Klei Aê Diê Blŭ: Y-Mathiơ 13:33
Êlan kliăng: Ñu lŏ blŭ kơ digơ̆ klei bi hriêng mkăn. “Ƀuôn ala mtao adiê jing msĕ si kpei sa čô mniê mă bi lŭk hŏng tlâo hnơ̆ng kpŭng tơl kpŭng anăn blang jih.” (Y-Mathiơ 13:33)
Klei êmuh ksiêm mĭn: Hŏng ya mnơ̆ng Khua Yang Yêsu bi msĕ klei hmăi mơ̆ng Ƀuôn ala mtao adiê? Klei bi msĕ anei ya čiăng lač? Si drei srăng hdĭp čiăng Klei Mrâo Mrang Jăk hmăi kơ phung riêng gah?
Khua Yang Yêsu yua rup kpei čiăng lač kơ klei bi hmăi mơ̆ng Ƀuôn ala mtao Aê Diê. Hlăm lu klei Khua Yang mtô, “kpei” čiăng lač kơ klei jhat, msĕ si hlăk Khua Yang mtă kơ phung ƀĭng kna Ñu răng kơ kpei phung Pharisi, Sadusi leh anăn kpei Hêrôt (Y-Mathiơ 16:11, Y-Markôs 8:15). Ƀiădah lĕ, hlăm klei bi hriêng anei drei srăng hriăm mbĭt kơ klei bi hmăi mơ̆ng Ƀuôn ala mtao Aê Diê msĕ si kpei bi hmăi ktang tơdah bi lŭk hŏng kpŭng. Khua Yang Yêsu yăl dliê kơ bruă kpei ngă hŏng klei hgăm hlăm tlâo hnơ̆ng kpŭng, mdư̆m hŏng giăm pă pluh lit, anei jing hnơ̆ng kpŭng lu phung mniê khăng mmai ngă ƀêñ kơ jih jang mnuih hlăm boh gŏ ñu. Tơdah ngă ƀêñ, knŏng dưm mă ƀiă kpei srăng bi buk kpŭng jih sa thŭng. Pruĕ blŭ “Ƀuôn ala mtao adiê jing msĕ si” brei drei ƀuh Khua Yang Yêsu yua rup kpei bi buk tlâo hnơ̆ng kpŭng čiăng lač kơ klei Ƀuôn ala mtao adiê bi hmăi ktang kơ lăn ala, amâo mâo mnơ̆ng dưi mkhư̆ gang ôh. Tơdah bi lŭk kpei hlăm kpŭng arăng srăng mđam sui ƀiă čiăng kpei dưi kma leh anăn bi mlih jih sa klŏ kpŭng. Msĕ snăn mơh, hlăk Khua Yang Yêsu dơ̆ng mtô kơ Ƀuôn ala mtao adiê, mâo knŏng ƀiă mnuih hlue Ñu sĭt, ƀiădah Khua Yang thâo kơ êdei anăp Ƀuôn ala mtao adiê srăng mâo klei bi hmăi ktang kơ lăn ala tơdah mâo lu mnuih, lu klei hdĭp mâo klei bi mlih, leh anăn Ƀuôn ala mtao Aê Diê srăng bi êdah klă ênŭm hlăm hruê Khua Yang Yêsu lŏ hriê.
Hruê anei, lu blư̆ drei êdu ai tơdah dôk hlăm Sang Aê Diê mâo ƀiă phung đăo, amâodah sa êpul mă bruă mâo knŏng ƀiă mnuih, drei khăng mĭn Phung Sang Aê Diê amâodah êpul bruă amâo dưi đĭ hriê kơ prŏng ôh hŏng ênoh mnuih msĕ snăn; ƀiădah brei drei hdơr knŏng ƀiă kpei ăt dưi mơh bi buk jih sa thŭng kpŭng. Klei yuôm jing klei drei dôk dơ̆ng ƀơ̆ng huă bi êdah leh mơ̆ Ƀuôn ala mtao adiê hlăm sang hră, anôk mă bruă amâodah kơ phung riêng gah? Hdơr bĕ, kơ drei pô lač mdê leh anăn Phung Sang Aê Diê lač mbĭt jing msĕ si kpei bi buk kpŭng hlăm thŭng. Brei knhuah drei dôk dơ̆ng ƀơ̆ng huă hŏng klei đăo bi hmăi leh anăn bi mlih lăn ala anei kơ Khua Yang. Kyuanăn tơdah drei pô amâodah Phung Sang Aê Diê drei ăt dôk ngă klei “amâo mâo uêñ”, amâo mđing mĭn ôh kơ klei hưn Ƀuôn ala mtao adiê kơ jih jang mnuih hlăm anôk Aê Diê mdưm leh drei snăn drei ăt ka bi êdah djŏ mơh klei jing mơ̆ng “kpei” msĕ si klei Khua Yang Yêsu bi hriêng. Snăn yơh, boh yuôm amâo djŏ drei mâo lu amâodah ƀiă mnuih ôh ƀiădah klei hdĭp drei dôk bi hmăi kơ phung riêng gah drei mơ̆ amâodah hơăi.
Si ngă klei diih dôk dơ̆ng ƀơ̆ng huă bi êdah Ƀuôn ala mtao adiê hlăm anôk Aê Diê mdưm leh diih mơ̆?
Wah lač: Ơ Khua Yang, đru kâo amâo huĭ, amâo êdu ai ôh tơdah ƀuh Phung Sang Aê Diê ăt dôk ƀiă hlăm ƀuôn sang, ƀiădah akâo Khua Yang đru kâo dôk dơ̆ng ƀơ̆ng huă bi hmăi ktang kơ phung riêng gah kâo čiăng lu mnuih thâo kral Ih leh anăn đăo kơ Ih.
Dlăng Klei Aê Diê Blŭ hlăm tlâo thŭn: Y-Luk 2:41-3:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
