Klei Aê Diê Blŭ: Klei Bi Hriêng 26:20-22
Êlan kliăng: “Jăk mơak yơh phung đru brei klei êđăp ênang hdơ̆ng mnuih, kyuadah Aê Diê srăng pia diñu phung anak Aê Diê” (Y-Mathiơ 5:9).
Klei êmuh ksiêm mĭn: Ya jing boh jhat kơ klei blŭ jhat? Mnuih kreh mneh msao leh anăn mnuih khăng yăl dliê djưč ngă ya klei bi rai? Ya drei srăng ngă čiăng brei klei êđăp ênang hdơ̆ng mnuih?
Mtao Salômôn mâo sa klei mtô êlam snăk: Klei blŭ jing msĕ si djuh bi trơ̆ng pui amâodah jing msĕ si êa truih bi djiê ram pui. Kyuanăn brei jih jang mnuih thâo răng hlăm klei yua boh blŭ leh anăn klei srăng ngă hŏng klei yăl dliê djưč.
Tal sa, tơdah amâo mâo ôh klei yăl dliê djưč klei bi mneh msao srăng ruê̆ (êlan 20). Pui amâo lŏ dưi ƀơ̆ng ôh tơdah amâo lŏ mâo djuh, klei bi tăng mgăl kăn lŏ mâo rei tơdah amâo mâo pô lŏ blŭ jhat, bi yăl dliê klei bi kah mbha phung. Tinei, “pô yăl dliê djưč” jing pô jhar pui kơ klei bi mneh msao leh anăn bi tăng mgăl. Kyuanăn yơh, klei dôk ñăt djŏ mmông jing sa bruă ngă hŏng klei thâo mĭn.
Tal dua, mnuih kreh bi mneh msao jing msĕ si anghar pui ƀơ̆ng hdăng (êlan 21). Mâo đa đa mnuih amâo djŏ knŏng tŭ klei pô mkăn đoh ktŭng kơ klei bi mneh msao ôh ƀiădah diñu pô yơh čŏng čiăng ngă klei bi mneh msao. Diñu amâo dôk hơĭt ôh tơdah amâo mâo klei bi tăng mgăl, diñu dưi mjing klei bi rŭng knŏng hŏng dua tlâo boh boh blŭ bi riêl ai, blŭ bi hriêng amâodah blŭ ƀuah. Mtao Salômôn lač phung anei jing msĕ si hdăng lŏ bi trơ̆ng pui dôk ƀơ̆ng, ngă kơ klei bi mneh jing hlơr hĭn, jing kjham hĭn. Snăn drei ƀuh, amâo djŏ jih jang klei amâo bi mneh msao čŏng čiăng mâo sơăi ôh, ƀiădah păt čiăng jih klei bi mneh msao kbiă mơ̆ng mnuih yơh pô mjing. Sa pruê̆ blŭ amâo yŏng mĭn, sa ală dlăng amâo djŏ mmông, amâodah sa klei duah ksiêm ăt dưi mjing sa klei bi tăng mgăl prŏng mơh tơdah mâo “anghar pui” jing klei blŭ bi riêl leh anăn phung amâo răng ôh kơ klei blŭ.
Knhal tuč, jing klei jăk hmư̆ bŏ hŏng klei jhat mơ̆ng klei klei yăl dliê djưč (êlan 22). Sa klei amâo dưi hngah ôh jing klei yăl dliê djưč jing jăk snăk, jing msĕ si “mnơ̆ng ƀơ̆ng huă jăk”, jing klei ênưih kơ arăng čiăng hmư̆, jăk hmư̆ leh anăn ênưih đăo. Ƀiădah klei huĭ jing jih jang klei blŭ anăn amâo djŏ dôk mă knŏng ti knga ôh ƀiădah “ñu kma truh ti prôč êhŭng”, bi hmăi jhat kơ klei mĭn, klei bi kcŭt hlăm ai tiê leh anăn kơ klei mnuih ngă.
Hlăm ênuk klei mrâo lar pral msĕ si ênuk anei, klei blŭ mưč dưi jing hĕ akŏ phŭn, pô thâo mjưh, thâo răng kơ ƀăng êgei ñu jing pô dưi ba klei êđăp ênang. Klei blŭ êkŭt kơ sa čô mnuih, wăt tơdah knŏng điêt dưn, ăt dưi mjing klei đing, bi luč klei đăo amâodah jing klei bi kah mơh. Lu klei bi mguôp hlăm Phung Sang Aê Diê, gŏ sang amâodah ti krah phung ƀuôn sang rai leh kyua klei jăk hmư̆ ƀiădah bŏ hŏng klei jhat anăn. Akâo Khua Yang đru drei thâo răng kơ klei “jăk hmư̆ ƀiădah soh anăn”. Êmuh bĕ kơ drei pô êlâo – êlâo kơ drei hmư̆: “Kâo srăng hmư̆ klei anei mơ̆? Klei anei ba klei tŭ dưn kơ kâo mơ̆?” Răng bĕ kơ klei drei blŭ, blŭ bĕ boh blŭ klei khăp, hngah hĕ kơ klei yăl dliê djưč, leh anăn wah lač bĕ akâo kơ Khua Yang mjing drei jing mnuih “truih pui” amâo djŏ mnuih “jhar pui” ôh.
Drei dôk ngă phung đru brei klei êđăp ênang hdơ̆ng mnuih hĕ amâodah jing phung mtrŭt mčhur kơ klei bi mneh msao?
Wah lač: Ơ Ama, đru kâo thâo răng kơ ƀăng êgei kâo čiăng kơ kâo amâo blŭ klei bi êka kơ pô mkăn amâodah bi mjing klei bi mneh msao ôh. Đru kâo thâo dôk ñăt djŏ mmông, jhŏng blŭ klei djŏ hlăm klei khăp. Brei klei kâo blŭ ba hriê klei êđăp ênang, bi mđĭ leh anăn bi guh kơang kơ Anăn Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 90-91.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
