Mathais 21:28-32
Nqe cim:
“Yav tas los thaum nej tseem tsis tau paub Vajtswv, nej niaj hnub nyiam ua txhaum, tiamsis nimno nej yuav tsum mloog Vajtswv lus, nej tsis txhob cia tej kev phem kev qias kav nej lub siab” (I Petus 1:14)
Lus nug rau sawvdaws xav:
– Tswv Yexus tham zaj lus hais txog ob tug tub zoo li cas?
– Tus Tswv xav qhia dabtsi hauv zaj lus no?
– Zaj kawm hnub no ceebtoom thiab txhawb tau peb zog li cas?
Cia kom qhia tawm cov xibhwb uas qhia Vajtswv txoj kevcai thiab cov neeg Falixais lub siab tawv, Tswv Yexus tham zaj lus uas ib tug txivneej txib nws ob tug tub mus ua haujlwm hauv lub vaj txiv hmab. Ib tug teb hais tias “kuv tsis mus” tiamsis tomqab ntawd nws txawm mus ua haujlwm raws li leej txiv txib. Thiab ib tug teb hais tias “Kuv mam mus” tiamsis tom qab ntawd nws tsis mus. Tus Tswv xav kom cov neeg Falixais yuav tsum zeem paub yog li Nws nug hais tias, “Ob tug tub no, tus twg yog tus uas mloog leej txiv lus? Lawv teb hais tias, yog tus tub hlob.” (nqe 31a). Tswv Yexus qhia rau lawv paub lub ntsiab ntawm zaj lus uas Nws hais no “Yexus hais rau lawv hais tias, Kuv qhia rau nej hais tias, cov neeg sau se thiab cov niamntiav yuav xub tau mus rau hauv Vajtswv lub Tebchaws ua ntej nej.” (nqe 31b). Cov neeg Falixais saib tsis taus cov neeg sau se thiab cov niamntiav, lawv hais tias cov neeg no yog neeg txhaum thiab qias heev. Tswv Yexus qhia rau lawv paub hais tias cov neeg uas lawv ntsia yog neeg txhaum, tsis tsimnyog thiab qias ntawd yuav yog cov uas tau mus nyob hauv Vajtswv lub Tebchaws. Qhov vimchiv yog thaum lawv hnov Yauhas Npatitus qhia kom tso kev txhaum tseg, lawv zeem paub hais tias lawv muaj txim thiab cia Yauhas Npatitus muab lawv ua kevcai raus dej kom tau kev zam txim. Tiamsis cov xibhwb uas qhia Vajtswv txoj kevcai thiab cov neeg Falixais thaum hnov Yauhas Npatitus qhia lawv lub siab tawv, tsis kam lees txim yog li lawv yuav tsis tau mus nyob hauv Vajtswv lub Tebchaws.
Zaj kawm no kuj ceebtoom tagnrho cov ntseeg Yexus tamsim no hais tias peb puas yog tus tub uas tabtom mloog lus lossis tsis mloog? Los yog tsuas hais lus xwb tsis ua raws? Tej zaum peb hnov thiab paub qhov uas Vajtswv siab nyiam tiamsis peb ho tsis xav ua raws li Nws samhwm. Peb tseem cia tej yam kev uas lub siab ntshaw, tej kev txhaum zais cia hauv siab. Tswv Yexus qhia hais tias, “Tus uas ua raws li kuv Txiv tus uas nyob saum ntuj ceebtsheej lub siab nyiam, tus ntawd yog kuv tus kwv, kuv tus muam thiab kuv niam.” (Mathais 12:50). Txawm yog mloog Vajtswv Txojlus txhua lub sijhawm, txawm yog ua thawjcoj, los yog tsis ua raws li ces yuav tsis muaj txojkev sib raug zoo nrog tus Tswv.
Tus Tswv hais tias, “cov neeg sau se thiab cov nimntiav yuav xub tau mus rau hauv Vajtswv lub Tebchaws ua ntej nej” kuj txhawb kom peb tsis txaj muag txog tej kev txhaum yus ua dhau los, qhov peb cheemtsum ua yog paub tias yus twb tau tus Tswv zam txim, muaj kev ywjpheej ua neej kom Vajtswv tau ntsejmuag, thiab yav tom ntej tus Tswv los peb yuav tau mus nrog Nws nyob saum ntuj ceebtsheej ci ntsa iab. Yam uas tus Tswv xav tau yog saib peb puas tabtom ua tus tub uas “mloog lus” lossis tsuas hais lus qhuav tsis ua haujlawm dabtsi (I Petus 1:14).
Peb koom siab thov Vajtswv,
Vajtswv tus muaj kev hlub, thov ua tsaug uas Koj cawm nyuam yaus thiab pub muaj Koj Txojlus qhia ua li Koj nyiam. Thov Koj pab kom nyuam yaus ua tau neeg mloog lus thiab ua raws li Koj qhia kom loj hlob sab ntsujplig thiab ua rau Koj tau ntsejmuag. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb yog “tus tub mloog lus” los yog tsuas mloog ntau thiab hais ntau tsis ua?
Nyeem Vajluskub hauv peb lub xyoo: II Xwmtxheej Vajntxwv 18
Kênh Youtube BHKTHN:
