Pajlug 26:20-22
Nqe cim:
“Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam!” (Mathais 5:9)
Lus nug xav:
– Cov lus hais phem ua rau tau yam twg?
– Tus neeg cem taus, nws pheej hais tej lus ua hiam lwm tus li cas?
– Peb cheemtsum ua yam twg kom muaj kev sib haum?
Vajntxwv Xalumoos qhia li no: Tej lus hais yuav zoo li txhab taws rau kev sib txeeb lossis zoo ib yam li tua hluavtaws kom tuag, yog li txhua tus yuav tsum muaj feem xyuam rau yus txojkev hais lus thiab cwjpwm sib tham.
Tim ib, yog tsis muaj kev taug xaiv, yuav tsis muaj txojkev sib cav (nqe 20). Hluavtaws yuav tsis cig yog hais tias tsis muaj taws, yuav tsis muaj kev sib cav yog tias tsis muaj neeg taug xaiv, kev hais lus yog qhov uas ua rau muaj kev faib pab pawg. Ntawm no, taug xaiv yog lub zog cuab kom tsis sib haum, sib cav sib ceg. Yog li ntawd, nyob ntsiag to yog tus neeg ntse.
Tim ob, tus neeg ua kom muaj teebmeem zoo ib yam li thee ua rau hluavtaws cig (nqe 21). Muaj ib yam neeg tsis yog raug poob mus ua kom muaj kev kub ntxhov tiamsis yog cov uas tsim kom muaj kev ntxhov ntag. Lawv yuav nyob tsis taus yog tias tsis muaj kev sib cav; lawv tsim kom muaj kev teebmeem los ntawm tej lus taug xaiv, lus moo cua lossis saib tsis taus. Vajntxwv Xalumoos hais txog cov neeg zoo ib yam li thee ua rau hluavtaws cig, ua rau teebmeem loj tuaj. Qhov uas tsimnyog hais mas tsis yog txhua yam kev tsis haum xwbtim xeeb, feem ntau yog tibneeg tsim muaj. Ib lo lus hais tsis xyuam xim, ib qhov kev ntsia tsis yog, lossis ib qhov kev sib thuam ua rau muaj kev sib cav, yog tseem muaj “thee” ntxiv rau ces yuav loj dua.
Qhov kawg, kev hais luag plig (nqe 22). Ib qhov uas peb paub yog cov lus hais luag plig zoo ib yam li “tej zaub mov qab”, yog yam uas neeg nyiam, xav mloog thiab yoojyim ntseeg. Tiamsis qhov uas txaus ntshai ces yog cov lus ntawd tsis nres ntawm pobntseg, nws “nkag mus hauv lub siab”, ua rau neeg xav tsis zoo, muaj kev xav thiab ua tej yam tsis zoo.
Nyob rau tiam tej xovxwm yoojyim qhia tawm thiab sawvdaws nyiam hais tej lus sib thuam, tus neeg uas paub nres, tswj qhovncauj ces yuav ua rau muaj kev sib haum. Ib lo lus hais tsis zoo rau ib tug twg, txawm yog me los yuav ua rau muaj kev xav, tsis ntseeg siab lossis txav deb. Muaj ntau txojkev sib raug zoo hauv Pawg Ntseeg, tsevneeg, lossis zej zos raug rhuav vim yog tej lus hais qab zib tiamsis ua rau mob siab kawg. Thov Vajtswv pab kom peb ceevfaj tej yam uas “zoo mloog tiamsis tsis yog”. Yuav tau ua zoo saib mam txiav txim siab mloog: “Kuv puas mloog zaj lus no? Zaj lus no puas pab tau kuv?” Ua tib zoo saib thaum yus hais lus, cia li hais tej lus sib hlub, qaij tej lus luag plig, thiab thov Vajtswv pab kom peb ua tau tus neeg “tua hluavtaws”, txhob ua “tus txhab taws”.
Thov Vajtswv,
Peb Leej Txiv, thov Koj pab kom nyuam yaus paub tswj lub qhovncauj, tsis hais tej lus ua rau lwm tus poob siab lossis ua kom tsis sib haum. Thov Koj qhia nyuam yaus paub nyob ntsiag to yog sijhawm, kam hais yam yog los ntawm txojkev hlub. Thov kom tej lus nyuam yaus hais ua rau muaj kev kaj siab, txhim kho thiab ua rau Vajtswv tau ntsejmuag. Nyuam yaus tuav Tswv Yexus lub npe thov, Amees.
Peb tabtom ua rau lwm tus nyob sib haum los yog ua kom muaj kev sib cav?
Nyeem Vajluskub hauv peb lub xyoo: Phau Ntawv Nkauj 90-91
Kênh Youtube BHKTHN:
