Klei Aê Diê Blŭ: Y-Yôhan 13:34-35
Êlan kliăng: “Kâo brei klei mtă mrâo kơ diih: brei diih bi khăp hdơ̆ng diih pô; msĕ si Kâo khăp leh kơ diih, brei diih bi khăp hdơ̆ng diih pô msĕ mơh. Hŏng klei anei jih jang mnuih srăng thâo kơ diih jing phung ƀĭng kna Kâo, tơdah diih bi khăp hdơ̆ng diih pô.” (Y-Yôhan 13:34-35)
Klei êmuh ksiêm mĭn: Ya mta klei mrâo mơ̆ng klei mtă mrâo Khua Yang Yêsu brei? Ya jing hnơ̆ng čuăn kơ klei khăp hlăm klei mtă mrâo Khua Yang brei? Si srăng bi êdah klei khăp Khua Yang ti krah lăn ala mơ̆ng klei Phung Sang Aê Diê hdĭp bi knar plah wah klei kpă ênô leh anăn klei khăp?
Klei mtă kơ klei khăp, Aê Diê mtô lač leh hlăm Klei Bi Mguôp Hđăp (Bruă Lêwi 19:18). Hlăm hdruôm hră Klei Mrâo Mrang Jăk Y-Yôhan 13:34-35, Khua Yang Yêsu mtô lač sa klei mtă mrâo: Bi khăp tui si hnơ̆ng čuăn “msĕ si Kâo khăp leh kơ diih, brei diih bi khăp hdơ̆ng diih pô msĕ mơh”. Mta klei mrâo hlăm klei mtă mrâo amâo djŏ jing klei khăp ôh, ƀiădah hnơ̆ng čuăn kơ klei khăp: anăn jing klei khăp săn asei mlei, hmiêt mkăp mă bruă leh anăn dưm klei mnuih mkăn čiăng êlâo hĭn kơ klei drei pô čiăng. Ñu ăt bi klă mơh snei, klei khăp jing klei bi knăl čiăng thâo kral sa čô jing ƀĭng kna sĭt. Amâo djŏ knŏng hŏng klei blŭ, anôk bruă amâodah klei thâo lu, ƀiădah hŏng knhuah hdĭp thâo bi khăp, arăng thâo kral drei jing dŏ Khua Yang. Kyuanăn, klei mtă Khua Yang brei, kñăm snei klei hdĭp tui hlue Khua Yang brei mâo klei bi êdah klă nik hŏng bruă ngă klei khăp, bi êdah ai tiê Yang Krist Pô.
Kdlưn hĭn mơh, Khua Yang Yêsu brei kơ phung ƀĭng kna sa hnơ̆ng čuăn klei khăp hlăm klei mtă mrâo: anăn jing amâo knŏng bi khăp ƀiădah brei khăp msĕ si Ñu Pô khăp leh. Anei jing klei khăp săn asei mlei, luă gŭ leh anăn sĭt kpă msĕ si klei Khua Yang Yêsu bi hmô rao jơ̆ng leh kơ phung ƀĭng kna. Kyuanăn, klei hdĭp kpă ênô amâo knŏng hdĭp djŏ tui si hnơ̆ng čuăn Khua Yang, ƀiădah wăt brei hdĭp bi êdah klei khăp Yang Krist hŏng mnuih mkăn mơh. Klei mtă mrâo bi mguôp “tĭng dơ̆ng” hŏng Khua Yang leh anăn bi mguôp “tĭng găn” hŏng mnuih.
Klei mtă mrâo Khua Yang brei ăt brei ƀuh, brei klei khăp jing klei bi knăl klă mngač kơ sa čô đăo kơ Krist. Arăng amâo dưi ƀuh jih ôh klei đăo hlăm lam ai tiê phung đăo, ƀiădah arăng srăng thâo kral mơ̆ng knhuah hdĭp thâo bi khăp hdơ̆ng drei. Ramsey Michaels kñăm klă snei hdĭp bi khăp jing “bi mguôp mbĭt bruă klam hdơ̆ng phung anak ƀuôn sang Aê Diê ti anăp kluôm jih lăn ala hŏng klei jing phung mnuih Khua Yang Yêsu tiŏ nao”. Tơdah Phung Sang Aê Diê hdĭp hlăm klei khăp sĭt, thâo bi pap brei, mă bruă leh anăn bi đru rŭ hdơ̆ng pô, snăn srăng mjing Phung Sang Aê Diê jing phung hưn bi sĭt hdĭp ti krah lăn ala. Kyuanăn, Phung Sang Aê Diê mâo klei iêô mthưr brei hdĭp thâo bi knar plah wah klei kpă ênô leh anăn klei khăp. Klei kpă ênô krơ̆ng drei hlăm klei sĭt nik, bi klei khăp bi êdah klei sĭt nik jing sa hdră êlan bŏ hŏng klei pap. Tơdah grăp čô phung đăo tui hlue klei Khua Yang Yêsu bi hmô, hdĭp bi khăp hŏng bruă ngă sĭt klă grăp hrue, snăn Phung Sang Aê Diê srăng bi êdah klei khăp Khua Yang, leh anăn lăn ala srăng thâo kral drei jing phung ƀĭng kna Khua Yang sĭt.
Ya mta klei bi êdah drei hdĭp kpă ênô leh anăn bi khăp hŏng ayŏng amai adei hlăm Phung Sang Aê Diê?
Wah lač: Ơ Khua Yang, lač jăk kơ Khua Yang brei leh klei mtă mrâo kơ grăp čô phung anak ƀuôn sang Ih, akâo Khua Yang đru kâo hdĭp thâo bi knar plah wah klei kpă ênô leh anăn klei khăp hlăm Phung Sang Aê Diê hŏng bruă ngă sĭt klă, čiăng kơ găn hŏng kâo, klei khăp Khua Yang mtrang mngač truh kơ lu mnuih mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 134-135
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
