Klei Aê Diê Blŭ: Klei Bi Hriêng 15: 5-12.
Êlan kliăng: “Mnuih mluk bi êmut kơ klei ama ñu mkra, ƀiădah hlei pô mă tŭ klei ƀuah mkra jing pô thâo mĭn.” (Klei Bi Hriêng 15:5).
Klei êmuh ksiêm mĭn: Si klei tŭ dưn mơ̆ng klei ƀuah mkra? Ya klei tŭ dưn kơ phung hmư̆ klei ƀuah mkra leh anăn phung amâo hmư̆ klei ƀuah mkra? Ya klei brei drei akâo kơ Khua Yang bi mlih leh hriăm kơ klei ƀuah mkra?
Wăt tơdah grăp čô thâo sơaĭ: “Êa drao phĭ mdrao klei ruă, klei blŭ sĭt bi ruă ai tiê” ƀiădah ƀiă snăk phung čiăng mnăm êa drao phĭ amâodah čiăng hmư̆ klei ƀuah mkra kơ klei pô ka djŏ. Khădah snăn, čiăng đru kơ anak ñu hdĭp thâo mĭn, Mtao Y‑Salômôn bi hriăm anak ñu mđing hmư̆ klei ƀuah mkra (êlan 5). Gưt klei ƀuah mkra djŏ, srăng đru kơ anak jing thâo mĭn. Klei thâo mĭn ba kơ anak klei mdrŏng sah kơ ngăn drăp leh anăn klei thâo săng (êlan 6-7). Klei yuôm bhăn hĭn jing klei thâo mĭn srăng đru anak hdĭp kpă ênô, djăp mta bruă bi mơak kơ Aê Diê. Anak đăm mĭn ôh ngă klei jhat leh anăn myơr mnơ̆ng dhơ̆ng čiăng mdăp klei soh, ƀiădah “Yêhôwa bi êmut kheh kơ mnơ̆ng phung ƀai ngă yang”. Ñu knŏng “khăp kơ pô tui hlue klei kpă ênô” leh anăn bi kmhal hlei pô bi êmut kơ klei ƀuah srăng djiê. Aê Diê jing Pô thâo kluôm ênŭm, Ñu ƀuh leh jih jang mnơ̆ng hlăm Ƀuôn Phung Djiê, Ñu thâo kral leh ai tiê phung mnuih (êlan 8-11). Mtao Y‑Salômôn klah čŭn brei anak ñu nao kơ mnuih thâo mĭn, mđing hmư̆ klei diñu mtă čiăng hdĭp thâo mĭn ti anăp Aê Diê.
Aduôn aê drei đưm khăng lač: “Anak ƀai kyua amĭ, anak măk kyua aduôn”. Ƀiădah amâo djŏ knŏng hjăn aduôn, amĭ ôh, ƀiădah wăt amĭ leh anăn ama mâo bruă klam sơăi. Amĭ ama kyua khăp đei, hơiêng đei kơ anak čô amâo ktang mjuăt mgô, amâodah mdăp klei anak ngă soh, anăn ngă kơ anak ngă soh lu hĭn leh anăn jing mnuih ƀai. Hlăm gŏ sang, lu amĭ ama kyua amâo mâo ôh mông dôk hŏng anak, amâodah kyua bi lui ung mô̆, huĭdah bi ênguôt anak pô anăn amâo ƀuah mkra ôh anak. Hlăm ala ƀuôn, lu mnuih kyua huĭ luič găp, amâodah huĭ bi ênguôt ai tiê anăn mâo ƀiă snăk mnuih jhŏng lač kpă ênuah, lač kơ klei amâo jăk hdơ̆ng pô. Hlăm sang Aê Diê, lu anak čô Aê Diê knŏng čiăng hmư̆ kơ klei khăp leh anăn klei pap Aê Diê amâo čiăng hmư̆ ôh kơ klei soh leh anăn klei kmhal, lu mnuih dôk ăl čôñ kyua klei ƀuah mkra mtô lač sĭt nik mơ̆ng phung khua pô mtô amâodah phung khua mduôn.
Akâo kơ Aê Diê đru grăp čô drei bi mguôp sĭt suôr nanao hŏng Aê Diê leh anăn Klei Aê Diê Blŭ čiăng mâo klei thâo mĭn Aê Diê brei hlăm bruă mtô bi hriăm anak čô ăt msĕ mơh hlăm bruă mguôp klei blŭ klă sĭt hŏng pô mkăn. Ăt brei drei knang kơ Yang Mngăt Jăk đru drei êdu êun, luă gŭ, thâo gĭr, čiăng mđing hmư̆ klei mtô lač djŏ klă leh anăn bi mlih jăk klei hdĭp pô. Pô mđing hmư̆ tui si klei Aê Diê bi hriăm, hdĭp thâo mĭn, srăng dưi dưn klei êđăp ênang, mdrŏng sah ti lăn ala leh anăn hlăm Ƀuôn Jăk Aê Diê.
Drei ênguôt mơ̆ sĭt hmư̆ klei pô mkăn mtô lač?
Wah lač: Ơ Khua Yang, kâo bi mni lač jăk kơ Ih kyua klei hriăm hruê anei. Akâo kơ Ih đru kâo êdu êun, luă gŭ tŭ mă klei pô mkăn mtô lač leh anăn jhŏng bi mlih ya klei soh. Akâo kơ Ih brei kâo klei thâo mĭn, thâo mbruă čiăng mguôp klei blŭ, bi hriăm anak čô, ayŏng amai adei kâo čiăng hmei hrăm mbĭt dưi dưn klei jăk mơak Ih brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 36:9-23
Kênh Youtube BHKTHN:
