Khiavdim 35:4-9
Nqe cim:
“Yog li ntawd nyias yuav tsum muab raws li nyias twb xub xav tseg lawm, tsis yog yuav khuvxim lossis yus yuav yuam yus lub siab muab” (II Kauleethaus 9:7).
Lus nug rau sawvdaws xav:
– Tus Tswv nqua hu Nws haivneeg fij yam dabtsi thiab raws txojcai twg?
– Peb tau txhawb zog licas thaum paub cov qauv fij khoom hauv Vajluskub thiab hauv peb Pawg Ntseeg?
– Kev fij khoom muaj qabhau licas nyob hauv peb lub neej pehawm tus Tswv?
Ntu Vajluskub hnub no rov hais txog tej uas tus Tswv qhia rau Mauxes nyob hauv Khiavdim 25:1-9. Thaum ntawd yog sijhawm tus Tswv haivneeg pib ua lub Tsevntaub tomqab ib ntus raug theem vim zaj xwm tus Tswv haivneeg mus pe tus mlom nyuj. Tus Tswv pub rau cov Yixalayees tau koom tes hauv kev fij khoom, siv los ua chav dawbhuv kom tau tus Tswv nrog lawv nyob. Tus Tswv tsis hais kom lawv fij pestsawg feem tej qhov txhia chaw uas lawv coj nram tebchaws Iziv los, tiamsis lawv yuav tsum fij tej uas lawv muaj hauv tsev, fij ntau fij tsawg nyob ntawm lawv nplooj siab xav fij pub rau tus Tswv.
Tej khoom siv los ua lub Tsevntaub muaj xws li: kub, nyiaj, tooj; xov (xiav, tsamxem, liab), ntaub tsamxem, ntaub plaub tshis, tawv laug yaj, tawv laug yaj uas muab zas liab, tej tseem tawv nyuj, ntoo kubtwm; roj sam teeb; ntoo tsw qab tso rau cov roj txhawb meejthawj thiab tej hmoov tshuaj uas tsw qab; tej qe zeb kanelias thiab lwm yam hlaws uas muab xaws rau ntawm cov Povthawj Hlob lub tsho efaus thiab daim ntaub npog hauvsiab.
Txojmoo Zoo Malakaus 12:41-44 sau txog zaj xwm tus pojntsuam pluag pluag fij ob lub txiaj toog, tau txhawb coob leej ntau tug hauv kev fij khoom. Peb kuj paub txog ntau leej hauv peb Pawg Ntseeg kuj muaj nplooj siab fij li tus poj ntsuam no. Tsis tas li ntawd xwb, kuj muaj coob leej ntseeg tseem tabtom tiv kev txomnyem, ua haujlwm kawg siab ntsws kom tau fij khoom los ntawm nplooj siab dav fo rau kev ua Tuamtsev, sib pab zej zog, tsobfwb cov ntseeg, tshaj Txojmoo Zoo,… Cov ntseeg nyob txhua qhov thiab cov tsis ntseeg yuav pom tus Tswv dhau ntawm tes haujlwm sib hlub sib pab ntawm Nws cov menyuam.
Kev ua haujlwm kom muaj nyiaj txiag thiab kev siv nyiaj txiag qhia tshwm tus cwjpwm, kev ntseeg thiab nplooj siab rau tus Tswv ntawm ib tug ntseeg. Fij yam khoom zoo tshajplaws rau tus Tswv los ntawm nplooj siab dawb paug thiab zoo siab yog qhia tshwm lub siab paub nco tus Tswv txiajntsig txog tej yam zoo tus Tswv muab pub rau yus los ntawm kev ntseeg hais tias tus Tswv yog tus pub txhua yam cheemtsum hauv lub neej. Txhua yam peb muaj puavleej yog tus Tswv muab pub thiab Nws xav kom peb saibxyuas kom zoo tej yam Nws muab pub. Yuav tsum ua tiav feemxyuam ntawm ib tug tubtxib uas zoo thiab ncajncees saibxyuas yam tus Tswv muab pub. Thaum txhua tus muaj lub siab kub lug thiab tas siab fij khoom, tus Tswv Pawg Ntseeg txhua qhov yuav tau txhim kho thiab huamvam.
Thov Vajtswv,
Tus Tswv! Txojsia, dag zog, nyiaj txiag uas nyuam yaus tabtom muaj puavleej yog Koj ua tus muab pub. Nyuam yaus ua Koj tsaug vim tau ua Koj menyuam thiab tau Koj ntseeg siab txib ua tus tubtxib hauv Koj lub tsev! Thov pab nyuam yaus ua lub neej rau Koj tau ntsejmuag los ntawm nyuam yaus txojkev ntseeg thiab nplooj siab fij khoom. Amees.
Peb tabtom fij khoom rau tus Tswv los ntawm nplooj siab thiab kev xav zoo licas?
Nyeem Vajluskub hauv peb lub xyoo: Mathais 4:1-5:12
Kênh Youtube BHKTHN:
