê khăp kơ pô myơr hŏng klei hơ̆k mơak” (II Kôrantô 9:7)
Klei êmuh ksiêm mĭn: Ya klei Aê Diê iêô mthưr phung ƀuôn sang Aê Diê myơr leh anăn hlue si ya klei bhiăn? Drei dưi mđĭ ai ti anăp ai tiê myơr mơ̆ng hlei pô hlăm Klei Aê Diê Blŭ ăt msĕ mơh hlăm Sang Aê Diê pô? Ya klei yuôm bhăn mơ̆ng klei myơr hlăm klei hdĭp drei kkuh mpŭ kơ Aê Diê?
Trăn Klei Aê Diê Blŭ hruê anei mñă kơ ya klei Aê Diê mtă kơ Y‑Môis hlăm Klei Kbiă 25:1-9. Hlăk anăn jing wưng phung ƀuôn sang Aê Diê mprăp rŭ mdơ̆ng Sang yang leh sa wưng bi kdung kyua phung ƀuôn sang Aê Diê kkuh kơ rup êđai êmô mah. Aê Diê brei kơ grăp čô phung ƀuôn sang Israel dưi đru myơr, mkŏ mjing anôk doh jăk čiăng Aê Diê dôk ti krah diñu. Ñu amâo ba mdah ôh ênoh mrô klă klơ̆ng dŭm kdrêč êtuh ngăn drăp phung Israel ba wĭt mơ̆ng Êjip, ƀiădah diñu srăng myơr ya mnơ̆ng mâo hlăm sang, ênoh hlue si ai tiê diñu čiăng myơr kơ Aê Diê.
Anăn mnơ̆ng dhơ̆ng čiăng kơ bruă rŭ mdơ̆ng Sang yang mâo: mah, prăk, leh anăn kông; čhiăm ñuôm êa piơk, hrah jŭ, hrah huč, čhiăm kbuă điêt aruăt; mlâo bê, klĭt biăp knô mkra leh, klĭt jăk siam; kyâo akasi, êa boh ôliwơ kơ pui diăn, dŏ ƀâo mngưi kơ êa ƀâo mngưi pioh trôč leh anăn pioh kơ mnơ̆ng ƀâo mngưi; boh tâo ônik leh anăn lu boh tâo yuôm mkăn čiăng mƀlir dưm ti ao êphôt leh anăn ti ao mnal đah da.
Klei Mrâo Mrang Jăk Y‑Markôs 12:41-44 čih klei yăl dliê kơ mniê djiê ung yơr dua prăk, ênoh sa kdrêč pă mgei ai tiê lu phung đăo hlăm klei myơr. Drei ăt tuôm thâo lu mnuih hlăm Sang Aê Diê alŭ wăl mâo ai tiê myơr msĕ si mniê djiê ung hlăk đưm. Êngao anăn, ăt mâo lu amai adei ti krah phung drei ngă leh leh anăn dôk kriăng mă bruă čiăng dưi myơr hŏng ai tiê kmah hlăm bruă rŭ mdơ̆ng sang Aê Diê, keh mdrao mgŭn ala ƀuôn, nao čuă čhưn, hiu hưn Klei Mrâo Mrang Jăk… Êpul êya phung đăo ăt msĕ mơh phung ka đăo srăng ƀuh rup Khua Yang mơ̆ng bruă bi êdah klei khăp, bi kah mbha mơ̆ng phung ƀuôn sang Aê Diê.
Hdră ngă čiăng mâo prăk mah leh anăn hdră yua prăk mah bi êdah knuih, klei đăo leh anăn bruă klam hŏng Aê Diê mơ̆ng sa čô mnuih. Myơr kơ Aê Diê klei jăk hĭn hlăm ai tiê čŏng ngă leh anăn mơak bi êdah ai tiê hdơr knga kơ Khua Yang kơ klei jăk Ñu brei leh kơ pô, hŏng ai tiê đăo sĭt Aê Diê jing phŭn mkăp djăp ênŭm klei drei čiăng. Djăp mta klei drei mâo kyua Aê Diê brei sơăi leh anăn Ñu čiăng kơ drei kriê dlăng jăk ngăn drăp Ñu. Brei ngă bi jih bruă klam mơ̆ng sa čô dĭng buăl jăk leh anăn sĭt suôr hlăm bruă kriê dlăng kơ Aê Diê. Tơdah grăp čô mâo sơăi ai tiê hur har leh anăn jih ai tiê myơr snăn Sang Aê Diê leh anăn êpul êya phung đăo srăng dưi mkŏ mjing leh anăn đĭ kyar.
Si ai tiê leh anăn knuih drei dôk myơr kơ Aê Diê?
Wah lač: Ơ Khua Yang! Klei hdĭp, ai ktang, prăk mah kâo dôk mâo hriê mơ̆ng Ih sơăi. Kâo bi mni kơ Ih kơ klei pap dưi jing anak Ih leh anăn mâo Ih yua ngă pô kriê dlăng hlăm Sang Ih! Akâo kơ Ih đru kâo hdĭp leh anăn bi guh kơang Anăn Ih hlăm knuih hdĭp huĭ mpŭ leh anăn ai tiê kâo myơr.
Dlăng Klei Aê Diê Blŭ hlăm tlâo thŭn: Y‑Mathiơ 4:1-5:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
