Khiavdim 29:19-25

Nqe cim:

“Cia li hu koj tus tijlaug Aloos thiab nws cov tub: Nadas, Anpihus, Ele-axas thiab Ithamas tuaj. Muab lawv cais tawm hauv cov Yixalayees, thiab muab lawv tsa ua cov povthawj ua kuv tes haujlwm” (Khiavdim 28:1).

 Lus nug rau sawvdaws xav:

• Tus laug yaj tim ob tau tua fij li cas hauv rooj kevcai tsa povthawj?
• Muab ntshav yaj pleev Aloos thiab nws cov tub lub ntsej thiab ntivtaw xoo sab xis hais piv txog dab tsi?
• Peb txais tau lus qhuab ntuas li cas txog kev ua Vajtswv haujlwm kom muaj nqis ntau ntxiv?

Tom qab uas ua kevcai theej txhoj thiab kevcai ua tsaug, Mauxes ua kevcai tsa povthawj rau Aloos thiab nws cov tub. Cab tus yaj uas tsis muaj ib qhov phem los, Aloos thiab nws cov tub tsa tes rau saum tus yaj taubhau ces tua tus yaj ntawd. Mauxes muab cov ntshav yaj mus pleev rau Aloos thiab nws cov tub sab ntsej xis, ntivtes xis thiab ntivtaw xoo xis. Lawv lub cev thiab tej tsoo tsho kuj tau pleev ntshav thiab nchos roj tsa meejthawj rau.“ raws li Vajtswv txoj Kevcai yuav luag txhua yam yuav tsum muaj nqaij ntuag ntshav nrog thiaj raws li kevcai. Yog nqaij tsis ntuag ntshav tsis nrog Vajtswv yeej zam tsis tau neeg lub txim.” (Henplias 9:22).

Kevcai tsa muaj lub ntsiab hais tias povthawj yuav tsum yog tau tus Tswv xaiv, ua kom dawbhuv los ntawm kevcai theej txhoj, lawv yuav tsum paub Vajtswv txiajntsig los ntawm kevcai ua tsaug, tom qab ntawm tau tus Tswv txib mus ntawm Nws lub zog los ntawm kevcai pleev ntshav ntxuav huv tus kheej kom mus ua tiav tes haujlwm tseemceeb uas tau txib. Xub thawj yog lawv lub ntsej yuav tau ntxuav kom huv kom npaj nroos mloog meej tseeb tej lus uas tus Tswv hais thiab tej lus uas Vajtswv haiv neeg hais. Txhais tes tau ntxuav huv yog piv txog lawv yuav tsum dawbhuv, ua ncaj rau tes haujlwm, coj raws nraim li tej kevcai uas tus Tswv taw qhia lawm. Lawv yuav cob qhia, qhuab ntuas, thiab siv cai tswj Vajtswv haiv neeg los ntawm kev dawbhuv thiab kev hlub. Hais lus tseeb meej, yog sijhawm thiab muaj hauvpaus hauvntsis yuav pab tau Vajtswv haiv neeg tso kev txhaum tseg rov los cuag tus Tswv. Lawv txhais kotaw kuj tau ntxuav huv kom tsuj mus sib kha, khov kho, raws nraim txoj kev uas Vajtswv taw qhia. Lawv yuav tsum zeem paub tej qhov chaw uas tsimnyog mus rau, thiab mus yog sijhawm txawm yuav ntsib kev khwv npaum li cas los xij.

Tus yaj uas muab tua tsa ua haujlwm no tau muab fij zoo ib yam li tus tsiaj hlawv kheej tsw qab ntxiag nrog rau“ib lub ncuav xyaw roj txiv ntoo, muab ib lub ncuav tsis xyaw roj, muab ib lub ncuav nyias nyias…muab yom fij rau Kuv” (nqe 23-24). Tiamsis cov khoom fij no tau muab rau Aloos thiab nws cov tub, kom lawv yom mus yom los fij rau Vajtswv xav qhia txog lawv yog cov sawv cev rau Vajtswv haiv neeg fij khoom rau tus Tswv.

Niaj hnub nimno tus Tswv kuj txib peb txhua tus ua tes haujlwm povthawj, peb yuav tsum cia tus Tswv ntxuav peb lub cev kom lwm tus tau pom tus Tswv los ntawm peb.

Yuav ua cas peb lub ntsej, txhais tes thiab kotaw thiaj tau ntxuav kom huv?

 Thov Vajtswv,

Tus Tswv, nyuam yaus ua Koj tsaug uas Koj tau xaiv, tau txhiv thiab txib nyuam yaus sawv cev ntawm Koj coj lwm tus los cuag Koj. Thov tus Tswv Koj ntxuav nyuam yaus lub ntsej, lub qhovmuag, lub ncauj thiab tej tes taw kom ua rau lwm tus pom koj los ntawm nyuas yaus lub neej. Amees.

 Nyeem Vajluskub hauv peb lub xyoo: Exalas 1:1-2:42

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn