Klei Aê Diê Blŭ: Y-Mathiơ 21:28-32
Êlan kliăng: “Msĕ si phung anak thâo gưt asăp, đăm tui ôh klei tluh diih mâo mphŭn dô hlăk diih ka thâo săng ôh” (I Y-Pêtrôs 1:14)
Klei êmuh ksiêm mĭn: Si klei Khua Yang Yêsu yăl dliê klei yăl dliê kơ dua čô anak? Ya klei Khua Yang Yêsu čiăng bi hriăm mơ̆ng klei yăl dliê anei? Klei hriăm anei mtă brei răng leh anăn bi mđĭ ai drei ya klei?
Čiăng hưn bi êdah klei phung khua čih hră leh anăn phung Pharisi khăng ai tiê amâo mâo gưt asăp, Khua Yang Yêsu yăl dliê kơ klei sa čô ama tiŏ nao dua čô anak êkei ñu mă bruă hlăm đang boh kriăk ƀâo. Pô tal sa tal êlâo lač amâo nao ôh, ƀiădah ƀiariă tinăn gơ̆ bi mlih klei mĭn leh anăn ngă klei ama tiŏ nao. Pô tal dua lač kâo nao yơh ƀiădah amâo nao ôh. Čiăng kơ phung Pharisi bi êdah klei mĭn diñu, snăn Khua Yang Yêsu êmuh: “Hlei pô hlăm phung dua čô anăn ngă klei ama ñu čiăng?” Diñu lŏ wĭt lač, “Pô êlâo anăn” (êlan 31a). Khua Yang Yêsu lŏ mblang brei diñu thâo săng klei mblang kơ klei yăl dliê anei tơdah lač: “Sĭt nik Kâo lač kơ diih, phung rĭng jia leh anăn phung mniê knhông mŭt hlăm ƀuôn ala mtao Aê Diê êlâo kơ diih” (êlan 31b). Phung Pharisi bi êmut snăk kơ phung rĭng jia leh anăn phung mniê knhông, diñu lač phung anei jing phung soh leh anăn čhŏ. Khua Yang Yêsu hưn brei diñu thâo phung diñu yap jing phung soh, amâo năng ôh leh anăn čhŏ srăng dưi mŭt hlăm ƀuôn ala mtao Aê Diê. Kyuadah tơdah digơ̆ hmư̆ Y-Yôhan Pô Ngă Ƀaptem mtô kơ klei soh, digơ̆ thâo kơ digơ̆ mâo klei soh kyuanăn digơ̆ brei Y-Yôhan ngă ƀaptem kmhal kơ klei soh čiăng mâo klei pap brei. Bi phung khua čih hră leh anăn phung Pharisi, tơdah hmư̆ klei Y-Yôhan Pô Ngă Ƀaptem mtô diñu bi khăng ai tiê, amâo čiăng kmhal ôh kơ klei soh kyuanăn amâo dưi mŭt hlăm ƀuôn ala mtao Aê Diê ôh.
Klei hriăm anei ăt čiăng mtă brei phung đăo hruê anei răng thâodah drei jing sa čô anak gưt asăp kơ Aê Diê sĭt mơ̆? Amâodah jing knŏng sa čô blŭ ƀiădah amâo ngă ôh? Năng ai drei hmư̆ leh anăn thâo kral si klei Aê Diê čiăng ƀiădah amâo čiăng ngă ôh klei Ñu mtă. Drei ăt dôk čiăng djă pioh jih jang klei kđeh drei tluh, jih jang klei soh hgăm drei dôk mdăp. Khua Yang Yêsu lač leh snei: “Kyuadah hlei pô ngă tui si klei Ama Kâo hlăm adiê čiăng jing ayŏng adei, amai adei leh anăn amĭ Kâo” (Y-Mathiơ 12:50). Wăt tơdah hmư̆ Klei Aê Diê Blŭ jêñ jêñ, wăt tơdah jing sa čô pô gĭt gai dưn, ƀiădah tơdah amâo ngă ôh tui si klei Aê Diê mtă ăt kăn srăng mâo klei bi mguôp sĭt suôr hŏng Ñu rei.
Klei Khua Yang Yêsu hưn: “Phung rĭng jia leh anăn phung mniê knhông srăng dưi mŭt hlăm ƀuôn ala mtao Aê Diê” ăt čiăng bi mđĭ ai drei đăm drei ƀuah ôh kơ drei pô kyua klei soh drei ngă leh mphŭn dô, brei drei thâo kơ drei mâo klei Aê Diê pap brei leh sĭt nik, mâo klei êngiê čiăng hdĭp klei hdĭp mrâo bi guh kơang kơ Anăn Khua Yang, leh anăn sa hruê êdei tơdah Khua Yang lŏ hriê drei srăng dưi dôk mbĭt hŏng Ñu hlăm Ƀuôn Jăk guh kơang. Klei Khua Yang čiăng thâo jing sĭt mơ̆ drei jing “phung anak thâo gưt asăp” amâodah knŏng blŭ ƀiădah amâo ngă ôh (I Y‑Pêtrôs 1:14).
Drei jing “phung anak thâo gưt asăp” hĕ amâodah jing phung hmư̆ lu, thâo blŭ ƀiădah amâo hlue ngă ôh?
Wah lač: Ơ Ama kâo khăp ơi, lač jăk kơ Ih bi mtlaih kâo leh, leh anăn brei kơ kâo Klei Aê Diê Blŭ čiăng kâo hdĭp tui si klei Ih čiăng. Đru kâo hmư̆ nanao leh anăn ngă tui si Klei Ih Blŭ čiăng kơ mngăt kâo đĭ hriê kơ prŏng leh anăn hdĭp bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen,
Dlăng Klei Aê Diê Blŭ hlăm tlâo thŭn: II Klei Yăl Dliê 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
