Klei Aê Diê Blŭ: Êphêsô 1:15-23
Êlan kliăng: “Kâo amâo mdei ôh bi mni kơ Aê Diê kyua diih, hdơr kơ diih êjai kâo wah lač.” (Êphêsô 1:16)
Klei êmuh ksiêm mĭn: Ya klei Khua ƀĭng kna Y-Pôl ngă leh tơdah ñu hmư̆ kơ klei đăo leh anăn klei khăp mơ̆ng phung đăo ti ƀuôn Êphêsô? Si drei wah lač kơ klei hdĭp myang Phung Sang Aê Diê čiăng đĭ hriê kơ prŏng?
Hlăm giăm jih hră Khua ƀĭng kna Y-Pôl čih mơĭt kơ jih jang Phung Sang Aê Diê, ñu čih sơăi kơ klei ñu “hdơr kơ diih êjai kâo wah lač” (êlan 16). Tinei, tơdah ñu hmư̆ kơ klei đăo leh anăn klei khăp mơ̆ng phung đăo ti ƀuôn Êphêsô, ñu bi mni kơ Khua Yang hŏng jih ai tiê kyua digơ̆ leh anăn hdơr nanao kơ digơ̆ êjai wah lač brei. Anei jing sa klei bi mđĭ ai kơ phung anak ƀuôn sang Aê Diê hlăm Phung Sang Aê Diê ti ƀuôn Êphêsô.
Amâo knŏng mjưh dŭm năn ôh, Khua ƀĭng kna Y-Pôl ăt brei phung đăo thâo ñu kwưh akâo kơ Khua Yang “srăng brei kơ diih Mngăt Myang klei thâo mĭn leh anăn klei bi êdah, čiăng thâo kral Ñu”, mblang jing klei thâo mĭn leh anăn klei bi êdah čiăng kơ digơ̆ thâo kral Khua Yang êlam hĭn (êlan 17). Digơ̆ čiăng mâo Yang Mngăt Jăk mtrang mngač čiăng dưi thâo săng klei Khua Yang čiăng leh anăn čuăn ngă tui si klei Khua Yang čiăng. Ñu wah lač kơ Phung Sang Aê Diê Êphêsô “čiăng kơ ală ai tiê diih jing mngač” (êlan 18) čiăng lač kơ klei thâo săng êlam klei hdĭp myang, thâo kral klei sĭt nik leh anăn klei khăp Aê Diê hŏng klei klă mngač. Klei anei jing êgao hĭn kơ klei thâo săng tui si klei mĭn leh anăn sô̆ djŏ truh kơ phŭn jar mnuih hlăm lam. Mơ̆ng anăn, đru digơ̆ čiêm rông klei bi mguôp jĕ giăm hĭn hŏng Aê Diê. Ñu hmăng hmưi kơ phung đăo dưi thâo săng klei čang hmăng kơ klei Khua Yang iêô pioh brei kơ klei hdĭp digơ̆. Klei anei ba klei yuôm leh anăn čuăn phă êlan nao kơ klei hdĭp, bi mjing atur kjăp kơ klei đăo leh anăn kơ klei gưt asăp.
Khua ƀĭng kna Y-Pôl ăt wah lač brei kơ phung đăo tinei thâo kral klei mdrŏng klei dưn ngăn guh kơang Ñu hlăm phung doh jăk. Ngăn dưn anei čiăng lač kơ klei jăk mơak, klei mưn leh anăn klei hdĭp hlŏng lar dôk guôn phung đăo hŏng klei jing phung dưn ngăn ƀuôn ala mtao Aê Diê. Knhal tuč, ñu hmăng hmưi kơ phung đăo dưi thâo săng klei prŏng amâo dưi mkă ôh hlăm phung đăo, tui si bruă klei myang prŏng Aê Diê. Bruă myang prŏng prĭn anei yơh brei Khua Yang Yêsu kbiă lŏ hdĭp leh mơ̆ng phung djiê leh anăn mpŭ mni Ñu ti dlông hĭn kơ jih jang phung mâo klei dưi leh anăn jih jang phung khua kiă kriê. Anăn jing bruă myang dôk hlăm klei hdĭp phung đăo čiăng dôk hdĭp mâo klei dưi hĭn leh anăn bi leh klei Aê Diê kñăm čiăng ti lăn ala anei.
Klei Khua ƀĭng kna Y-Pôl wah lač brei ƀuh ñu uêñ mĭn êdi kơ boh êlam leh anăn kơ klei đĭ hriê kơ prŏng klei hdĭp myang phung đăo. Ñu hmăng hmưi kơ digơ̆ thâo kral klă kluôm hlăm klei bi mguôp hŏng Khua Yang hŏng klei thâo mĭn, klei bi êdah, klei čang hmăng, klei dưn ngăn leh anăn klei hưn mdah bruă myang Aê Diê. Klei anei ăt brei jing klei grăp čô drei hmăng hmưi msĕ mơh êjai myơr klei wah lač brei kơ Phung Sang Aê Diê.
Si ngă drei uêñ mĭn leh anăn wah lač brei kơ ayŏng adei drei mơ̆?
Wah lač: Ơ Khua Yang, akâo Ih đru kâo hdơr kơ ayŏng adei hlăm Phung Sang Aê Diê êjai wah lač. Hŏng klei anăn yơh kâo pô leh anăn phung anak ƀuôn sang Aê Diê dưi dôk kjăp hlăm klei đăo leh anăn mâo klei ktang dưi tŭ klei lông dlăng leh anăn dôk gĭr hlăm klei huĭ mpŭ tơl truh kơ hruê bi tuôm hŏng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
