Klei Aê Diê Blŭ: II Klei Yăl Dliê 12:7-16
Êlan kliăng: “Kâo duah Ih hŏng jih ai tiê; đăm brei kâo weh đuĕ mơ̆ng klei Ih mtă ôh. Kâo djă pioh leh klei Ih blŭ hlăm ai tiê kâo, čiăng kơ kâo amâo ngă soh hŏng Ih ôh.” (Klei Mmuñ Hđăp 119:10-11).
Klei êmuh ksiêm mĭn: Ya klei Mtao Êjip čiăng plah mmiă hlăm Sang Yang? Si Mtao Rôbôam ngă ti anăp klei anei? Si arăng lač kơ klei ñu bi mguôp hŏng Aê Diê? Si ngă klei drei bi mguôp hŏng Aê Diê ară anei?
Leh Mtao Rôboam leh anăn phung khua gĭt gai Yuđa kmhal klei soh anăn Aê Diê brei kơ ala mtao diñu arăng amâo dưi bi rai ôh ƀiădah klam boh jhat mơ̆ng klei soh. Brei diñu jưh kơ čar Êjip, leh anăn dŭm mta mnơ̆ng yuôm hlăm Sang Yang, wăt khil mah Mtao Salômon ngă leh ăt hlŏng mă mơh. Kyua Yuđa amâo lŏ mdrŏng msĕ si êlâo ôh anăn Mtao Rôboam ngă khil hŏng kông čiăng hrô. Ala mtao Yuđa mâo ênuk mdrŏng sah, kdrưh kơang ƀiădah leh leh lui klei bhiăn Aê Diê, diñu luč klei hơêč hmưi Khil kông hrô kơ khil mah brei ƀuh klei bi mguôp mơ̆ng mtao leh anăn phung ƀuôn sang hŏng Aê Diê amâo lŏ msĕ si ênuk đưm ôh, anăn jing klei bi mguôp ƀun ƀin mkă hŏng êlâo dih.
Hrô kơ duah hdră čiăng lŏ wĭt mă khil mah, Mtao Rôboam ư ai hŏng dŭm boh khil kông amâo yuôm ôh. Ñu mâo mông găl čiăng lŏ bi mrâo klei bi mguôp hŏng Aê Diê, gưt asăp tui hlue êlan Aê Diê čiăng ƀiădah ñu amâo ngă ôh. Wăt tơdah ñu dôk jing mtao 12 thŭn dơ̆ng ƀiădah jih klei hdĭp ñu arăng lač jing “ñu ngă klei jhat, kyuadah ñu amâo čuăn ôh hlăm ai tiê ñu čiăng duah Yêhôwa” (êlan 14). Mtao amâo mâo ya klei gĭr čiăng bi mlih klei hdĭp mngăt leh anăn klei bi hgŭm êlan hŏng Aê Diê ôh ƀiădah knŏng tŭ ư hŏng ênoh điêt dhiêt amâo yuôm.
Sĭt amâo jih ai tiê duah Aê Diê, čiăng kơ Ñu jing khua kơ klei hdĭp pô, anak mnuih srăng ênưih hlue ngă tui si kđeh čiăng. Phung jih ai tiê tui duah Aê Diê jing phung êbat hlăm êlan Aê Diê čiăng kyua pioh leh Klei Aê Diê Blŭ hlăm ai tiê čiăng amâo ngă soh hŏng Ñu (Klei Mmuñ Hđăp 119:10-11). Mdê hŏng mtao Salômôn, Mtao Rôbôam amâo tui duah Aê Diê čiăng mâo klei thâo mĭn Aê Diê. Leh anăn mơ̆ng klei mâo sa klei mphŭn kčưm jăk hlăm tlâo thŭn kiă kriê, ñu atăt phung ƀuôn sang Aê Diê ngă soh kkuh kơ rup yang. Mtao Rôbôam amâo klă sĭt mâo klei bi mguôp hŏng Aê Diê ôh anăn amâo êbat hlăm êlan Aê Diê ôh.
Dlăng hlăm klei hdĭp sa čô mnuih đaŏ kơ Krist leh anăn dŭm ênoh yuôm pô anăn tui duah, drei dưi thâo kral klei bi mguôp pô anăn hŏng Aê Diê. Tơdah “djă pioh Klei Aê Diê Blŭ hlăm ai tiê” nanao snăn srăng amâo ngă soh hŏng Ñu ôh. Ƀiădah tơdah knŏng mâo bruă ngă hlue đaŏ msĕ si nao bi kƀĭn kkuh mpŭ nanao, ngă lu mta bruă hlăm Sang Aê Diê…ƀiădah “amâo jih ai tiê duah Aê Diê “ leh anăn Klei Aê Diê Blŭ ôh, amâo jih ai tiê gưt asăp Klei Aê Diê Blŭ bi êdah klei hdĭp doh jăk pô snăn boh jhat drei tŭ jing ăt kăn srăng mâo klei jăk siam Aê Diê brei rei.
Drei dôk duah Aê Diê hŏng jih ai tiê mơ̆ amâodah knŏng tŭ ư hŏng ênoh yuôm êdu kƀah?
Wah lač: Ơ Khua Yang, akâo kơ Ih pap brei kơ kâo hlăk êjai klei hdĭp kâo knŏng tui duah ênoh yuôm êdu kƀah msĕ si mnuih ti lăn ala anei. Akâo kơ Ih brei kơ kâo mâo klei hdĭp huĭ mpŭ sĭt, jih ai tiê duah Aê Diê, êbat hlăm êlan Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 97:1-12; 98:1-9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
