Efexus 1:15-23
Nqe cim:
“kuv niaj hnub ua Vajtswv tsaug tsis tseg tsis tu. Kuv nco ntsoov thov Vajtswv pab nej.” (Efexus 1:16).
Lus nug rau sawvdaws xav:
– Timthawj Paulus ua dabtsi thaum uas hnov txog cov ntseeg hauv Efexus kev ntseeg thiab kev hlub?
– Peb thov Vajtswv rau Pawg Ntseeg kom loj hlob rau sab ntsujplig li cas?
Hauv txhua tsab ntawv uas Paulus sau xa rau cov Pawg Ntseeg, nws puavleej hais txog nws tau “nco ntsoov thov Vajtswv pab” cov ntseeg (nqe 16). Thaum Paulus hnov txog cov ntseeg hauv Efexus kev ntseeg thiab kev hlub, nws ua Vajtswv tsaug kawg nkaus thiab nco ntsoov thov Vajtswv pab lawv. Qhov no yog ib yam kev txhawb zog rau Vajtswv cov menyuam hauv Pawg Ntseeg Efexus.
Tsis tas li ntawd xwb, Paulus tseem qhia rau cov ntseeg paub hais tias nws tau taij thov Vajtswv “pub Vaj Ntsujplig tus Dawbhuv rau nej. Tus Ntsujplig ntawd yuav pub tswvyim rau nej thiab qhia Vajtswv rau nej kom nej paub Vajtswv heev zuj zus ntxiv” (nqe 17). Lawv cheem tsum tau Vajtswv tus Ntsujplig qhia kom paub Vajtswv lub siab nyiam thiab txiav txim siab ua raws Vajtswv siab nyiam. Paulus thov Vajtswv rau Pawg Ntseeg Efexus hais tias “thov Vajtswv qhib nej lub siab kom nej totaub zoo”(nqe 18) yog hais txog kev totaub tob txog sab ntsujplig, saj tau qhov tseeb thiab Vajtswv kev hlub tseeb meej. Qhov kev totaub no siab tshaj qhov uas neeg txoj kev txawj ntse totaub, nws mus tau tshab plaws sab hauv ntawm ib tug tibneeg, pab tau lawv muaj txoj kev sib txuas sib raug zoo nrog Vajtswv. Nws ntshaw kom cov ntseeg muaj peev xwm paub tau txoj kev cia siab ntawm Vajtswv kev hu pub rau lawv lub neej. Ntawd yuav ua ib lub hauvpaus ruaj khov rau lawv kev ntseeg, kev mloog lus hauv kev ua neej.
Timthawj Paulus kuj thov Vajtswv pab rau cov ntseeg ntawm no kom paub txog txoj koob hmoov uas zoo kawg nkaus uas Vajtswv coglus tseg hais tias Vajtswv yuav pub rau Vajtswv haivneeg. Tej uas yuav tau txais no yog hais txog tej koob hmoov zoo, nqi zog thiab txojsia ibtxhis uas tabtom nyob tos cov ntseeg uas yuav muaj feem tau txais Vajtswv lub tebchaws los ua lawv tug. Thaum kawg, Paulus xav kom cov ntseeg paub Vajtswv lub hwjchim loj kawg nkaus uas yuav pub rau cov ntseeg thaum kawg. Lub hwjchim no tsa Tswv Yexus sawv hauv qhov tuag rov qab los thiab tsa Nws ua tus muaj hwjchim loj dua txhua lub hwjchim thiab txhua txoj kev tswj kav. Ntawd yog lub hwjchim uas tabtom nyob hauv tus ntseeg lub neej, pab peb kovyeej thiab ua tiav Vajtswv lub homphiaj hauv lub ntiajteb no.
Paulus tej lus thov Vajtswv qhia pom hais tias nws ntshaw cov ntseeg paub Vajtswv tob thiab loj hlob rau hauv kev ntseeg. Qhov Paulus ntshaw kawg nkaus yog kom lawv saj tau txoj kev sib raug zoo nrog Vajtswv dhau los ntawm Vaj Ntsujplig lub tswvyim, Vaj Ntsujplig kev qhia, kev cia siab, tej uas yuav tau txais thiab Vajtswv lub hwjchim. Qhov no kuj yog yam uas peb ntshaw thaum uas thov Vajtswv pab Pawg Ntseeg.
Thov Vajtswv,
Vajtswv, thov pab nyuam yaus paub nco ntsoov thov Vajtswv pab nyuam yaus cov kwvtij hauv Pawg Ntseeg. Kom nyuam yaus thiab Vajtswv Koj Pawg Ntseeg ceev tau kev ntseeg thiab tiv taus tej kev sim siab mus txog hnub uas tau ntsib Koj. Nyuam yaus tuav Tswv Yexus Khetos lub npe thov, Amees.
Peb puas hmov tshua thov Vajtswv pab rau peb cov kwvtij?
Nyeem Vajluskub hauv peb lub xyoos: 2 Xwmtxheej Vajntxwv 9
Kênh Youtube BHKTHN:
